ރިޔާސީ އިންތިހާބުގެ ދެވަނަ ބުރުގައި ވެރިކަންކުރާ ޕީއެންސީއަށް ތާއީދުކުރި ޑިމޮކްރެޓްސް ޕާޓީގެ އިސްވެރިން، ރައީސް ޑރ. މުހައްމަދު މުއިއްޒާ ބައްދަލުކޮށްފި އެވެ.
އިއްޔެ ބޭއްވި މި ބައްދަލުވުމުގައި ޑިމޮކްރެޓްސްގެ ފަރާތުން ބައިވެރިވީ ޕާޓީގެ ރައީސް ހަސަން ލަތީފު އަދި ނައިބު ރައީސް މުހައްމަދު ޝިފާޒު އެވެ. މިއީ ވެރިކަމަށް ވަޑައިގެންނެވި ފަހުން ރައީސް ޑިމޮކްރެޓްސް ޕާޓީއާ ބައްދަލުކުރެއްވި ދެވަނަ ފަހަރެވެ.
މި ބައްދަލުވުމުގާ ގުޅޭގޮތުން ހަސަން ލަތީފު "އަދަދު" އާ ވާހަކަދައްކަވަމުން ވިދާޅުވީ، އިއްޔެ ބައްދަލުވުމެއްގައި މައިގަނޑު ދެކަމަކާ ގުޅޭގޮތުން ރައީސް އާ މަޝްވަރާކުރެވުނު ކަމަށެވެ.
އެގޮތުން ގާނޫނު އަސާސީ އިސްލާހުކުރަން މި ސަރުކާރުން އިއުލާނުކޮށްފައިވާއިރު އެ މަސައްކަތުގައި ޑިމޮކްރެޓުން ބައިވެރިވެ ކުރެވެންހުރި ހުރިހާ ކަމެއް ކުރަން ބޭނުންވާކަން ރައީސްއަށް ދެންނެވި ކަމަށާއި އެކަމުގައި އެކުގައި މަސައްކަތް ކުރަން ބޭނުންވާ ކަަމަށް ރައީސް ވިދާޅުވި ކަމަށެވެ.
އޭގެ އިތުރުން، އެ ޕާޓީން ގެންގުޅޭ ސިޔާސަތުތައް މި ސަރުކާރުން ތަންފީޒުކުރުން މުހިންމުކަން ފާހަގަކޮށް ހާއްސަކޮށް މާލީ ކަންކަމުގެ ޑިމޮކްރެޓުންގެ ސިޔާސަތުތައް ބަލައިގަތުމަށް ރައީސްގެ އަރިހުން ދެންނެވި ކަމަށް އޭނާ ވިދާޅުވި އެވެ.
"ޕާޓީގެ ސިޔާސަތުތައް ތަންފީޒުކުރާއިރު، އަޅުގަނޑުމެން ދެންނެވި ޕާޓީގަ އެބަތިއްބޭ އެ ފަންނުތަކުގެ ބޭފުޅުން، ބައެއް ބޭފުޅުންނަކީ އެކްސްޕާޓުންވެސްމެ، ސަރުކާރުން އެ ބޭފުޅުންގެ އެހީތެރިކަން ބޭނުންނަމަ އެކަމަށް ތައްޔާރަށް އަޅުގަނޑުމެން މި ތިބީ،" ހަސަން ލަތީފު ވިދާޅުވި އެވެ.
ސަރުކާރާ އެކު މަސައްކަތްކުރަން ޑިމޮކްރެޓުން މަޝްވަރާކޮށްފައި މިވަނީ ރިޔާސީ އިންތިހާބަށްފަހު އިދިކޮޅު ޕާޓީއެއްގެ ގޮތުގައިވެސް މަސައްކަތް ކުރުމަށް ފަހެވެ. ޕާޓީގެ ލީޑަޝިޕުގެ އެކި ބޭފުޅުން ވަނީ އެކި ފަހަރު މަތިން ސަރުކާރަށް ފާޑުކިޔާފަ އެވެ. އެހެން ބޭފުޅުން ސަރުކާރުގެ ސިޔާސަތުތަކަށް ތާއީދުކޮށް ވާހަކަދައްކާފައިވެ އެވެ.
އެގޮތުން މި އަހަރު މޭ ޑޭގައި ވަޒީފާގެ ބިރު ދެއްކުމުގެ ސަގާފަތް ނައްތާލުމަށް ފުރަތަމަ ވެސް ފަށަން ޖެހެނީ ދައުލަތުގެ އެކި ވަޒީފާތައް ހަވާލުކުރާ އިދާރާތަކާއި ކުންފުނިތަކުން ކަމަށް ބުނެ ޑިމޮކްރެޓުން ބަޔާން ނެރުނެވެ.
އޭގެ ކުރިން މާޗު 10، ގައި މި ސަރުކާރުގެ މިސްރާބު މިހުރީ މީގެ ކުރީގެ ވެރިކަންތަކަށްވުރެ މާ ނުރައްކާތެރި ދިމާލަކަށް ކަމަށާއި ވެރިކަން ކުރުމުގެ ހިލްމު ރައީސް މުއިއްޒުގެ ހުރި ކަމަށް ގަބޫލުކުރަން ދަތިކަމަށް ހަސަން ލަތީފު ވިދާޅުވި އެވެ.
