މިއަދު މާލޭގައި ހިނގި އަލިފާނުގައި ހާދިސާގައި އޮފީސް އިމާރާތްތައް އަނދާ ހުލިވެ ގެއްލުން ލިބުނު ތިން ވުޒާރާގެ މަސައްކަތްތައް ވަގުތީގޮތުން ދަރުބާރުގެއަށް ބަދަލުކުރަން ސަރުކާރުން ނިންމައިފި އެވެ.
ހައުސިން އަދި އިންފްރާސްޓްރަކްޗާ މިނިސްޓްރީގެ ހިންގާ ޓިނު އިމާރާތުގައި ރޯވި މި އަލިފާންގަނޑު ޖެހިގެން ހުރި ގްރީން ބިލްޑިންގުގައި ހިންގާ އެންވަޔަރަމަންޓުގެ އޮފީހަށްވެސް ވަނީ ގެއްލުން ލިބިފަ އެވެ. ޓިނު އިމާރާތް ވަނީ އަނދާ ހުލިވެފަ އެވެ.
މި ހާދިސާއާ ގުޅިގެން، ވުޒާރާތަކުގެ މަސައްކަތް ހުއްޓިފައިވާކަން މިއަދު ވަކިވަކީން ނެރުނު ބަޔާންތަކުގައި ބުނެފައިވެ އެވެ.
ސަރުކާރުގެ އިސް އޮފިޝަލަކު މި ނޫހަށް މައުލޫމާތު ދެއްވި ގޮތުގައި ސަރުކާރުން މިހާރު ވަނީ އެ ތިން ވުޒާރާގެ މަސައްކަތް ދަރުބާރުގެއަށް ބަދަލުކުރަން ނިންމާފަ އެވެ. އެކަމަށް އެ އިމާރާތުގެ ހޯލުތައް ތައްޔާރުކުރުމުގެ މަސައްކަތް މިރޭ ފަށާނެ ކަމަށްވެ އެވެ.
ސަރުކާރުން މަަސައްކަތް ކުރަނީ އަންނަ ހަފުތާގެ ރަސްމީ ދުވަސްތައް ފެށެންވާއިރަށް ދަރުބާރުގޭގައި ވަގުތީ އޮފީސް ސެޓަޕްތައް ގާއިމުކޮށް އަލުން މަސައްކަތް ފެށުމައް ކަމަށްވެސް މައުލޫމާތު ލިބިފައިވެ އެވެ.
މި ހާދިސާއާ ގުޅިގެން ވުޒާރާގެ މަސައްކަތްތައް ބަދަލުކުރަން ނިންމުމާއެކު މާދަމާ ރޭ ދަރުބާރުގޭގައި ބޭއްވުމަށް ހަމަޖެހިފައި އޮތް މަސްވެރިންގެ ދުވަހުގެ ޖަލްސާވެސް މިހާރު ވަނީ ފަސްކޮށްފަ އެވެ. އެ ޖަލްސާ ދެން ބާއްވާނެ ތާރީހެއް އަދި ނުނިންމަ އެވެ.
މިއަދު ހެދުނު ރޯވި އަލިފާންގަނޑުގެ ބޮޑު ބައެއް ނިއްވާލާ ކޮންޓްރޯލްކޮށްފައިވާއިރު، އަދިވެސް އެ ދެ އިމާރާތުގެ އެކި ތަންތަނުގައި ދަނީ ދޭތެރެ ދޭތެރެއިން ރޯވަމުންނެވެ. އެ ސަރަހައްދު ބަންދުކޮށް ފުލުހުންނާއި ސިފައިން އަދިވެސް ދަނީ ހަރަކާތްތެރިވަމުންނެވެ.
