ވަގު ލިޔުންތަކެއް ހުށަހަޅައިގެން ހުޅުމާލޭ ފޭސް ދޭކުން ގޯއްޗެއް ހޯދަން އުޅުނު މައްސަލައިގައި ތުހުމަތުކުރެވޭ އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލު ރަޝީދު ސަސްޕެންޑުކުރަން އެ ކުންފުނިން މިއަދު ނިންމައިފި އެވެ.
އެމްޑަބްލިއުއެސްސީން މީޑިއާތަކަށް ފޮނުވި މެސެޖެއްގައި ބުނީ ފަޒީލު ސަސްޕެންޑުކުރީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ގުޅިގެން ފުލުހުން ކުރިއަށް ގެންދާ ތަހުގީގަށް ޖާގަދީ ފުރިހަމައަށް ޖާގަ ދިނުމުގެ ގޮތުން ކަމަށެވެ. އޭނާ ސަސްޕެންޑުކުރީ ހުރިހާ ޒިންމާތަކަކުން ވަކިކޮށް އޮފީހަށް ނުނިކުމެވޭ ގޮތަށެވެ.
ފަޒީލްއަކީ މިހާރު ފެންމަތިވެގެން އުޅޭ މައްސަލައިގައި ހިމެނޭ ގޯތީގެ ވަށާ ފާރު ރާނަން އެދި އެޗްޑީސީއަށް ހުށަހެޅި ދެ މީހުންގެ ތެރެއިން އެކަކެވެ. އެޗްޑީސީން މި މައްސަލައިގައި ހައުސިން މިނިސްޓްރީއަށް ސިޓީއެއް ފޮނުވީ އެއް ލޮޓު ނަންބަރެއްގެ ވަށާ ފާރު ރާނަން އެދި ދެ މީހަކު ހުށަހެޅުމުން، ބިންވެރިޔާ ސްކީމުގެ ދަށުން އެ ގޯތީގެ އަސްލު ވެރިފަރާތަކީ ކާކުކަން ސާފުކުރާށެވެ.
ސިޓީގެ ޖަވާބުގައި ހައުސިންއިން ބުނީ އެ ގޯއްޗަކީ އެ މިނިސްޓްރީން ހިންގި ސްކީމުގެ ދަށުން އެއްވެސް މީހަކަށް ދޫކޮށްފައިވާ ގޯއްޗެއް ނޫން ކަމަށެވެ. އެޗްޑީސީން މައުލޫމާތު ސާފުކުރަން ހުށަހެޅި އެހެން ގޯއްޗެއް ވެސް އެއީ އެ ސްކީމުގެ ދަށުން ދޫކޮށްފައިވާ ގޯއްޗެއް ނޫން ކަމަށް ހައުސިންއިން ބުނެފައިވެ އެވެ.
މައްސަލަ ޖެހިގެން އުޅޭ ގޯތީގެ ވަށާ ފާރު ރޭނުމުގެ ހުއްދަ ނުދޭ ކަމަށް އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ތަކުރާރުކޮށް ވިދާޅުވި ނަމަވެސް އެ ގޯތީގައި ހުރީ ވަށާ ފާރު ރާނާފަ އެވެ. މިހާތަނަށް "އަދަދު" އަށް ލިބުނު މައުލޫމާތުން އެނގޭ ގޮތުގައި އެ ތަނުގެ ވަށާ ފާރު ރޭނީ ފަޒީލް ރަޝީދެވެ. ނަމަވެސް މިކަން އަދި ރަސްމީ މަސްދަރަކުން ކަށަވަރެއް ނުކޮށްދެ އެވެ.
ފަޒީލް ރަޝީދަކީ ބިންވެރިޔާ ސްކީމުގެ ދަށުން ގޯއްޗަކަށް އެދި ހުށަހެޅި މީހެކެވެ. ނަމަވެސް އޭނާއަކީ ކުރިން ހިންގި ބޯހިޔާވަހިކަމުގެ ސްކީމެއްގެ ދަށުން ބޯހިޔާވަހިކަމެއް ލިބިފައިވާ މީހަކަށް ވާތީ، އޭނާގެ ޝަރުތު ހަމަނުވާ ކަމަށް އޮތީ ނިންމާފަ އެވެ.
