ގައުމީ ތަރައްގީގެ ޕްލޭނެއް އެކުލަވައިލި ނަމަވެސް ރައީސުލްޖުމްހޫރިއްޔާ މުހައްމަދު މުއިއްޒުގެ ސަރުކާރުން އެއަށް އަމަލު ކުރާނެ ކަމުގެ އުއްމީދެއް ނެތް ކަމަށް ބުނެ އެ ޕްލޭން އެކުލަވައިލުމަށް ކުރަމުންދާ މަސައްކަތުގައި ބައިވެރިނުވުމަށް އިދިކޮޅު އެންމެ ބޮޑު ޕާޓީ އެމްޑީޕީން ނިންމައިފި އެވެ.
އެ ޕާޓީން ދާދި ދެންމެއަކު ނެރުނު ނޫސްބަޔާނެއްގައި ބުނީ ގައުމީ ތަރައްގީގެ ޕްލޭނެއް އެކުލަވައިލުމުގެ މަސައްކަތް ކުރަމުންދާ ކަމަށް ސަރުކާރުން ބުނި ނަމަވެސް، ކަންކަން ކުރަމުން ދަނީ ހިތުހުރި ގޮތަކަށް ކަމަށެވެ.
އެގޮތުން ޕްލޭން އެކުލަވައިލުމުގެ މަސައްކަތް ފެށުމުގެ ކުރިން ވެސް އެކަށީގެންވާ މިންވަރަށް އެކި ފަރާތްތަކާ މަޝްވަރާ ކޮށްފައި ނުވާ ކަމާއި ކުރިން ފަށާފައި ހުރި އެތައް މަޝްރޫއެއްގެ މަސައްކަތް ހުއްޓާފައި ބޭއްވުމަށްފަހު އެއްވެސް ޕްލޭނެއް ނެތި އެހެން މަޝްރޫއުތައް ހިންގަމުންދާކަން އެމްޑީޕީގެ ބަޔާނުގައި ފާހަގަކޮށްފައިވެ އެވެ.
"ދުރު ރާސްތާއަށް އަމާޒުކޮށްގެން އެކުލަވައިލާ ގައުމީ ތަރައްގީގެ ޕްލޭނެއް އޮތުމަކީ ނުހަނު މުހިންމު ކަމެއް ކަމަށް މި ޕާޓީން ގަބޫލު ކުރަމެވެ. އެހެންނަމަވެސް ގައުމީ ތަރައްގީގެ ޕްލޭނެއް އެކުލަވައިލުމުގެ ނަމުގައި ސަރުކާރުން މިހާރު އަމަލު ކުރަމުން ގެންދާ ގޮތާމެދު އިންތިހާއަށް ކަންބޮޑުވަމެވެ،" އެމްޑީޕީގެ ބަޔާނުގައި ބުންޏެވެ.
ގައުމީ ތަރައްގީގެ ޕްލޭން އެކުލަވައިލުމުގެ މަސައްކަތުގައި ބައިވެރި ނުވާން ނިންމި ސަބަބު ތަފުސީލު ކޮށްދެމުން އެ ބަޔާނުގައި ބުނީ، ގައުމީ ތަރައްގީގެ ޕްލޭނެއް އެކުލަވައިލާނީ ކުރިއަށް އޮތް 20 އަހަރަށް ކަމަށް ނިންމީ ވެސް އެެއްވެސް ބައެއް ހިޔާލާއި މަޝްވަރާ ހޯދައިގެން ނޫން ކަމަށެވެ.
އަދި އެ ސަބަބުތަކުގެ ތެރޭގައި ގައުމީ ތަރައްގީގެ ޕްލޭނެއް އެކުލަވަައިލާނެކަން މުއިއްޒު އިއުލާނު ކުރެއްވި ފަހުން ވެސް އެއްވެސް ރޭވުންތެރިކަމެއް ނެތި ރާއްޖޭގެ އެކި ކަންކޮޅުގައި އެއާޕޯޓު އެޅުމާއި އުމްރާނީ އެކިއެކި މަޝްރޫއުތައް އިއުލާނު ކުރުމާއި ފަށާފައި ނުނިމި ހުރި އެތައް މަޝްރޫއުއެއް ހުއްޓައި އަލުންބަލުން އެހެން މަޝްރޫއޫތައް ފެށުން ހިމެނޭ ކަމަށް އެމްޑީޕީން ބުންޏެވެ.
"މިގޮތުން މާލެ ސަރަހައްދުގައި ބިން ހިއްކަން ފަށާފައި ހުރި ތަންތަން ނުނިންމައި ފުށިދިއްގަރު ފަޅު ހިއްކުމަށް އެކި ގޮތްގޮތުން މަސައްކަތް ކުރަމުންދެ އެވެ. އަތޮޅު ކައުންސިލްތައް އުވައިލުމަށް އަދި ރަށްރަށުން މީހުން ބަދަލު ކުރުމަށް ވެސް ދަނީ އިއުލާނު ކުރަމުންނެވެ،" އެމްޑީޕީގެ ބަޔާނުގައި ބުންޏެވެ.
"މިހެންކަމުން ޕްލޭނެއް އެކުލަވައިލުމުގެ ބޭނުމެއް އޮތް ކަމަށް މި ޕާޓީން މިހާރު ނުދެކެމެވެ. އަދި އެކަމުގައި ސަރުކާރުގެ ހެޔޮ ނިޔަތެއް އޮތް ކަމަކަށް ވެސް ނުދެކެމެވެ."
އެމްޑީޕީން ބުނީ ސަރުކާރުން ގާނޫނުއަސާސީ އާއި ގާނޫނުތަކާ އެއްގޮތަށް އަމަލު ނުކުރުމާއި ގުޑް ގަވަނެންސްގެ އުސޫލުތަކާއި ހިލާފަށް ކަންކަން ކުރަމުން ގެންދިޔުމާއި ދައުލަތުގެ ނިޒާމުތަކަށް ހުރުމަތްތެރިކޮށް ނުހިތުން އާންމު ކަމަކަށްވެފައިވާ ކަމަށެވެ.
ތިމާވެށި ހިމާޔަތް ކުރުމުގެ ގަވާއިދުތައް ފަދަ ކުރީންސުރެ އެކަށައަޅާފައި ހުރި އުސޫލުތަކާ ހިލާފަށް ސަރުކާރުން އަމަލު ކުރަމުން ދާތީ، ގައުމީ ތަރައްގީގެ ޕްލޭނެއް އެކުލަވައިލި ނަމަވެސް އެއަށް މި ސަރުކާރުން އަމަލު ކުރާނެ ކަމުގެ ޔަގީންކަމެއް ނެތް ކަމަށް އެމްޑީޕީގެ ބަޔާނުގައި ބުންޏެވެ.
