ފުށިދިއްގަރުފަޅުގައި ހިއްކާ ރަސްމާލެ އާއި މާލެ ކަނޑު އަޑީގެ ޓަނަލަކުން ގުޅާލުމުގެ ބިޔަ މަޝްރޫއުގެ ފަންނީ އަދި އިނޮވޭޓިވް މަސައްކަތް ފެށިފައިވާ ކަމާއި ގާބިލް ކުންފުނިތަކާ އެކީގައި ފީސިބިލިޓީ ހެދުމުގެ މަސައްކަތް ވެސް ފަށާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައި ވިޔަސް، އެފަދަ މަސައްކަތްތަކެއް ކުންފުންޏަކާ ހަވާލުކޮށްގެން ކުރިޔަށް ނުދާކަން އިންފްރާސްޓަރަކްޗާ މިނިސްޓްރީން ބުނެފި އެވެ.
މާލެ-ރަސްމާލެ ޓަނަލްގެ ފީސިބިލިޓީ ހަދަން ހަވާލުކޮށްފައިވަނީ ކޮން ކުންފުންޏަކާތޯ އޮޅުންފިލުވުމަށް ގާނޫނީ ވަކީލު އަހުމަދު މައުރޫފު ހުށަހެޅި ސުވާލަށް މިނިސްޓްރީން އިއްޔެ ދިން ޖަވާބުގައި ވަނީ ޓަނަލްއާ ގުޅޭ ޑެސްކް ސްޓަޑީގެ މަސައްކަތާއި، ޑީޓެއިލް އެސެސްމަންޓު އަދި ފީސިބިލިޓީ ރިޕޯޓް ހެދުމަށް ކޮންސަލްޓެންޓެއް ހޯދަން ބޭނުންވާ ރިކުއާމެންޓް ތައްޔާރުކުރުމުގެ މަސައްކަތް ކުރިއަށްދާ ކަމަށެވެ.
"[މިކަންކަމުގައި] މަޝްވަރާ ކުރެވެމުން ދަނީ މިނިސްޓްރީއާއެކު އެކި މަޝްރޫއުތަކުގައި މަސައްކަތްކުރައްވާ ކޮންސަލްޓެންޓުންނާ އެވެ. ވަކި ކުންފުންޏަކާއި މަސައްކަތް ހަވާލުކުރެވިފައެއް އަދި ނުވެއެވެ،" އިންފްރާސްޓަރަކްޗާ މިނިސްޓްރީން ބުނެފައިވެ އެވެ.
އެހެންވެ، ފީސިބިލިޓީ ހެދުމުގެ މަސައްކަތް ކުންފުނިތަކާއެކު ކުރަމުންދާކަމަށް ރައީސް ވިދާޅުވެ، ޖެނުއަރީ 22، 2024 ގައި ރައީސް މުއިއްޒު ހެއްދެވީ ދޮގެއްކަން މިނިސްޓްރީން ދިން މި ޖަވާބުން އެނގެ އެވެ.
"އެ ޓަނަލް ވެގެންދާނީ، އެ ޓަނަލްގައި ދުއްވާ ޓްރެއިންގެ ސަބަބުން، ޓްރެއިންގައި ދާއިރުގައި ކަނޑުއަޑީގެ ރީތި މަންޒަރުތައްވެސް ފެންނަ ޓަނަލަކަށް. އެ މަސައްކަތް ކުރުމަށްޓަކައި އަޅުގަނޑުމެން އެކަމުގެ ގާބިލްކަން ހުރި ކުންފުނިތަކާ އެކީގައި މިހާރު ވަނީ ފީސިބިލިޓީ މަސައްކަތް ފަށާފައި،"ރައީސް މުއިއްޒު ވިދާޅުވެފައިވެ އެވެ.
"މިއީ ޓޫރިޒަމްގެ ބޮޑު މަޝްރޫއެއް. މިއީ، ރާއްޖެއަށް ޓޫރިސްޓުން އެތައް ގުނަޔަކަށް އިތުރުވާނެ މަޝްރޫއެއް. އަޅުގަނޑުމެން ކުރާނީ ދެކޮޅުޖެހޭ މަސައްކަތް."
ނަމަވެސް މި މަޝްރޫއުއަކީ "ހަނދަށް ދިޔުން ފަދަ" ބޮޑު މަޝްރޫއުއެއް ކަމަށް އިންފްރާސްޓްރަކްޗާ މިނިސްޓަރު އަބްދުﷲ މުއްތަލިބު ސިފަ ކުރައްވާފައިވެ އެވެ.
އޮކްޓޯބަރު 28، 2024 ގައި ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މުއްތަލިބު ވިދާޅުވީ، ފުށިދިއްގަރުފަޅު ނުވަތަ ރަސްމާލެއާ ހަމައަށް ޓަނަލެއް އެޅުމަކީ މީގެ ކުރިން ދުނިޔޭގައި ކޮށްފައި ނުވާ ފަދަ ބޮޑު މަސައްކަތެއް ކަމަށެވެ.
"މިވަގުތު ދުނިޔޭގެ އެއްވެސް ތަނެއްގައި، އޯޕަން ސީގައި ހަދާފައި އޮތް ކަހަލަ އިންފްރާސްޓްރަކްޗާއެއްގެ ވާހަކައެއް ނޫން މި ދައްކަނީ. ތިބޭފުޅުންނަށް އެނގިވަޑައިގަންނަވާނެ އެމެރިކާއިން ހަނދަށް ދިޔުމަށް ވެސް ޖޯން އެފް ކެނެޑީ އެންވިޝަން ކުރެއްވީ އެއްވެސް ބަޔަކު ހަނދަށް ގޮސްގެނެއް ނޫން،" މިނިސްޓަރު ވިދާޅުވި އެވެ.
މުއްތަލިބު ވިދާޅުވީ އެ ޓަނަލް އެޅުމުގެ މަސައްކަތަކީ ޓައިމްލައިނެއް ހަދައިގެން ކުރިއަށް ގެންދެވޭނެ ޕްރޮޖެކްޓެއް ނޫނެވެ. އޭނާ ވިދާޅުވީ އެއީ އެއަށްވުރެ މާ އާދަޔާ ހިލާފު މަސައްކަތެއް ކަމަށެވެ.
"އެކަން ހާސިލް ކުރުމަށްޓަކައި އަޅުގަނޑުމެން މަސައްކަތް ކުރާނަން، އެހެންނަމަވެސް އެއީ ޓައިމްލައިނެއް ލައިގެން މިކަން ކުރެވޭނެ ނުކުރެވޭނެ ތާރީހެއް ދީގެން ކުރަން އޮތް ކަހަލަ ކަމެއް ނޫން. އެއީ އެއަށްވުރެ މާ ބޮޑު، މާ އާދަޔާ ހިލާފު ކަމެއް،" މުއްތަލިބު ވިދާޅުވި އެވެ.
މާލެ އާއި ފުށިދިއްގަރުފަޅާ ދެމެދު ގާތްގަނޑަކަށް 16 ކިލޯމީޓަރު ހުންނައިރު، އެ ދެމެދުގެ ކަނޑު އަޑީގެ ފުންމިނުގައި 400-500 މީޓަރު ހުރެ އެވެ.
