ދިވެހިރާއްޖޭގައި ސިނގިރޭޓު ވިއްކަނީ އެމަނިކުފާނާ ފިކުރު ދިމާނުވާ ވިޔަފާރިވެރިން ކަމަށް ވިދާޅުވެ، ސިނގިރޭޓު ނުވިއްކައި "އެހެން ކަމަކާ އުޅެން" ރައީސް ގޮވައިލެއްވުމުން އެމަނިކުފާނަށް ފާޑުކިޔުން އަމާޒުވެއްޖެ އެވެ.
ދުންފަތަކީ ރާއްޖޭގައި ހުއްދަ އެއްޗެކެވެ. އޭގެ ވިޔަފާރި ކުރަން ދައުލަތުގެ އިދާރާތަކުން ހުއްދަ ދެ އެވެ. އަދި އެއީ އެންމެ ބޮޑު ޓެކުހެއް ދައްކާ އެއް ވިޔަފާރި އެވެ.
ރައީސްގެ ވާހަކައަށް ފާޑުކިޔަމުން އިދިކޮޅު އެމްޑީޕީއަށް ނިސްބަތްވާ ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވީ، އެ ވާހަކަތަކުން ހާމަވީ ރައީސް އަހުލާގީ ފެންވަރާއި ހަމަހަމަކަމާއެކު ވެރިކަން ކުރުމުގެ ގާބިލްކަން ނެތްކަން ކަމަށެވެ.
"މަނިކުފާނާއި ސިޔާސީ ފިކުރު ތަފާތު ވާ މީހުން ދެން ވިޔަފާރި ވެސް ނުކުރަންވީ! ގާނޫނާއި ގަވާއިދުގެ ތެރެއިން، ސަރުކާރަށް ޓެކްސް ދައްކަމުންދާ ބަޔަކާއި މެދު ތިގޮތަށް ވާހަކަ ނުދެއްކޭނެ. ތީގެއިން ދައްކުވައިދެނީ މަނިކުފާނުގެ އަހްލާގީ ފެންވަރު. ކޮލިޓީއެއް ނެތްކަން. ގައުމުގެ އެންމެންނަށް ހަމަހަމަކޮށް، އިންސާފުވެރި ވެރިކަމެއް ކުރުމަށް މަނިކުފާނު ނުކުޅެދިފައިވާކަން. ސަރުކާރެއް ހިންގުމުގެ ގާބިލްކަމެއް މަނިކުފާނުގެ ނެތް! ރައީސްކަން ދޫކޮށްލާ އެހެންކަމަކާއި އުޅެންވީ،" އޭނާ ވިދާޅުވި އެވެ.
ރައީސްގެ ވާހަކައަށް މުހައްމަދު ނަސީމް (ނަފާ ނަސީމް) ވެސް ފާޑުކިޔެވެ. ނަސީމަކީ ކުރިން އެމްޓީސީސީގެ ވެރިއަކަށް ހުންނެވި ވިޔަފާރީގެ ދާއިރާއިން ތައުލީމު ހާސިލު ކުރައްވާފައިވާ ބޭފުޅެކެވެ.
"ސިނގިރޭޓު ވިއްކަނީ ސަރުކާރާ އިދިކޮޅުމީހުންނޭ އަދި އެމީހުން ސަރުކާރާ އިދިކޮޅު ހަރަކާތްތަކަށް ފަންޑުކުރެޔޭ ... މިހެން ބަޔަކަށް ތުހުމަތުކޮށް އިލްޒާމު އެޅޭ ގޮތަށް، ގައުމުގެ ރައީސްގެ ދޫފުޅުން މީޑިޔާގައި މިހެން ވިދާޅުވުމަކީ ވަރަށް ދެރަ ކަމެއް އަދި ގޯސް ވެސް ކަމެއް،" އޭނާ ވިދާޅުވި އެވެ.
ރައީސް މިހާރު ގެނެސްދޭ ޕޮޑްކާސްޓެއްގައި ވާހަކަ ދައްކަވަމުން މިއަދު ވިދާޅުވީ ސިނގިރޭޓުގެ ވިޔަފާރި ދޫކޮށް އެހެން ކަމަކައި އުޅެން އެމަނިކުފާނު ގޮވައިލައްވާ ކަމަށެވެ.
"އަޅުގަނޑު އެދެން ސިނގިރޭޓު އެތެރެކޮށް ސިނގިރޭޓު ވިޔަފާރިކުރާ މީހުންނަށް އެ ވިޔަފާރި ދޫކޮށްލަން. އެހެން ކަމަކައިގެން އުޅެން. މިއީކީ ކުރާވަރުގެ ކަމެއް ނޫނޭ. މިއީ ކުޑަކުޑަ ގައުމެއް. މިއީކީ މިލިއަނުން މިލިއަނުން މީހުން އުޅޭ ތަނެއް ނޫން. ކީއްކުރަން މިތާނގައި އެކަން ކުރަންވީކީއެއް. އަޅުގަނޑުމެން ކުޑަ މުޖުތަމައު ސަލާމަތްކުރިއްޔާ މާ ރަނގަޅެއްނު މިކަމުން،" އެމަނިކުފާނު ވިދާޅުވި އެވެ.
އެއަށްފަހު ރައީސް މުއިއްޒު ތުހުމަތު ކުރެއްވީ ސިނގިރޭޓު ވިއްކަނީ އެމަނިކުފާނާ ފިކުރު ދިމާނުވާ މީހުން ކަމަށެވެ. އަދި ސަރުކާރާ ދެކޮޅަށް މުޒާހަރާ ކުރަން ސިނގިރޭޓު ވިއްކާ މީހުން ފަންޑު ކުރާ ކަމަށް ވެސް ރައީސް ތުހުމަތު ކުރެއްވި އެވެ.
"ދެން އަޅުގަނޑު ބަލައިލާއިރުގައި، ސިނގިރޭޓު ވެސް ވިއްކުމުގައި މިއުޅެނީ އަޅުގަނޑުމެންނާ އިދިކޮޅު ފިކުރުގެ މީހުންގެ މީހުން އިނގޭތޯ. އެ މީހުން މި މުޒާހަރާތަކަށް ވެސް އެބަ އެހީދޭ،" ރައީސް ވިދާޅުވި އެވެ.
