ވިކްޓޯރިއާ ބެކަމްގެ ފެޝަން އަދި ބިއުޓީ ވިޔަފާރި 2008 ވަނަ އަހަރު އުފެއްދި ފަހުން، ފުރަތަމަ ފަހަރަށް އެ ކުންފުންޏަށް ފައިދާއެއް ލިބިފައިވާ ކަމަށް ހާމަކޮށްފި އެވެ.
ކުރީގެ މަޝްހޫރު ލަވަކިޔުންތެރިޔާ "ސްޕައިސް ގާލް" ވިކްޓޯރިއާ ބެކަމް ކްރިއޭޓިވް ޑައިރެކްޓަރުގެ މަގާމު ފުރަަމުންދާ "ވިކްޓޯރިއާ ބެކަމް ހޯލްޑިންގްސް ލިމިޓެޑް" އަށް ގިނަ އަހަރުތަކެއް ވަންދެން ގެއްލުންވުމަށް ފަހު، 2025 ވަނަ އަހަރު 7.3 މިލިއަން ޕައުންޑުގެ އޮޕަރޭޓިން ފައިދާއެއް ލިބިފައިވާކަން އެ ކުންފުނީގެ މާލީ ހިސާބުތަކުން ދައްކަ އެވެ.
ނެޓްފްލިކްސް އިން މިދިޔަ އަހަރު ދެއްކި ޑޮކިއުމެންޓްރީއެއްގައި ވިކްޓޯރިއާ ފެޝަން ބްރޭންޑެއް އުފައްދައި، އެއީ ފައިދާވާ ވިޔަފާރިއަކަށް ހެދުމަށް ކުރި މަސައްކަތުގެ ވާހަކަ ގެނެސްދީފައިވެ އެވެ. އެ ސީރީޒްގެ ސަބަބުން ވިޔަފާރި އިތުރުވުމަށް އެހީތެރިވެދިންއިރު، ހާއްސަކޮށް "ޑެނިމް" އަދި "ޖާޒީ" ފޮތީގެ އުފެއްދުންތަކަށް އޮތް ތަރުހީބު ބޮޑުވިކަން މާލީ ހިސާބުތަކުން އެނގެ އެވެ.
ކުންފުނީގެ ފެޝަން ދާއިރާއިން 2025 ވަނަ އަހަރު ވަނީ ދެ ގުނަ އަދަދެއްގެ ކުރިއެރުމެއް ހޯދާފަ އެވެ. އަދި 2019 ވަނަ އަހަރު ފެށި ބިއުޓީ ދާއިރާއިން ވެސް މިހާތަނަށް އެންމެ ރަނގަޅު ނަތީޖާއެއް ހޯދާފައިވާ ކަމަށް އެ ކުންފުނިން ބުނެ އެވެ.
މި ކުރިއެރުމުގެ މައިގަނޑު ސަބަބަކީ އޭނާގެ "ފައުންޑޭޝަން ޑްރޮޕްސް" އަށް އޮތް ބޮޑު މަގުބޫލުކަމެވެ. އެ އުފެއްދުން ގަތުމަށް 25،000 މީހުންގެ ވެއިޓިން ލިސްޓެއް އޮތްއިރު، އޭގެ ސަބަބުން ކުންފުނީގެ ސްކިންކެއާ ދާއިރާގެ ވިޔަފާރި ވަނީ ދެގުނައަށް އިތުރުވެފަ އެވެ.
ނެޓްފްލިކްސް ޑޮކިއުމެންޓްރީގައި، ޑިޒައިނަރެއްގެ ގޮތުގައާއި ވިޔަފާރިވެރިއެއްގެ ގޮތުގައި ބަލައިގަތުމަށް އޭނާއާ މެދު ޝައްކު އުފެއްދި މީހުންގެ ފާޑުކިޔުންތަކުން އަރައިގަތުމަށް ކުރި މަސައްކަތްތަކުގެ ވާހަކަ ވިކްޓޯރިއާ ކިޔައިދީފައިވެ އެވެ. އަދި ކުންފުނި "ދިހަވަރަކަށް މިލިއަން ޕައުންޑުން" ދަރަނިވެރިވެ، މާލީ ބޮޑު ތަދެއްގެ ތެރެއަށް ވެއްޓުނު ގޮތް ވެސް ވަނީ ހިއްސާކޮށްފަ އެވެ.
އެ ދަނޑިވަޅުގައި ވިޔަފާރި ސަލާމަތްކޮށްދިނީ އޭނާގެ ފިރިމީހާ ސާ ޑޭވިޑް ބެކަމް އެވެ. ޑޭވިޑް އެ ޕްރޮގްރާމްގައި ބުނެފައިވަނީ، ވިކްޓޯރިއާ އޭނާގެ ގާތަށް އައިސް ވިޔަފާރިއަށް އިތުރު ފައިސާ ބޭނުންވާ ކަމަށް ބުނަން ޖެހުމަކީ ދެމީހުންނަށް ވެސް ވަރަށް އުނދަގޫވި ކަމެއް ކަމަށެވެ. ސަބަބަކީ އެގޮތަށް މެދުނުކެނޑި ފައިސާ ހަރަދުކުރަމުން ދިއުމުގެ ގާބިލުކަން އޭނާގެ އަތުގައި ވެސް ނެތުމުންނެވެ.
އޭގެ ފަހުން 2017 ވަނަ އަހަރު، ކުންފުނީގެ 30 އިންސައްތަ ހިއްސާ "ނިއޯ އިންވެސްޓްމަންޓް ޕާޓްނާސް" އަށް ވިއްކާލައިގެން 30 މިލިއަން ޕައުންޑުގެ އިންވެސްޓްމަންޓެއް އޭނާ ހޯދި އެވެ. އެއާއެކު އެ ކުންފުނިން ވަނީ ވިޔަފާރި އަލުން ބައްޓަންކުރުމުގެ މަސައްކަތް ފަށާފަ އެވެ.
