މެޑްރިޑް (ޖޫން 3) - ލިވަޕޫލްގެ ފްރާންސް ޑިފެންޑަރު، އިބްރާހިމާ ކޮނާޓޭ އާއި އިންޓަ މިލާންގެ ނެދަލެންޑްސް ފުލްބެކް، ޑެންޒެލް ޑަމްފްރީސް، ރެއާލް މެޑްރިޑަށް ބަދަލުވާން އެއްބަަސްވެފައިވާ ކަމަށް މީޑިއާ ރިޕޯޓްތައް ބުނެފި އެވެ.
އުމުރުން 27 އަހަރުގެ ކޮނާޓޭ، ހިލޭ ޓްރާންސްފާއެއްގައި ކްލަބް ދޫކޮށްލާނަަމަ، އޭނާ ވެގެންދާނީ އެ ގޮތަށް މި ފަހަރުގެ ޓްރާންސްފާގައި ލިވަޕޫލުން ދާނެ ތިން ވަނަ ކުޅުންތެރިޔާ އަށެވެ.
އެ ގޮތުން، މިސްރުގެ ތަރި، މުހައްމަދު ސަލާހު އާއި ސްކޮޓްލެންޑްގެ ކެޕްޓަން، އެންޑީ ރޮބަޓްސަން ވެސް މި ޓްރާންސްފާގައި ލިވަޕޫލް ދޫކޮށްލާނީ ބަދަލުގައި އެއްވެސް ފީއެއް ލިވަޕޫލަށް ނުލިބޭ ގޮތަށް ހިލޭ އެވެ. އެއީ، ކޮންޓްރެކްޓް ނިމުމުންނެވެ.
ކޮނާޓޭގެ އެއްބަސްވުން އާ ކުރުމުގެ މަޝްވަރާތައް އެންމެ ފުރަތަމަ ލިވަޕޫލުން ފެށީ 2023 ވަނަ އަަހަރުގެ ނޮވެމްބަރު މަހު އެވެ. އެ ފަހުން، މެދުކެނޑުތަކެއް އައުމަށް ފަހު، މި ސީޒަނުގައި އަނެއްކާ ވެސް މަޝްވަރާތައް ފެށި އެވެ މި ދިޔަ މަހު ދިން މީޑިއާ އިންޓަވިއުއެއްގައި ކޮނާޓޭ ވަނީ ލިވަޕޫލާ އެކު އާ އެއްބަސްވުމުގެ ވާހަކަތައް ރަނގަޅަށް ކުރިއަށްދާ ކަމަށް ބުނެފަ އެވެ. އަދި، އެއްބަސްވުން އާ ކުރަން ތައްޔާރަށް ހުރި ވިސްނުމުގައި ކޮނާޓޭ ވާހަކަ ދައްކާފައިވީ ނަމަވެސް، ދެ ފަރާތުގެ މެދުގައި ދެކެވުނު ވާހަކަތަކަށް ސީޒަން ނިމުނުއިރު ވެސް ކުރިއެރުމެއް ނުލިބި، އެންމެ ފަހުން ކޮނާޓޭ މިހާރު ނިންމާފައިވަނީ، ލިވަޕޫލް ދޫކޮށްލަން ކަމަށް އިނގިރޭސި ގިނަ މީޑިއާތަކުން ވަނީ ރިޕޯޓްކޮށްފަ އެވެ.
ޖަރުމަނުގެ އާރްބީ ލައިޕްޒިގުން 2021 ވަނަ އަހަރު 40 މިލިއަން ޑޮލަރަށް ލިވަޕޫލަށް ބަދަލުވި ކޮނާޓޭގެ ފޯމަށް ވަރަށް ބޮޑަށް އަސަރުކޮށްފައިވާއިރު، މި ސީޒަން ނިމުމުން އޭނާ ހިލޭ ޓްރާންސްފާއެއްގައި ރެއާލް މެޑްރިޑަށް ބަދަލުވުމުގެ ވާހަކަތައް ސްޕެއިނުގެ މީޑިއާގައި ދެކެވެ އެވެ.
ސްޕެއިނުގެ މީޑިއާތަކުން ރިޕޯޓްކުރާ ގޮތުގައި، ރެއާލާ އެކު، ހަތަރު އަހަރުގެ އެއްބަސްވުމެއް ހަދަން ކޮނާޓޭ ވަނީ އަނގަބަހުން އެއްބަސްވުމަކަށް އަތުވެފަ އެވެ.
އުމުރުން 30 އަހަރުގެ ޑަމްފްރީސް، އިންޓައާ އެކު، ހަދާފައިވާ އެއްބަސްވުން، 2028 ވަނަ އަހަރުގެ ޖޫން މަހުގެ ނިޔަލަށް އޮތް ނަމަވެސް މި ފަަހަރުގެ ޓްރާންސްފާގައި އެ ޓީމު ދޫކޮށްލަން ހުރީ ތައްޔާރަށެވެ. އެ ގޮތުން، ޑަމްފްރީސްގެ ކޮންޓްރެކްޓްގައި އޮތް ބާކީ އަހަރު އުވާލުމަށް ފަހު، އޭނާ ވިއްކާލުމަށް، އިންޓަ އިން ކިޔާ އަގު އުޅެނީ 25 މިލިއަން ޑޮލަރުގަ އެވެ. އަދި، ރެއާލުން އެ ފީ ދައްކަން ވަނީ ތައްޔާރުވެފައި ކަމަށް ރިޕޯޓްތައް ބުނެ އެވެ.
ނެދަލެންޑްސްގެ ޕީއެސްވީ އައިންދޯވަން އަށް ކުރިން ކުޅުނު، ޑަމްފްރީސް، އިންޓަ އަށް ބަދަލުވީ، 2021 ވަނަ އަހަރު އެވެ. އެ ފަހަރު އިންޓަ އިން ޕީއެސްވީ އަށް ދެއްކީ 15 މިލިއަން ޑޮލަރުގެ ފީ އެކެވެ. ރެއާލުން ޑަފްރީސް އަށް ތިން އަހަރުގެ އެއްބަސްވުމެއް ދޭނެ ކަމަށް ރިޕޯޓްތައް ބުނާއިރު، އޭނާ މި ގެންދަނީ، މި ސީޒަނަށް ފަހު، ރެއާލް ދޫކޮށްލި ތަޖުރިބާކާރު ޑިފެންޑަރު، ޑެނީ ކާވަހާލްގެ ބަދަލުގަ އެވެ.
ރެއާލްގެ ކޯޗުކަމާ ދެން ހަވާލުވާނީ ހޯސޭ މޮރީނިއޯ ކަމަށް ރިޕޯޓްތައް ބުނެ އެވެ. ބެންފީކާގައި އެންމެ ފަހުން މަސައްކަތްކުރި މޮރީނިއޯ އަލުން ރެއާލާ މި ހަވާލުވަނީ، 13 ވަރަަކަށް އަހަރު ފަހުންނެވެ. އޭނާ ވަނީ، 2010 އިން 2013 އަށް ރެއާލަށް ކޯޗުކޮށްދީފަ އެވެ. އޭރު އެ ޓީމަށް އޭނާ ވަނީ، ސްޕެނިޝް ލީގާއި ސްޕެނިޝް ކަޕް އަދި ސުޕަ ކަޕް ކާމިޔާބުކޮށްދީފަ އެވެ.
