ރައްޔިތުންގެ މަޖިލީހުން އަންގާރަ ދުވަހު ފާސް ކުރި މިނިވަން ހިޔާލާއި ނޫސްވެރިކަން މަނާ ކުރާ ބިލުގެ ސަބަބުން ބޭރު ގައުމުތަކުން ސަރުކާރަސް ކުރާ ޕްރެޝަރު ބޮޑުވެ، ބިލުގެ ހަގީގަތް އޮޅުވާލަން ސަރުކާރުގެ އިސް އޮފިޝަލުން ސޯޝަލް މީޑިއާގައި ލިޔަން ފަށައިފި އެވެ.
ސަރުކާރުން ބިލު ފާސް ކުރުމާއެކު ދިވެހިރާއްޖޭގައި ހުންނަ އެމެރިކާގެ އެމްބަސީއިން ވަނީ މިނިވަން ހިޔާލާއި ނޫސްވެރިކަން ކުރުމުގެ ހައްގަށް ހުރަސް ނޭޅުމަށް ދިވެހި ސަރުކާރަށްް ފާޅުގައި ގޮވާލައިފަ އެވެ. އޭގެ އިތުރުން ބައެއް އެހެން ގައުމުތަކުން ވެސް ބިލުގެ ކަންބޮޑުވުން ސަރުކާރާ ހިއްސާކުރި ކަން މި ނޫހަށް އެނގިފައިވެ އެވެ.
އޭގެ ފަހުން، ބިލު ދިފާއުކޮށް ފޮރިން މިނިސްޓަރު އަބްދުﷲ ހަލީލު ހިމެނިވަޑައިގަންނަވާ ގޮތަށް ސަރުކާރުގެ އިސް ވެރިން ދަނީ ސޯޝަލް މީޑިއާގައި ޕޯސްޓު ކުރައްވަމުންނެވެ. އެ ބިލާ ދެކޮޅަށް އިދިކޮޅު އެމްޑީޕީގެ ލީޑަރުން ކުރައްވަމުން ގެންދަވާ ޕޯސްޓުތަކަށް ވެސް ސަރުކާރުން ދަނީ ރައްދު ދެމުންނެވެ.
އެ ބިލާ ގުޅޭ ދެ ޕޯސްޓެއް ހަލީލު ކުރައްވާފައިވެ އެވެ. އެ ދެ ޕޯސްޓުގައި ވެސް ބުނެފައި ވަނީ ބިލުގެ މައިގަނޑު މަގްސަދަކީ މީޑިއާ ރެގިއުލޭޓް ކުރަން މިހާރު އޮންނަ ކޮމިޝަނާއި ކައުންސިލުގެ މަސައްކަތް އެއް ކޮމިޝަނެއްގެ ދަށަށް ގެނައުން ކަމަށެވެ.
"މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލަކީ މީޑިއާ ރެގިއުލޭޓް ކުރަން މިނިވަން އެއް ކޮމިޝަނެއްގެ ދަށަށް ގެނެސްދޭ ބިލެއް. އެ ކޮމިޝަނުގެ މެޖޯރިޓީ މެންބަރުންނަކީ ސީދާ މީޑިއާތަކުން އިންތިހާބު ކުރާ މެންބަރުން. އޭގެ ސަބަބުން ޓްރާންސްޕޭރަންސީ އިތުރުވެ، ސަރުކާރުގެ ކޮންޓްރޯލް މީޑިއާއަށް ނެތްކަން ކަށަވަރުވާނެ،" ހަލީލު ވިދާޅުވެފައިވެ އެވެ.
އޭގެ ފަހުން ހަލީލު ބަހުގެ ހަމަލާއެއް ދެއްވީ އިދިކޮޅު އެމްޑީޕީއަށެވެ. އެމްޑީޕީގެ ވެރިކަމުގައި ނޫސްވެރިކަން އޮތް ކަމަށް ހަލީލަށް ގަބޫލު ކުރެވޭ ގޮތުގެ ވާހަކަ ސޯޝަލް މީޑިއާގައި އޭނާ ލިޔުއްވާފައި އޮތެވެ. ނަމަވެސް ބިލުގައި ހުރި ކަންބޮޑުވާންޖެހޭ އެއްވެސް ކަމެއްގެ ވާހަކައެއް ހަލީލު ނުދައްކަވަ އެވެ.
ރައީސް މުހައްމަދު މުއިއްޒު ވެސް ވަނީ އެ ބިލުގެ ދިފާއުގައި މިއަދު ވާހަކަ ދައްކަވައިފަ އެވެ. މިއަދު ޝާއިއު ކުރި މުއިއްޒުގެ ޕޮޑްކާސްޓުގައި ވާހަކަ ދައްކަވަމުން އެމަނިކުފާނު އެ ބިލު ސިފަ ކުރެއްވީ "ހިތަށް އަންނަހާ އެއްޗެއް" ލިޔުން މަނާ ކުރާނެ ބިލެއްގެ ގޮތުގަ އެވެ.
"ހަމަ ހިތަށް އަންނަހާ ކޮންމެ އެއްޗެއް އެއްވެސް ބެލުމެއްނެތި، އޭގެ ހަގީގަތެއް ބެލުމެއްނެތި، އަނެކާއަށް ކޮންމެފަދަ ގެއްލުމެއްވިޔަސް ހެޔޮކަމަށް ބަލާފައި ލިޔުމަކީ، އަޅުގަނޑު ހިތުން އިންސާނަކަށް ވީތީ ވެސް ކުރެވޭނެ ކަމެއް ނޫން،" މުއިއްޒު ވިދާޅުވި އެވެ.
ބިލު ފާސް ކުރުމާއެކު އެމެރިކާ އެމްބަސީއިން ގޮވާލީ މިނިވަން ހިޔާލު ފާޅު ކުރުމާއި ނޫސްވެރިކަން ކުރުމުގެ ހައްގަށް ހުރަސް ނޭޅުމަށެވެ.
"ހިޔާލުފާޅު ކުރުމުގެ މިނިވަންކަން އަސާސީ ހައްގެއްގެ ގޮތުގައި ނޫސްވެރިން ހިމެނޭ ގޮތަށް އެންމެނަށް ލިބިދިނުމަށް އެމެރިކާއިން ތާއީދު ކުރާނެ. ދިވެހިރާއްޖެ ހިމެނޭ ގޮތަށް ހުރިހާ ގައުމަކަށް ވެސް އަޅުގަނޑުމެން ގޮވާލަނީ ތަފާތު އަދި އިދިކޮޅު ހިޔާލުތައް ފާޅު ކުރުމުގެ ހައްގަށް ހުރަސް ނޭޅުމަށް،" އެމްބަސީއިން ބުނެފައިވެ އެވެ.
ހަލީލުގެ އިތުރުން މެންބަރު މުހައްމަދު އިބްރާހިމް، އިމްރާން ލަތީފް، މުހައްމަދު ސިނާން، އިބްރާހިމް ސުޖާއު، މިނިސްޓަރު މުހައްމަދު ޝަހީމް އަލީ ސައީދު، ޣައްސާން މައުމޫން، އަބްދުﷲ ރިފާއު، މޫސާ ޒަމީރު، ތޯރިގު އިބްރާހިމް އަދި އަބްދުﷲ މުއްތަލިބު ވެސް ވަނީ ބިލު ދިފާއުކޮށް ވާހަކަ ދައްކަވައިފަ އެވެ.
އޭގެ އިތުރުން ސަރުކާރުގެ ޑެޕިއުޓީ މިނިސްޓަރުން، ސީނިއާ ޕޮލިޓިކަލް ޑިރެކްޓަރުން އަދި އެހެނިހެން ސިޔާސީ މަގާމުތަކުގައި ތިބި ވަރަށް ގިނަ ބޭފުޅުން ވެސް ގެންދަވަނީ މިނިވަން ހިޔާލު މަނާ ކުރާ ބިލު ދިފާއު ކުރައްވަމުންނެވެ.
އިއްޔެ ފާސް ކުރި ބިލުގައިވާ ގޮތުން ނޫސްތަކާއި އިންޓަނެޓު ރެގިއުލޭޓް ކުރަން ކޮމިޝަނެއް އުފައްދަންޖެހެ އެވެ. އެ ކޮމިޝަނުގައި ތިބެނީ މަޖިލީހުން އައްޔަން ކުރާ ތިން މެންބަރުންނާއި މީޑިއާތަކުން އިންތިހާބު ކުރާ ހަތަރު މެންބަރުންނެވެ.
ބިލުގައިވާ ގޮތުން، ދޮގު ހަބަރާއި މައުލޫމާތަކީ ކޮބައިކަން ކަނޑައަޅާނީ އެ ކޮމިޝަނުންނެވެ. ނޫސްތައް ޖޫރިމަނާކޮށް، ރަޖިސްޓްރީ ބާތިލު ކުރުމުގެ ބާރު ވެސް އެ ކޮމިޝަނަށް ވަނީ ދީފަ އެވެ. އަދި ނޫސްތަކުގެ އެޑިޓަރުންގެ ކޮލިފިކޭޝަން ވެސް ކަނޑައަޅަނީ އެ ކޮމިޝަނުންނެވެ.
އެ ބިލުން އިންޓަނެޓު ރެގިއުލޭޓް ކުރާތީ ކަންބޮޑުވާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ވަނީ ބުނެފަ އެވެ. ބިލުގައި ބަދަލު ކުރަންޖެހޭ ގިނަ ކަންކަން ހުރި ކަމަށް މޯލްޑިވްސް ބާ ކައުންސިލުން ވެސް ބުންޏެވެ. އަދި ބިލު ފާސް ނުކުރަން މޯލްޑިވްސް ޖާނަލިސްޓް އެސޯސިއޭޝަން އަދި ނޫސްވެރިން ދިޔައީ ގޮވާލަމުންނެވެ.
