ފިލިޕީންސް ވަރުގަދަ ވިޔަސް ރަނގަޅު ނަތީޖާއެއް ނެރެވިދާނެ: މޯހަން

Nov 17, 2025, 11:08 AM
ފިލިޕީންސް ވަރުގަދަ ވިޔަސް ރަނގަޅު ނަތީޖާއެއް ނެރެވިދާނެ: މޯހަން

އޭޝިއަން ކަޕް ކޮލިފައިންގައި މާދަމާ ހަވީރު ރާއްޖޭން ގަލޮޅު ދަނޑުގައި ކުޅެން ޖެހެނީ ކޮލިފައިން ގްރޫޕްގައި އޮތް އެންމެ ވަރުގަދަ ޓީމު، ފިލިޕީންސާ ކަމަށާއި އެހެން ނަަމަވެސް ހިތްވަރާ އެކު، މަސައްކަތްކޮށްގެން ރަނގަޅު ނަތީޖާއެއް ނެެރެވިދާނެ ކަމަށް ގައުމީ ކޯޗު، މުހައްމަދު ޝިޔާޒް (މޯހަން) ބުނެފި އެވެ.

ފިލިޕީންސް މެޗާ ބެހޭގޮތުން، ވާހަކަ ދައްކަމުން މިއަދު ބޭއްވި ނޫސްވެރިންގެ ބައްދަލުވުމުގައި މޯހަން ބުނީ، މި މެޗުގެ ތައްޔާރީތައް ދަނީ ފުދޭވަރަކަށް ރަނގަޅަށް ކަމަށެވެ. އެއީ، ރާއްޖޭގެ ފުޓްބޯޅަ ސީޒަން ފަށައިގެން، ކްލަބްތައް ގަވާއިދުން މެޗުތައް ކުޅެމުންދިއުމަކީ، ކުޅުންތެރިން ފިޒިކަލީ ވަރަށް ފިޓްކޮށް ތިބޭނެ ކަމެއް ކަމަށާއި ދެން ކުރަން ޖެހޭ މަސައްކަތް އޮތީ ޓެކްޓިކަލީ ކަމަށްވާއިރު، އެ އަށް ވަރަށް މަސައްކަތް ކުރެވޭ ކަމަށް މޯހަން ވަނީ ބުނެފަ އެވެ.

މޯހަން ބުނީ، އަމިއްލަ ދަނޑުގައި ކުޅެން ލިބުމަކީ އަބަދުވެސް ވަރަށް ބޮޑު ހިތްހަމަޖެހުމެއް ކަމަށާއި އަމިއްލަ ދަނޑުގައި ކުޅެން ލިބުމުގެ އެޑްވާންޓޭޖް ނެގެން އޮންނާނީ ވީހާވެސް ގިނަ ސަޕޯޓަރުން ދަނޑަށް ވަދެގެން ކަމަށެވެ.

Advertisement

ކޮލިފައިންގައި ރާއްޖޭން ފުރަތަމަ ފިލިޕީންސާ ދެކޮޅަށް ކުޅެން އޮތް މެޗު މާޗް މަހު އޮތީ ރާއްޖޭގައި ކުޅޭ ގޮތަށް ޝެޑިއުލްކޮށްފަ އެވެ. އެކަމަކު، އޭރު ހާލަތު އޮތްގޮތުން، އެ މެޗު ފިލިޕީންސަަށް ބަދަލުކޮށް، ރާއްޖޭގެ ހޯމް މެޗު ފަހަށް ޝެޑިއުލްކުރީ އެވެ. ސްޕެއިނުގެ ކޯޗު، އަލްބާޓޯ ކަޕެއްޔަސް، އޭރު ފިލިޕީންސް ކޯޗަކަށް ހުރިއިރު، އެ މެޗުން ރާއްޖެ އަތުން ފިިލިޕީންސް މޮޅުވީ 4-1 އިންނެވެ.

އޭޝިއަން ކަޕް ކޮލިފައިން ގްރޫޕް އޭގެ އެއް ވަނައިގައި އޮތް ފިލިޕީންސާއި ދެ ވަނައިގައި އޮތް ތަޖިކިސްތާނަށް ހަތަރު މެޗުން 10 ޕޮއިންޓް ލިބިފައިވާއިރު، ލަނޑުގެ ތަފާތުން ކުރި ލިބެނީ ފިލިޕީންސް އަށެވެ. ތިން ވަނައިގައި އޮތް ޓިމޯ ލެސްޓޭ އަށް ހަަތަރު މެޗުން ތިން ޕޮއިންޓް ލިބިފައިވާއިރު، ރާއްޖެ ފުލުގައި އޮތީ ކޮލިފައިން ހަތަރު މެޗުން ވެސް ބަލިވެގެންނެވެ.

"ފިލިޕީންސަކީ މި ވަގުތު މި ގްރޫޕްގައި އޮތް އެންމެ ވަރުގަދަ ޓީމު، އޭގެ މާނަ އަކީ އަޅުގަނޑުމެންނަށް ނަތީޖާ ނުނެރެވޭނެއޭ އެއް ނޫން. އެެހެން ނަމަވެސް، އަޅުގަނޑުމެން އެ މީހުންނަށް އެ ދޭންޖެހޭ ރެސްޕެކްޓް ދީގެން އެ މީހުންގެ ކޮބައިތޯ ގަދަ ކަމަކީ ބަލައިގެން އެ މީހުންގެ ކުޅުމުގެ ސްޓައިލަށާ މި ހުރިހާ ކަމަކަށް ބަލައިގެން އަޅުގަނޑުމެން މި މެޗަށް ތައްޔާރުވަނީ، ކޮންމެ މެޗަކީ ވެސް ހަމަ މުޅިން ތަފާތުކޮށް ތައްޔާރުވާން ޖެހޭ މެޗެއް. އިދިކޮޅު ޓީމުގެ ކުޅުމަށް ބަލާފައި އެ ގޮތަށް ހަމަ ޕްލޭން ކުރަންޖެހޭނީ މެޗު ސެޓަޕް އެއްޗެހި އެ ގޮތަށް ތައްޔާރުވެފައި މި ތިބީ،" ފިލިޕީންސާ ބެހޭގޮތުން މޯހަން ބުންޏެވެ.

ގައުމީ ޓީމުގެ އެސިސްޓަންޓް ކޯޗުކަން ވެސް ކޮށްފައިވާ މޯހަން ބުޏނީ، އާންމުކޮށް ރާއްޖޭގެ ޓީމަށް ދިމާވާ އެންމެ ބޮޑު މައްސަލަ އަކީ ވަރަށް އާދައިގެ "ސިމްޕަލް ގޯލު" ވަނުން ކަމަށާއި، އެކަން ހުއްޓުވޭތޯ ކުރަންޖެހޭ މަސައްކަތަށް ވަރަށް ބޮޑަށް ފޯކަސް ކޮށްގެން ކުރަމުން އަންނަ ކަމަށެވެ.

"މިދިޔަ ހަތަރު މެޗުގައި ސެޓް ޕްލޭ އަކުން އަޅުގަނޑުމެން ކޮޅަށް ގޯލެއް ނުޖަހައި، ހުރަހަކުން ވެސް، އެެއީ ހިތްހަމަޖެހުމެއް، އިދިކޮޅު ޓީމުން، ބޮޑެތި ކުޅުންތެރިން ތިބޭއިރު، އޭގެ އެޑްވާންޓޭޖް ނެގިޔަނުދޭން އެ ޑިސިޕްލިން ވަރަށް ރަނގަޅު. އޭރިއާތެރޭގައި މާކިން ވެސް ރަނގަޅު،" މޯހަން ބުންޏެވެ.

"އެކަމަކު، ވަދެގެން މި ދަނީ ސިމްޕަލް ގޯލު. އެއީ ދެން ހުއްޓުވަން ޖެހޭ ކަމަކީ، ދެން، ގޯލު ވަންނަ ވަގުތު، އަބަދުވެސް ހާފު ފައްޓާތަނުން، 10 ވަރަކަށް މިނިޓް ތެރޭ ބައިކޮޅަށް ގޯލެއް ވަނުން އެއީ ވަރަށް ބޮޑު މާޔޫސްކަމެއް އެކަންކަމަށް ވަރަށް ފޯކަސް ކޮށްފައި އޮންނާނީ،"

ފިލިޕީންސާ ދެކޮޅަށް ކުޅޭއިރު އެންމެ ބޮޑު ޗެލެންޖަކަށްވާނީ، އެ ޓީމުގެ ވަކިވަކި ކުޅުންތެރިންނަކީ، ވަރަށް ހުނަރުވެރި ކުޅުންތެރިން ކަމަށްވުން ކަމުގައި މޯހަން ވަނީ ބުނެފަ އެވެ. އަދި، އޭނާ ފާހަގަކުރި ގޮތުގައި، ރާއްޖޭން މިދިޔަ މަހު މާލޭގައި ކުޅުނު، ތަޖިކިސްތާނާއި ފިލިޕީންސް ޓީމާ ހުރި ތަފާތަކީ، ތަޖިކިސްތާނަކީ ޓެކްޓިކަލީ ވަރަށް އޮގަނައިޒް ޓީމެއް ކަމަށާއި، އެކަމަކު، ފިލިޕީންސް ޓެކްޓިކަލީ އަށް ވުރެން ބޮޑަށް އިންޑިވިޖުއަލީ މޮޅެތި ކުޅުންތެރިން ގިނަ ޓީމެއް ކަމަށެވެ.

"އަޅުގަނޑުމެންނަށް އެނގޭ ފިލިޕީންސް ޓީމުގައި ސިޓިޒެންޝިޕް ލިބިގެން އެކިއެކި ގައުމުތަކަށް ނިސްބަތްވާ ކުޅުންތެރިން ފިލިޕީންސް ޓީމުގައި ހިމެނިގެން އެބަދޭ. އެ ކުޅުންތެރިންނަކީ ވަރަށް ހުނަރުވެރި ކުޅުންތެރިން، އެ ކުޅުންތެރިންނަށް އަޅުގަނޑުމެން ވަރަށް ފޯކަސް ކުރަން ޖެހޭ. އެ ކުޅުންތެރިން އިންޑިވިޖުއަލީ އެ ކޮށްލާ ކަމަކުން މެޗުގެ ނަތީޖާ ބަދަލުވެގެން ދިއުން އެއީ އަޅުގަނޑުމެން އެންމެ ވިސްނާ ކަމަކީ،" މޯހަން ބުންޏެވެ.

ފިލިޕީންސާ ދެކޮޅަށް މިހާތަނަށް ރާއްޖޭން ކުޅުނު ހަ މެޗުގެ ތެރެއިން ހަތަރު މެޗުން ފިލިޕީންސް މޮޅުވިއިރު، އެއް މެޗުން އެއްވަރުވެ، އެއް މެޗުން ރާއްޖެ ވަނީ މޮޅުވެފަ އެވެ. ރާއްޖޭން ވަނީ 2009 ވަަނަ އަހަރުގެ އޭއެފްސީ ޗެލެންޖް ކަޕް ކޮލިފައިންގައި މާލޭގައި ކުޅެ، 3-2 އިން ފިލިޕީންސް ބަލިކޮށްފަ އެވެ. އޭގެ ފަހުން، 2014 ވަނަ އަހަރުގެ އޭއެފްސީ ޗެލެންޖް ކަޕް ސެމީ ފައިނަލުގައި ފިލިޕީންސް އިން ވަނީ މާލޭގައި 3-2 އިން ރާއްޖެ ބަލިކޮށްފަ އެވެ. އޭގެ ފަހުން، 2019 ވަނަ އަހަރު ވޯލްޑް ކަޕް ކޮލިފައިން މެޗެއްގައި ގަލޮޅު ދަނޑުގައި ކުޅެ، ފިލިޕީންސް އިން ވަނީ 2-1 އިން ރާއްޖެ ބަލިކޮށްފަ އެވެ. މި އަހަރު މާޗް މަހުގެ ކުރިން، އެންމެ ފަހުން މި ދެ ޓީމު ކުޅުނު މެޗުގައި، ވޯލްޑް ކަޕް ކޮލިފައިންގައި ފިލިޕީންސްގެ ހޯމް މެޗު ސެންޓްރަލައިޒްކޮށް، 2022 ވަނަ އަހަރު ދުބާއީގައި ކުޅުނުއިރު، ރާއްޖެ އާއި ފިލިޕީންސް ވީ 1-1 އިން އެއްވަރުވެފަ އެވެ.

ގަލޮޅު ދަނޑުގައި، އޭޝިއަން ކަޕް ކޮލިފައިންގައި، ފިލިޕީންސް އާއި ރާއްޖޭގެ މެޗު ފަށާނީ މާދަމާ ހަވީރު 15:30 ގަ އެވެ.

ކޮމެންޓް

ފަހުގެ ޚަބަރު

ސިޓީ އާއި އާސެނަލަށް މޮޅެއް ނުލިބުނު، ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން މެންޗެސްޓާ ސިޓީ އާއި އާސެނަލް އެއްވަރުވިއިރު، ޗެލްސީ ވަނީ ލީޑްސް ޔުނައިޓެޑް އަތުން 4-1 އިން ބަލިވެފައި. ސިޓީ އާއި ފުލަމް ބައްދަލުކުރި މެޗު 1-1 އިން އެއްވަރުވިއިރު، އާސެނަލް އާއި ނިއުކާސަލް ބައްދަލުކުރި މެޗު ނިމުނީ 2-2 އިން އެއްވަރުވެގެން.

އޮޑިން ކޮންމެ މެޗެއްގައި ވެސް ޓީމު ވަރުގަދަކޮށްގެން ނަތީޖާ ނެރެން

ދިވެހި ޕްރިމިއާ ލީގުގައި އޮޑި ސްޕޯޓްސް ކްލަބުން ކޮންމެ މެޗަކަށް ވެސް ނުކުންނަނީ ޓީމު ވަރުގަދަކޮށް ރަނގަޅު ނަތީޖާއެއް ނެރުމުގެ އަމާޒުގައި ކަމަށް އެ ޓީމުގެ ކޯޗު ލޫޗޯ ބުނެފި. ލީގުގެ ބްރޭކުގެ ތެރޭގައި ޓީމުގެ ފިޓްނަސް އާއި ކުޅުން ރަނގަޅުކުރަން ގިނަ މަސައްކަތްތަކެއް ކޮށްފައިވާއިރު، މާދަމާ ޓީސީއާ ދެކޮޅަށް ނުކުންނާނީ މެޗުގެ ކޮންޓްރޯލް ހޯދައިގެން މޮޅުވާން

ނިއު ރޭޑިއަންޓް ބަލިކުރުން މުޅި ވިކްޓަރީ އަށް އިތުބާރަކަށްވާނެ

ދިވެހި ޕްރިމިއާ ލީގުގައި ނިއު ރޭޑިއަންޓާ ދެކޮޅަށް ކުޅޭ މެޗުން މޮޅުވުމަކީ ވިކްޓަރީގެ އިތުބާރު ބޮޑުވެ، ސަޕޯޓަރުންގެ ޝައުގުވެރިކަން އިތުރުވާނެ ކަމެއް ކަމަށް އެ ޓީމުގެ ކޯޗު މޯހަން ބުނެފި ލީގުގައި މިހާތަނަށް ބަލިނުވެ އޮތް މި ދެ ޓީމުގެ ކުރިމަތިލުމަށް ވިކްޓަރީ އޮތީ ވަރަށް ރަނގަޅަށް ތައްޔާރުވެފައި ކަމަށްވެސް އޭނާ ފާހަގަކުރި

މުޑްރިކް އާއި ޔޫކްރެއިން އެފްއޭގެ ކޯޅުމެއް

މަނާބޭހުގެ މައްސަލައެއްގައި 21 މަސް ދުވަހުގެ ސަސްޕެންޝަނެއް ފުރިހަމަކުރުމަށްފަހު، ޔޫކްރެއިންގެ މިހައިލޯ މުޑްރިކް އެ ގައުމުގެ ފުޓްބޯޅަ އެސޯސިއޭޝަނުން އިހުމާލުވި ކަމަށް ބުނެ ކުރި ތުހުމަތުތަކާ ގުޅިގެން މައްސަލަ ހޫނުވެއްޖެއެވެ. މުޑްރިކްގެ މި ވާހަކަތަކަށް ރައްދު ދެއްވަމުން ޔޫކްރެއިން އެފްއޭގެ ރައީސް އަންޑްރީ ޝެވްޗެންކޯ ވިދާޅުވީ މުޑްރިކް ހަދަނީ ދޮގު ކަމަށާއި، މިއީ އެސޯސިއޭޝަނުގެ އަގުވައްޓާލަން ކުރާ ކަމެއް ކަމަށެވެ.

ޓޮމް ބްރެޑީ ޗެލްސީގެ ހިއްސާއެއް ގަންނަނީ

އެމެރިކަން ފުޓްބޯޅަ ލެޖެންޑް ޓޮމް ބްރެޑީ، ކްލިއަލޭކް ކެޕިޓަލް މެދުވެރިކޮށް އިނގިރޭސި ކްލަބް ޗެލްސީގެ މައިނޯރިޓީ ހިއްސާއެއް ގަތުމަށް ދަނީ މަސައްކަތް ކުރަމުންނެވެ. މި އިންވެސްޓްމަންޓާއެކު އޭނާއަށް ވޯޓުލުމުގެ ހައްގު ނުލިބުނު ނަމަވެސް، ކުރިއަށް އޮތް ތަނުގައި ކްލަބުގެ ބޯޑުން ފުރުސަތު ލިބުމުގެ ފުރުސަތު އެބައޮތެވެ. ބްރެޑީ މި ފިޔަވަޅު އަޅަނީ ބާމިންހަމް ސިޓީގައި އޮތް އޭނާގެ ހިއްސާ ދޫކޮށްލުމަށްފަހުއެވެ.

ބަޔާން އެއްވަރުވި މެޗުގައި ކޭން އަށް ސީރިއަސް އަނިޔާއެއް

ޖަރުމަނު ލީގުގައި ކޮލޯންއާ ދެކޮޅަށް ކުޅުނު މެޗުގައި ބަޔާން މިއުނިކްގެ ފޯވާޑް ހެރީ ކޭންގެ ކުޑަހުޅަށް ލިބުނު ސީރިއަސް އަނިޔާއަކާ ގުޅިގެން، ތިން މަސް ދުވަހަށް އޭނާ ކުޅުމާ ދުރުގައި ހުންނަން ޖެހިއްޖެ. ބަޔާން މި މެޗުން 1-1 އިން އެއްވަރުވިއިރު، މި ނަތީޖާއާއެކު ލީގުގެ އެއްވަނަ މަގާމު ގެއްލުމުގެ ބިރު އެ ޓީމަށް ވަނީ ކުރިމަތިވެފައި

ސްޕެއިން ކައިރިން ބަދަލުހިފަން ޒިދާން ބޭނުމެއް ނޫން

ނޭޝަންސް ލީގުގެ ކުއާޓާ ފައިނަލުގައި ސްޕެއިނާ ދެކޮޅަށް ނުކުންނައިރު، ފްރާންސްގެ އަމާޒަކީ ވޯލްޑް ކަޕްގެ ބަލިވުމުގެ ބަދަލުހިފުމުގެ ބަދަލުގައި މުބާރާތުގެ ތަށި ހޯދުން ކަމަށް ކޯޗު ޒިދާން ބުނެފި. ޒިދާން ފާހަގަކުރި ގޮތުގައި މިއީ އާ މުބާރާތެއް ކަމަށާއި، އަންނަ މާޗް މަހު އޮންނަ މި މެޗުތަކަށް ޓީމު އޮތީ ވަރުގަދަ އަމާޒެއްގައި

Newsletter

Get the latest news delivered straight to your inbox