މުމްބާއި، އިންޑިއާ (އޮގަސްޓް 2) - ދުނިޔޭގެ ނިސްބަތުން ބޮޑު އާބާދީއެއް އޮތް އިންޑިއާ އަށް ދުނިޔޭގެ އެންމެ ބޮޑު ކުޅިވަރު ހަރަކާތް އޮލިމްޕިކްސް އިން މަދު އަދަދެއްގެ މެޑަލް ލިބޭ އެންމެ ބޮޑު ސަބަބަކީ ރަަނގަޅު ވަގުތުގައި ހުނަރު ދެނެގަނެ، އެ ޑިވެލޮޕްކުރަން މަސައްކަތް ނުކުރުން ކަމަށް، އިންޑިއާގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ، ސުނިލް ޗެތުރީ ބުނެފި އެވެ.
ދާދި ފަހުން، އިންޑިއާ ގައުމީ ޓީމަށް ކުޅުން ހުއްޓާލި ޗެތުރީ، 39، އިންޑިއާގެ ޔޫޓިއުބް އިންފްލުއެންސަރު، ރާޖު ޝަމާނީގެ ޕޮޑްކާސްޓް ޝޯ، "ފިގަރިން އައުޓް"ގައި ދެއްކި ވާހަަކަތަކަށް މިހާރު އަންނަނީ ގިނަ ބަޔެއްގެ ސަމާލުކަން ލިބެމުންނެވެ.
އެ ގޮތުން، ޗެތުރީ އަށް އަމާޒުވި ސުވާލަކީ، އިންޑިއާ އަށް އޮލިމްޕިކްސްގައި ނިސްބަތުން މަދު މެޑަލް ލިބޭ ސަބަބަކީ ކޮބައިތޯ، ޗެތުރީގެ ނަޒަރުގައި ކިޔައިދިނުމަށެވެ.
"އަހަރެމެން ކީއްވެތޯ މެޑަލް ނުހޯދެނީ (އޮލިމްޕިކްސްގައި)، 1.5 ބިލިއަން މީހުންގެ އާބާދީއެއް އޮވެ ވެސް. މިއީ މި ނަމްބަރަށް ބަލައިގެން ދައްކަންވީ ވާހަަކައެއް ނޫން. ފެކްޓަށް ބަލައިގެން ދައްކަންވީ ވާހަކައެއް. ހަގީގަތަކީ އަހަރެމެން ރަނގަޅު ވަގުތުގައި، މި 1.5 ބިލިއަން މީހުންގެ ތެރޭގައި ތިބި ހުނަރު ދެނެގަނެ، އެ ހުނަރު ޑިވެލޮޕްކުރަން މަސައްކަތެއް ނުކުރޭ،" ޗެތުރީ ބުންޏެވެ.
"ޗައިނާ، އެމެރިކާ، ޖަޕާން، ޖަރުމަނު، އޮސްޓްރޭލިއާ، ކެނަޑާ، - އޮލިމްޕިކްސްގައި ތަފާތު ދައްކާ ގައުމުތައް، މި ބުނި ކަންތައްތަކުން މި އޮތީ އަހަރެމެންނަށް ވުރެ އެތައް މޭލެއް ކުރީގައި،"
އޮލިމްޕިކްސްގެ ތާރީހުގައި އިންޑިއާ އިން ވަނީ 38 މެޑަލް ހޯދައިފަ އެވެ. އޭގެ ތެރޭގައި، މި ފަހަރުގެ އޮލިމްޕިކްސްގައި ހޯދި ތިން ލޯ މެޑަލް ވެސް ހިމެނެ އެވެ. ރަން މެޑަލަށް ބަލާއިރު، އޮލިމްޕިކްސްގައި އިންޑިއާ އިން ވަނީ 10 މެޑަލް ހޯދައިފަ އެވެ.
އިންޑިއާ އިން ކުޅިވަރަށް ކުރާ ހޭދަ އާއި އާބާދީގެ ނިސްބަތާ މި ހުރިހާ ކަމެއް އަޅާކިޔާއިރު، އެންމެ ބޮޑު ބަހުސަކީ، މެޑަލްގެ އަދަދު މަދުވުމުގެ ވާހަކަ އެވެ.
އިންޑިއާ ގައުމީ ޓީމަށް 146 މެޗުން 94 ގޯލު ޖަހައިދިން ޗެތުރީ ބުނީ، އެ ގައުމުގައި ހުރިހާ ކުޅިވަރަކުން ވެސް ހުނަރު އެބަހުރި ކަމަށެވެ. އެކަމަކު، މީގެ މަސައްކަތް ކުރަން ޖެހޭ ގޮތަށް އަދިވެސް ނުކުރެވޭކަން ޗެތުރީ ފާހަގަކުރި އެވެ.
"އަހަރެމެން ގައުމުގައި ހުނަަރު ނެތޭ ބުނެވޭކަށް ނޯންނާނެއޭ، ދެ ދައްކާ ވާހަކަ އަކީ 100 ޕަސެންޓް ހަގީގަތް. އަންޑަމަންގައި ހުރި ފަސް އަހަރުގެ ކުއްޖަކު، ފުޓްބޯޅައިން ނޫނީ ޖެވަލިން ނޫނީ ކްރިކެޓުން ރަނގަޅު ވެދާނެ. އޭނާ އަށް ވެސް ސީދާ (އެ ހުނަރު ޑިވެލޮޕްކުރަން) އެކަން ނޭނގިދާނެ. އެއް ފަހަރު ނޫނީ ދެ ފަހަރު އެ ކަމެއް ކޮށްފައި، ގެއްލޭނީ، ދެން ފެންނާނީ ކޯލް ސެންޓަރަކުން (އެހެން ވަޒީފާ އަކުން)" ޗެތުރީ ބުންޏެވެ.
"އަދިވެސް މި ބުނަނީ، ރަނގަޅު ވަގުތުގައި ހުނަރު ދެނެގަންނަންވީ، ކޮން ކުއްޖެއްގެ ގައިގައި ކޮން ހުނަރެއްތޯ ހުރީ. އެކަން ކުރުމުގައި އަހަރެމެން މި އޮތީ ފަހަތުގައި. މިހެން ބުނެގެން ބަޔަކު އަހަރެން މަރާލަން އައި ކަމުގައި ވިޔަސް، މިއީ ރިއަލިޓީ އަކީ،"
މިހާރު ޕެރިސްގައި ކުރިއަށްދާ އޮލިމްޕިކްސްގައި މި ވަގުުތަށް ބަލާއިރު، މެޑަލް ތާވަލުގައި އިންޑިއާ އޮތީ 44 ވަނައިގަ އެވެ.
