ރައީސް އޮފީހުގައި މަސައްކަތް ކުރި އަންހެން މުވައްޒަފަކަށް ރައީސް މުހައްމަދު މުއިއްޒު ޖިންސީ ފުރައްސާރަ ކުރި ކަމަށް ކުރާ ތުހުމަތުތަކާ ގުޅިގެން ސުވާލުކުރުމުން، އެ އޮފީހުގައި ބޭއްވި ނޫސްވެރިންގެ ބައްދަލުވުމުން ބޭރުކޮށްލި މުހައްމަދު ޝަހުޒާނަށް ގާނޫނީ އެހީތެރިކަން ހޯދުމަށް އެކަށީގެންވާ ވަގުތު ނުލިބޭތީ ކަންބޮޑުވުން ފާޅުކޮށްފި އެވެ.
ޝަހުޒާން ކޯޓަށް ހާޒިރުވާން އެންގީ އަދަދު ނޫހުން ތައްޔާރުކުރި "އައިޝާ" ޑޮކިއުމެންޓްރީ މައްސަލައިގައި އެ ކޯޓުން ނެރެފައިވާ އަމުރާ ހިލާފުވެފައިވާ ކަމަށް ބުނެ އެވެ.
އެ ކޯޓުން ވަނީ އެ ޑޮކިއުމެންޓްރީ ދައުރުކުރުމާއި، އޭގައި ހުރި ވާހަކަތައް ނުސީދާ ގޮތުންނާއި ސީދާ ގޮތުން ދެއްކުން މަނާކޮށް ހުރިހާ ރައްޔިތުންގެ މައްޗަށް އަނގަބަންދުކުރުމުގެ އަމުރެއް ނުވަތަ ގެގް އޯޑަރެއް ނެރެފަ އެވެ.
އެ މައްސަލާގައި މިއަދު މެންދުރު 13:00 ގައި ޝަހުޒާން ކޯޓަށް ހާޒިރުވި އެވެ.
"އަޅުގަނޑު ދެންނެވިން އަޅުގަނޑަށް ކޯޓު އަމުރު ލިބުނީ ރޭގައި ވަރަށް ފަސްވެފައި ހުއްޓައޭ. އެހެންވީމާ އެކަށީގެންވާ ވަރުގެ ވަގުތެއް އަޅުގަނޑަށް ނުލިބެއޭ މައްސަލައާ ގުޅޭ ގޮތުން ގާނޫނީ ވަކީލަކާ މަޝްވަރާ ކުރަން،" ކޯޓު ކައިރީގައި ހުރި ރާއްޖެ ޓީވީގެ ނޫސްވެރިންނަށް ޝަހުޒާން ވިދާޅުވި އެވެ.
"އަޅުގަނޑު ދެންނެވިން މި މައްސަލައިގައި ވަރަށް ފުރިހަމައަށް ޖަވާބުދާރީވާން ބޭނުންވެއޭ ކޯޓަށް އަޅުގަނޑަށް ކުރެވޭ ތުހުމަތާ ގުޅޭ ގޮތުން. އެހެންވީމަ ދިފާއު ތައްޔާރު ކުރުމަށާއި ވަކީލުންނާ މަޝްވަރާ ކުރުމަށްޓަކައި އެކަށީގެންވާ ވަގުތު އަޅުގަނޑަށް ދެއްވުމަށް. އަޅުގަނޑު އެދުނީ މުއްދަތެއްގެ ގޮތުގައި 10 ދުވަސް އަޅުގަނޑަށް ދެއްވުމަށް."
އެހެން ނަމަވެސް، މައްސަލަ ބައްލަވާ ކްރިމިނަލް ކޯޓުގެ ބެންޗުން ނިންމީ ޝަހުޒާނަށް ވަކީލެއް އައްޔަނުކުރަން އެންމެ ދެ ގަޑިއިރު ދިނުމަށެވެ.
މިއަދު ހެނދުނު 11:00 ގައި އަދަދުގެ ލީވާން އަލީ ނާސިރު ވެސް ކޯޓަށް ހާޒިރުކުރި އެވެ. ލިޔުނު ހަބަރަކާ ގުޅިގެން ކޯޓަށް ހާޒިރުކުރި ލީވާނަށް ވެސް ދިނީ ވަކީލެއް އައްޔަނުކުރަން ދެ ގަޑިއިރެވެ.
އަަދަދުގެ ވެރިންނާއި ނޫސްވެރިން ހިމެނޭހެން ހަތަރު މީހެއްގެ މައްސަލަތައް ކޯޓުގައި އޮތްއިރު، މި މައްސަލައިގައި މި ނޫހުގެ އޮފީސް ރެއިޑްކޮށް، އިލެކްޓްރޯނިކްސްތައް ވަނީ ގެންގޮސްފަ އެވެ. އަދި ފިޔާޒާއި ހަސަންގެ ޕާސްޕޯޓު ވެސް ވަނީ ހިފަހައްޓާފަ އެވެ.
