މިހާރު ކުރިއަށްދާ ރިސޯޓް ލީގު ސައުތު މާލެ ޒޯންގެ ކުއާޓާ ފައިނަލް ފުރަތަމަ މެޗުތަކުން މޮޅުވެ، ސެމީ ފައިނަލްގެ ފުރަތަމަ ޖާގަތައް ހާޑް ރޮކް ހޮޓެލް މޯލްޑިވްސް އާއި އޯޒެން ލައިފް މާދޫ އިން ހޯދައިފި އެވެ.
ރާއްޖޭގެ ރިސޯޓްތަކުގެ މެދުގައި ބާއްވާ އެންމެ ފޯރިގަދަ ފުޓްސަލް މުބާރާތް، ރިސޯޓް ލީގުގެ ސައުތު މާލެ ޒޯންގައި 12 ޓީމު މި ފަހަރު ވާދަކުރާއިރު، ގަދަ އަށް ޓީމު ކުޅޭ ކުއާޓާ ފައިނަލް ފުރަތަމަ ދެ މެޗު އިއްޔެ ވަނީ ސަން ސިޔާމް އޮޅުވެލިފުށީގައި ކުރިއަށްގޮސްފަ އެވެ.
ސެމީގެ ފުރަތަމަ ޖާގަ ހާޑް ރޮކް ހޮޓެލް އިން ހޯދީ ކުއާޓާގައި އަނަންތަރާ ދިގު މޯލްޑިވްސް ރިސޯޓް އަތުން 3-1 އިން މޮޅުވެގެންނެވެ. މި މެޗުގައި ހާޑް ރޮކްގެ ލަނޑުތައް ޖެހީ އައްފާޝް، އަޝްރަފް އަދި މަޝީދު އެވެ. މެޗުގައި އަނަންތަރާ ދިގުގެ ހަމައެކަނި ލަނޑު ޖަހާފައިވަނީ، އިބްރާހިމް އެވެ.
މާދޫން ވަނީ ކުއާޓާ ފައިނަލް ދެ ވަނަ މެޗުގައި ނިވާ ވެލައްސަރު މޯލްޑިވްސްގެ މައްޗަށް 8-2 އިން ކުރިހޯދައިފަ އެވެ. މި މެޗުގައި، މާދޫގެ ލަނޑުތައް ޖެހީ، މާއިދު، މުއްސަފު، އައްޒާމް، ކޮންމެ ކުޅުންތެރިއަކު ދެ ގޯލުގެ އިތުރުން، ނާއިޝް އާއި މަދީހު އެވެ. ވެލައްސަރުގެ ލަނޑުތައް ޖެހީ ޝައިބާން އާއި އިމްރާން އެވެ.
ސެމީ ފައިނަލް ފުރަތަމަ މެޗުގައި އަންގާރަ ދުވަހު މާދޫން ކުޅޭނީ ހާޑް ރޮކްއާ އެވެ.
ކުއާޓާ ފައިނަލް ފަހު ދެ މެޗު މިއަދު އޮންނާނެ އެވެ. އެ ގޮތުން، މިއަދުގެ ފުރަތަމަ މެޗުގައި ދި މެރީނާ އިން ކުޅޭނީ ޖޭޑަބްލިއު މެރިއަޓް މޯލްޑިވްސް ކާފު އެޓޯލް އައިލެންޑް ރިސޯޓް އެވެ. އަދި، ކުއާޓާ ފައިނަލް ފަހު މެޗުގައި، އޯޒެން ރިސާވް ބޮލިފުށްޓާއި ސަން ސިޔާމް އޮޅުވެލިން ވާދަކުރާނެ އެވެ. މި ދެ ކުއާޓާ އިން މޮޅުވާ ދެ ޓީމު ބައްދަލުކުރާ ސެމީ ފައިނަލް ވެސް އޮންނާނީ އަންގާރަ ދުވަހު ހަވީރު އެވެ.
