ހަށިގަނޑު ހިކުމަށާއި، މަސްތައް ވަރުގަދަކުރުމުގެ އިތުރުން ރީތިވުމަށް އަދި ޖިންސީ ކަންކަމަށް ބޭނުންކުރުމަށް ހުއްދަ ނެތި އެތެރެކޮށް ވިއްކަމުންދާ ބޭސްތަަކަކީ ފެންވަރު ކަށަވަރުނުވާ އެއްޗެއް ކަމަށާއި، އޭގެ ސަބަބުން ހިތް ހުއްޓުމާއި ކުއްލި މަރު ފަދަ ނުރައްކާތަކާ ކުރިމަތިލާން ޖެހިދާނެ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އިންޒާރު ދީފިއެވެ.
އެ އޮތޯރިޓީން ނެރެފައިވާ އިއުލާނެއްގައި ބުނެފައިވަނީ، ހަށިގަނޑުގެ ބަރުދަން ލުއިކުރުމާއި، މަސްތައް ވަރުގަދަކުރުމާއި، ހަންގަނޑު ރީތިކުރުމުގެ އިތުރުން ޖިންސީ ކަންކަމަށް އެކިއެކި ނަންނަމުގައި ބޭސް އިމްޕޯޓުކުރަމުންދާ ކަން ފާހަގަކުރެވިފައިވާ ކަމަށެވެ.
މިފަދަ ބޭސްތައް ބައެއް އާންމު ފިހާރަތަކާއި އޮންލައިން މީޑިއާތަކުގައި އިސްތިހާރުކޮށް ވިއްކަމުންދަނީ ނަގަންޖެހޭ ހުއްދަތައް ނުނަގައި ކަމަށްވެސް އެމްއެފްޑީއޭއިން ބުނެއެވެ.
"ޑޮކްޓަރެއްގެ އިރުޝާދާއި ނުލައި މިފަދަ ތަކެތި ބައްލަވައިގަނެ ބައެއް އާންމު ފަރާތްތަކުން މިފަދަ ތަކެތި ބޭނުން ކުރަމުން ގެނދާކަން ވަނީ ފާހަގަ ކުރެވިފަ އެވެ. މިގޮތަށް ނަގަންޖެހޭ ހުއްދަތައް ނުނަގައި ވިއްކާ ބޭސްތަކަކީ މި އޮތޯރިޓީގެ ފަރާތުން އެއްވެސް ގޮތަކަށް އޭގެ ރައްކާތެރިކަމާއި ފެންވަރު ކަށަވަރުކޮށްފައިވާ ބޭސްތަކެއް ނޫނެވެ. އެހެން ކަމުން މިފަދަ ބޭސް ބޭނުންކުރުމުގެ ސަބަބުން އާންމު ސިއްހަތަށް ނުހަނު ބޮޑެތި ގެއްލުންތަކާއި ކުރިމަތިލާންޖެހިދާނެ އެވެ،" އިއުލާނުގައިވެ އެވެ.
އެ އޮތޯރިޓީން އިތުރަށް ބުނެފައިވަނީ، ޑޮކްޓަރެއްގެ އިރުޝާދާ ނުލައި މިފަދަ ތަކެތި ބޭނުންކުރުމުގެ ސަބަބުން ހިތް ހުއްޓުމާއި ސްޓްރޯކް ޖެހުން ފަދަ ހިތާމަވެރި ހާދިސާތަކުގެ އިތުރުން ކުއްލި މަރަށް ހުށަހެޅުމުގެ ފުރުސަތު އޮންނަ ކަމަށެވެ.
ބޭސް ވިއްކުމުގެ ހުއްދަ އޮންނަ ފާމަސީތަކުން ވެސް މިފަދަ ބޭސްތައް ވިއްކަންވާނީ ބޭހަށް ނަގަންޖެހޭ ހާއްސަ ހުއްދަތައް ނަގައިގެން ކަމަށް އެމްއެފްޑީއޭއިން ހަނދާންކޮށްދެއެވެ. އަދި ހުއްދަ ނުނަގައި އިސްތިހާރުކޮށް ވިއްކާ މިފަދަ އުފެއްދުންތައް ބާޒާރުން ނެގުމުގެ މަސައްކަތް މިހާރު ފަށާފައިވާ ކަމަށްވެސް އެ އޮތޯރިޓީން ބުނެއެވެ.
އެމްއެފްޑީއޭއިން ވަނީ ހުއްދަ ނެތި ބޭސް އެތެރެކޮށް ވިއްކާ ފަރާތްތަކާ މެދު "ބޭހާބެހޭ ގަވާއިދު" އަދި "ސިއްހީ ހިދުމަތް ދިނުމުގެ ގާނޫނު" ގެ ދަށުން ފިޔަވަޅު އަޅާނެ ކަމުގެ އިންޒާރު ވެސް ދީފައެވެ.
