ރާއްޖޭގެ ފުޓްބޯޅަ އަށް ގިނަގުނަ ހިދުމަތްތަކެއް ކޮށްދިން، އަލްމަރްހޫމް، އިހުސާން އަބްދުލް ގަނީ (ސާންތީ)ގެ ހަނދާނުގައި، ސޮކަ ވެޓަރަންސް އެސޯސިއޭޝަން އޮފް މޯލްޑިވްސް (ސްވޭމް) އިން އަށް އަހަރުން ދަށަށް ހާއްސަކޮށް، "މައިލޯ ސްވޭމް ޖޫނިއާސް" ގެ ނަމުގައި މުބާރާތެއް ލޯންޗްކޮށްފި އެވެ.
ގަލޮޅު ރަސްމީ ދަނޑުގައި އެކަމަށް ހާއްސަކޮށް ރޭ ބޭއްވި އިވެންޓް، ޝަރަފްވެރިކޮށްދެއްވީ، ކޮމިޝަނާ އޮފް ސްޕޯޓްސް، މުހައްމަދު ތޮލާލް އެވެ. އަދި މި އިވެންޓުގައި، ސޮކަ ވެޓަރަންސްގެ އިސް ވެރިންނާއި ސާންތީގެ އާއިލާ މެމްބަރުންގެ އިތުރުން، މައިލޯގެ އިސް ފަރާތްތައް ވަނީ ބައިވެރިވެފަ އެވެ. އަދި، ފުޓްބޯޅައިގައި ސާންތީއާ އެކު ގިނަ މަސައްކަތްތަކެއް ކުރެއްވި ފަރާތްތަކުން ވެސް ބައިވެރިވި އެވެ.
މި ހަފްތާ ބަންދުގައި ކުރިއަށްދާ "މައިލޯ ސްވޭމް ޖޫނިއާސް" މުބާރާތުގައި، 18 އެކަޑަމީ އަކުން 28 ޓީމު، ކޮންމެ ޓީމެއްގައި، 18 ކުދިން ހިމެނޭ ގޮތަށް ބައިވެރިވެފައިވެ އެެވެ.
ސޮކަ ވެޓަރަންސް އިން ބުނީ، މިއީ، ގާތްގަނޑަަކަށް 500 އެއްހާ ކުދިން ކަމަށާއި މި މުބާރާތް ރާވާފައިވަނީ އެ ހުރިހާ ކުދިންނަށް ވެސް ކުޅެވޭނެ ގޮތަށް މޮޑިފައި ކޮށްގެން، ކޮންމެ ޓީމަކަށް ވެސް، މަދުވެގެން ހަ މެޗު، ތިން ދުވަސް ތެރޭ ކުޅެން ލިބޭނެ ގޮތަކަށް ކަމަށެވެ.
ރޭ ބޭއްވި އިވެންޓްގެ ތެރެއިން ސޮކަ ވެޓަރަންސްގެ ރައީސް އައްޔަ ވާހަކަ ދައްކަވަނީ،--- ފޮޓޯ: އަތޫފް އާތިފް / އަދަދު ސްޕޯޓްސް
ސޮކަ ވެޓަަރަންސްގެ ރައީސް، އަލީ ޝަމީމް (ކޮޔަރު އައްޔަ) ވިދާޅުވީ، މައިލޯ ސްވޭމް ޖޫނިއާސްގެ އެންމެ ބޮޑު އެއް އަމާޒަކީ ތުއްތު ކުދިންނަށް، އެ ކުދިންގެ ހުނަރު ދައްކާލުމުގެ ފުރުސަތު ދިނުމާއި އެ ކުދިންގެ ހިތްތަކުގައި ފުޓްބޯޅަ އަށް ލޯބި ޖައްސައި، ފުޓްބޯޅަ އަށް ގިނަ ކުދިން ނެރެދިނުން ކަމަށެވެ.
"އެ ގޮތުން، އަޅުގަނޑުމެން 2012 ވަނަ އަހަރުން ފައްޓައިގެން، ކޮންމެ އަހަރަކު ވެސް އެކިއެކި އުމުރުފުރާތަކަށް މުބާރާތްތައް ބާއްވަމުން މި ގެންދަނީ. އަޅުގަނޑުމެން ބޭނުންވަނީ އެ ކުދިން އެ ފަރިތަކުރުންތަކުގައި ދަސްކުރާ ހުރިހާ އެއްޗެހި އެ ކުދިންގެ ބެލެނިވެރިންނަށް ދައްކާލުން އެ ކުދިން ކުރިއަރާނެ މަގު ހޯދައިދިނުން،" އައްޔަ ވިދާޅުވި އެވެ.
ސޮކަ ވެޓަރަންސް އިން ކޮންމެ އަހަރަކު ތިން އުމުރުފުރާ ނޫނީ ހަތަރު އުމުރުފުރާ އަށް މުބާރާތްތައް ބާއްވަމުން ގެންދެ އެވެ. އެ ގޮތުން، މައިލޯ ސްވޭމް ޖޫނިއާސް އަކީ މުޅިން އާ އުމުރުފުރާ އަކަށް، ސާންތީ ކޯޗު، ފުޓްބޯޅަ އަށް ކޮށްދީފައިވާ ގިނަގުނަ މަސައްކަތްތައް ފާހަގަކުރުމުގެ ގޮތުން، ތުއްތު ކުދިންނަށް ބޭއްވޭ މުބާރާތެއްކަން އައްޔަ ފާހަގަކުރެއްވި އެވެ.
"މި މުބާރާތްތައް ރާވާލައިގެން، ކުރިއަށްގެންދާ އެންމެ ބޮޑު މަގުސަދަކީ، އެ ތުއްތު ކުދިން ބޮޑުވެގެން، އަންނައިރުގައި އެކުދިންނަށް ވާދަވެރި މުބާރާތްތަކެއް ކުޅެން ޖެހޭއިރު، އެ މުބާރާތްތަކުގެ "ފީލް" ގެނެސްދިނުމުގެ ގޮތުންނާއި އެ ކުދިންނަށް ފުޓްބޯޅަ މެޗަކީ ކޮބައިކަން ބުނެދީ، ރެފްރީންނާއި ސަޕޯޓަރުންނާ އެކު ކުޅެގެން ކަންކަން ދަސްކޮށްދިނުން ކަމަށާއި މިއި ވާދަވެރިކޮށް ކުޅުވަން ބޭނުންވާ މުބާރާތްތަކެއް ނޫން. މުބާރާތް ވާދަވެރި ވަނީ ކޯޗުންނާއި ބެލެނިވެރިން މާ ބޮޑަށް މީގެ ތެރެއަށް ވަދެ، މޮޅުވާން މަސައްކަތް ކުރާތީވެ،" އައްޔަ ވިދާޅުވި އެވެ.
މުބާރާތުގައި ބައިވެރިވެފައިވާ އެކަޑަމީތަކަކީ، މާޒިޔާ ފުޓްބޯލް އެކަޑަމީ، ކްލަބް ވެލެންސިއާ، އެސްޕަޔާ އެކަޑަމީ، އޮޑި ސްޕޯޓްސް އެކަޑަމީ، ބީޖީ އެކަޑަމީ، ބިސް ބުރު ސްޕޯޓްސް އެކަޑަމީ، ފްރެންޑް ފުޓްބޯލް ފެމިލީ އެކަޑަމީ، ހުޅުމާލެ ސްޕޯޓްސް ސްކޫލް، ފޭސް ޓޫ ސޮކަ އެކަޑަމީ، އާޖީލަކަށް އޭދަފުށި ފުޓްބޯލް އެކަޑަމީ، ޔުނައިޓެޑް ވިކްޓަރީ، އެޑްވެންޗާސް ފުޓްބޯލް އެކަޑަމީ، ދި ސްޓާސް އެކަޑަމީ، އައުއާ ދަނގެތި ފުޓްބޯލް އެކަޑަމީ، ވިލިމާލެ ޔުނައިޓެޑް، ސަސް އެކަޑަމީ، އަޝްފާގު އެކަޑަމީ އަދި މޯލްޑިވްސް ސޮކަ މޭޓްސް (އެމްއެސްއެމް) އެވެ.
ރޭ ބޭއްވި އިވެންޓްގެ ތެރެއިން ލަންކާ ނެސްލޭ ލިމިޓެޑްގެ މެނޭޖިން ޑިރެކްޓަރު، ބާނާޑް، މުބާރާުތުގެ ތަށި ހިފައިގެން.---- ފޮޓޯ: އަތޫފް އާތިފް / އަދަދު ސްޕޯޓްސް
ލަންކާ ނެސްލޭ ލިމިޓެޑްގެ މެނޭޖިން ޑިރެކްޓަރު، ބާނާޑް ސްޓެފާން ވިދާޅުވީ، ޔޫތު ފުޓްބޯޅައިގެ މި ވަރުގެ މަސައްކަތެއް ފަށާއިރު މީގެ ބައިވެރިވުމަކީ ލިބޭ ފަހުރެއް ކަމަށެވެ. އަދި މި މުބާރާތުގެ އަލީގައި ރާއްޖޭގެ ފުޓްބޯޅަ އަށް ލެގަސީ އެއް ދޫކޮށްލި ފަރާތެއް ކަމަށްވާ ސާންތީ ކޯޗުގެ ހިދުމަތުގެ ހަނދާންތައް ދިރުވުމަކީ، ފުޓްބޯޅަ އަށް ކޮށްދޭ މުހިންމު ކަމެއްގެ ގޮތުގައި ބާނާޑް ފާހަގަކުރެއްވި އެވެ.
"ސާންތީ ދަންނަ މީހުން ކައިރިން އަހަރެން ހޯދި މައުލޫމާތުތަކަށް ބަލާއިރު، އޭނާގެ ހިދުމަތް ދިވެހި ފުޓްބޯޅައިގައި އޮތީ މޮޅުވި މެޗުތަކާއި ހޯދި ޓްރޮފީތަކަށް ވުރެ މާ އުހުގައި ކަން. ރަނގަޅު ހުނަރު ދެނެގަނެ، އެ ކުޅުންތެރިން ކުރިއަރުވައި، ރާއްޖޭގެ ފުޓްބޯޅަ އަށް ނެރެދިނުމުގައި، ކުޅުންތެރިން ބިނާކުރުން ދަނޑުމަތީގަޔާއި ދަނޑުން ބޭރުގައި ވެސް މިސާލެއްގެ ގޮތުގައި އަދާކުރި. ދެން، މައިލޯއާ ގުޅިގެން ވެސް ފުޓްބޯޅައިގެ ޑިވެލޮޕްމަންޓަށް ގިނަގުނަ މަސައްކަތްތަކެއް ކޮށްފައިވޭ. ސާންތީގެ ފަރާތުން ވެސް ދަސްވީ ފުޓްބޯޅަ އަކީ ކުޅިވަރަށް ވުރެ ބޮޑު ކަމެއްކަން،" ބާނާޑް ވިދާޅުވި އެވެ.
މި އިވެންޓްގައި ވާހަކަ ދައްކަވަމުން، ކޮމިޝަނާ އޮފް ސްޕޯޓްސް ތޮލާލް ވިދާޅުވީ، މި މުބާރާތް ހާއްސަކުރެވިފައިވާ މަޝްހޫރު ފުޓްބޯޅަ ކޯޗު ސާންތީގެ ހަނދާން އޭނާ އާ ކުރަނީ، ފުޓްބޯޅަ އަށް ވުރެން ބޮޑަށް މުޅި ރާއްޖޭގެ ކުޅިވަރަށް ހިދުމަތްކޮށްދެއްވި ފަރާތެއްގެ ގޮތުގައި ކަމަށެވެ. އަދި، ސާންތީގެ ހަނދާނުގައި މި ފަދަ ކަމެއް ކުރެވޭތީ، މި ކަމުގައި ޝާމިލުވާ ފަރާތްތަކަށް ޝުކުރު އަދާ ކުރާ ކަމަށާއި ސާންތީ އަކީ "ރިޕްލޭސް" ކުރެވޭނެ ފަރާތެއް ނޫން ކަމަށް ތޮލާލް ފާހަގަކުރެެއްވި އެވެ.
