މެޑްރިޑް (ޖެނުއަރީ 7) - އާޑާ ގުލާގެ ދެ ގޯލާ އެކު، 5-0 އިން ހަތަރު ވަނަ ޑިވިޝަނުގެ ޑިޕޯޓިވާ މިނޭރާ ބަލިކުރުމަށް ފަހު، ރެއާލް މެޑްރިޑުން ސްޕެނިޝް ކަޕް (ކޮޕަ ޑެލް ރޭ)ގެ ގަދަ 16 އިން ޖާގަ ހޯދައިފި އެވެ.
ރެއާލުން މި މެޗުގައި ކުޅުނީ ޓީމުގެ ބައެއް މުހިންމު ކުޅުންތެރިން ނުލަ އެވެ. އެ ގޮތުން ޖޫޑް ބެލިންހަމް އަށް ވަނީ އަރާމުކުރަން ފުރުސަތު ދީފަ އެވެ. ބެލިންހަމް އަކީ ލީގުގައި އެންމެ ފަހުން ރެއާލް ކުޅުނު މެޗުގައި ފަހު ވަގުތު އެ ޓީމު މޮޅުކޮށްދިން ލަނޑު ޖަހައިފަ އެވެ.
ހަތަރު ވަނަ ޑިވިޝަނުގެ މިނޭރާއާ ދެކޮޅަށް ކުޅުުނު މެޗުގައި ރެއާލްގެ ކޯޗު ކާލޯ އަންޗެލޮޓީ ވަނީ އެ ޓީމުން މެޗުތަކުގައި ފުރުސަތު ނުލިބި ތިބި ގިނަ ކުޅުންތެރިން ބޭނުންކޮށްފަ އެެވެ. އޭގެ ތެރެއިން މި ފުރުސަތުގެ ބޭނުން އެންމެ ރަނގަޅަށް ހިފީ ގުލާ އެެވެ. މިއީ މި ސީޒަނުގައި އޭނާގެ ފަރާތުން އެންމެ ރަނގަޅު ކުޅުމެއް ފެނިގެންދިޔަ މެޗެވެ.
ތުރުކީގެ ތަރި ގުލާގެ އިތުރުުން، ރެއާލްގެ ލަނޑުތައް ޖެހީ ފެޑެރީކޯ ވަލްވޭޑޭ އާއި އެޑުއާޑޯ ކަމަވިންގާ އަދި ލޫކަ މޮޑްރިޗް އެވެ.
ވިހި ފަހަރު ސްޕެނިޝް ކަޕްގެ ޗެމްޕިއަންކަން ހޯދި ރެއާލުން އެންމެ ފަހުން މި މުބާރާތުގެ ތަށި އުފުލާލީ 2023 ވަނަ އަހަރު އެވެ. މިދިޔަ ސީޒަނުގައި ރެއާލް މި މުބާރާތުން ކެޓީ އެތުލެޓިކޯ މެޑްރިޑް އަތުންނެވެ. އެއީ މި މުބާރާތުގެ ގަދަ 16 ބުރުގަ އެވެ.
