އިންޑޮނޭޝިއާގެ ބަތަމްގައި މިހާރު ކުރިއަށްދާ 56 ވަނަ އޭޝިއާ ބޮޑީބިލްޑިން އެންޑް ސްޕޯޓްސް ފިޒީކް ޗެމްޕިއަންޝިޕް މުބާރާތުން ރާއްޖޭގެ އަޒްނީން ރަޝާދު ރަން މެޑަލް ހޯދައި، ޖެހިޖެހިގެން ތިން ވަނަ އަހަރު އެ ކާމިޔާބީ ތަކުރާރުކޮށްފި އެވެ.
އަޒްނީން، ރަން މެޑަލް ހޯދީ އޭނާގެ ހާއްސަ އިވެންޓް ކަމަށްވާ، ސްޕޯޓްސް ފިޒީކްގެ 170 ސެންޓިމީޓަރު ކެޓަގަރީންނެވެ. އަޒްނީން ވަނީ އެންމެ ފަހުން، 2022 ވަނަ އަހަރު މާލޭގައި ބޭއްވި އޭޝިއާ މުބާރާތާއި މިދިޔަ އަހަރު ނޭޕާލުގައި ބޭއްވި އޭޝިއާގެ ބޮޑީބިލްޑިން މުބާރާތުން ވެސް ރަން މެޑަލް ހޯދައިފަ އެވެ.
އަޒްނީން މި ހޯދީ މި ފަހަރުގެ އޭޝިއާ މުބާރާތުގައި ރާއްޖެ އަށް ލިބުނު ދެ ވަނަ މެޑަލް އެވެ. އިއްޔެ، ރާއްޖޭގެ ޝާހީން އިބްރާހިމް ދީދީ (ޝާންޓެ) ވަނީ މި މުބާރާތުގެ 60 ކިލޯ ކެޓަގަރީން ރިހި މެޑަލެއް ހޯދައިފަ އެވެ.
އޭޝިއާ މުބާރާތުން މީގެ ކުރިން ރާއްޖޭގެ ދެ އެތުލީޓަކު ރަން މެޑަލް ހޯދި އެވެ. އެއީ، 2017 ވަނަ އަހަރުގެ މުބާރާތުގައި ޝާހީން އާއި 2022 ވަނަ އަހަރުގެ މުބާރާތުގައި މުހައްމަދު މޫސާ (މޯޑް) އެވެ.
އެންމެ ފަހުން ބޭއްވި މޯލްޑިވްސް ސްޕޯޓްސް އެވޯޑްސްގައި އެންމެ މޮޅު އެތުލީޓުގެ މަގާމު ހޯދި އަޒްނީން ވަނީ އޭނާގެ ހާއްސަ ކެޓަގަރީން ވޯލްޑް ޗެމްޕިއަންޝިޕްގައި ވެސް ދެ ފަަހަރު ރަން މެޑަލް ހޯދައިފަ އެވެ.
މީގެ އިތުރުން، ދެކުނު އޭޝިއާގެ ބޮޑީބިލްޑިން ޗެމްޕިއަންޝިޕްގެ ފިރިހެނުންގެ 170 ސެންޓްމީޓަރު ސްޕޯޓްސް ފިޒީކް ކެޓަަގަރީން ޖެހިޖެހިގެން ތިން ފަހަރަށް ރަން މެޑަލް ހޯދައި، އަޒްނީން ވަނީ ރެކޯޑެއް ވެސް ހަދައިފަ އެވެ.
