ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހު، ޕީޕީއެމް/ޕީއެންސީން އަޑު އުފުލި ޝުއޫރުތަކާ އެ ކޯލިޝަނުން ދުރަށް ޖެހުމުން އިވެމުންދަނީ މި ސަރުކާރު މާގޯހޭ މީހުން ބުނަމުންދާ އަޑު ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ރައީސް އަބްދުﷲ ޔާމީންގެ އަމިއްލަ ގެ، ހ. ދޫވެހީގައި ހުންނަ ޕީޕަލްސް ނެޝަނަލް ފްރޮންޓު (ޕީއެންއެފް) އޮފީހުގައި ބުރާސްފަތި ދުވަހުގެ ރޭ ބޭއްވި ޖަލްސާގައި ޕީޕީއެމް/ޕީއެންސީ މާގޯސް ކަމަށް ވިދާޅުވީ އިންޑިއާއާ ގުޅޭ މުއާމަލާތްތަކުގައި އަމަލުކުރަމުންދާ ގޮތް ފާހަގަ ކުރެއްވުމަށް ފަހު އެވެ.
އެމްޑީޕީގެ ވެރިކަމުގައި އުތުރުތިލަފަޅު ތަރައްގީކުރަމުން ދިޔައީ އިންޑިއާގެ އަސްކަރީ ބޭހެއް ގާއިމުކުރުމަށް ކަމަށް ތުހުމަތުކޮށް، ރައްޔިތުންގެ މަޖިލީހުގެ މިހާރު ހިތަދޫ މެދު ދާއިރާގެ މެންބަރަކަށް ހުންނެވި އަހުމަދު އަޒާން، ނޫސްވެރިއެއްގެ ގޮތުގައި މަސައްކަތް ކުރިއިރު ވާހަކަ ދައްވާ ވީޑިއޯއެއް ސްކްރީނުގައި އެޅުވުމަށް ފަހު ޔާމީން ވިދާޅުވީ އެ ފެންނަނީ އޭރު ޕީޕީއެމް/ޕީއެންސީގެ ޖޯޝް ކަމަށެވެ. ނަމަވެސް މިހާރު އެ ޝުއޫރު ފާޅުނުކުރުމަކީ ކުށުގައި ބައިވެރިވުން ކަމަށް ޔާމީން ދެކެވަޑައިގަތެވެ.
"އަޅުގަނޑުމެންނަށް ސްކްރީންތަކުން ފެނިގެން މިދަނީ އޭރު އަޅުގަނޑުމެންގެ ހުރި ގައުމީ ޖޯޝް. އެއްވެސް މީހަކު މަޖުބޫރުކޮށްގެނެއް ނޫން. އޭރު އަޅުގަނޑުމެންގެ ހުރީ ގައުމީ ޖާޝް އިނގޭތޯ؟ އެ ޖޯޝްގައި މި ފަސް އަހަރު މަގުމަތީގައި ހުރުން މާލާއިގު ނޫންތޯ ދިވެހިންގެ ހައްގުގައި. މިހާރު މި ހުރިހާ ވާހަކައެއް ދައްކާފައި ރައްޔިތުންގެ ސަމާލުކަން މިކަމުގައި ހޯދާފައި މިކަން ބަލަން އައި މީހުން މަގުމަތީގައި ނުތިބެވިގެން މީގައި ބައިވެރި މިވަނީ، ކުށުގެ ބައިވެރިންނަށް މިވަނީ،" ޔާމީން ވިދާޅުވި އެވެ.
ހަނިމާދޫ އެއާޕޯޓުގެ ދެ ވަނަ ފޭހުގައި އޮތީ އަސްކަރީ އެއާޕޯޓެއް ކަމާއި އުތުރު ތިލަފަޅުގެ އެގްރީމެންޓުގައި އިންޑިއާ ސިފައިން ގެންނަ ހަތިޔާރުތައް ނުބެލޭނެ ކަމަށް ބުނެ ޕީޕީއެމް/ޕީއެންސީން ދިޔައީ އަޑު އުފުލަމުން ކަމަށާއި ރައީސް ޑރ. މުއިއްޒަށް ރިޔާސީ ޓިކެޓު އެރުވީ އަދި އިންތިހާބުގައި ރައްޔިތުން ތާއިދު ދިނީ އެ ޝުއޫރެއް ދެމެހެއްޓުމަށް ކަމަށް ޔާމީން ވިދާޅުވި އެވެ.
ނަމަވެސް، އެގޮތަށް އަމަލު ނުކުރެވުމުން މިހާރު އިވެމުންދަނީ ޕީޕީއެމް/ޕީއެންސީ ސަރުކާރު މާގޯހޭ މީހުން ބުުނާ އަޑު ކަމަށް ޔާމީން ވިދާޅުވި އެވެ.
"މިއަދު މަގުމަތިންނާއި އެތައް މިތަނުން އިވޭ ޝުއޫރުތަކުގައި މިހުރީ މާތްކަލާކޯއޭ ކޮބައިހޭ.... އެމްޑީޕީ ގޯހޭ، އެކަމަކު ޕީޕީއެމް ޕީއެންސީ ސަރުކާރު އައިސް އަދި އިހުނަށް ވުރެ މާގޯހޭ،" އެމަނިކުފާނު ވިދާޅުވި އެވެ.
ޔާމީންގެ ވެރިކަމުގައި އެމްއެންޑީއެފްގެ މާލޭ އޭރިއާގެ ކުރީގެ ކޮމާންޑަރު ކެޕްޓަން އަހުމަދު ފަޔާޒު އަލީ ރިޒާ (ޕާޕާ) ބުރާސްފަތި ދުވަހުގެ ރޭގެ ޖަލްސާގައި ވިދާޅުވީ އިތުރުތިލަފަޅު ހިއްކުމުގެ މަސައްކަތް އެމްއެމް އެކްސްޕޯޓާ ހަވާލުކޮށްފައިވާ ކަމަށާއި، އެކަމަށް ކޮންނަ ބޯޓެއް ގެނެސްގެން މަސައްކަތް ކުރަމުން އަންނަ ކަމަށެވެ.
ރާއްޖޭގައި އިންޑިއާ ސިފައިން ނެތް ކަމަށް ޑިފެންސް މިނިސްޓަރު ގައްސާން މައުމޫން ވިދާޅުވެފައި ވާތީ، ރައްދެއްގެ ގޮތުގައި ފަޔާޒު ކުރެއްވި ސުވާލުގައި ވިދާޅުވީ އިންޑިއާ ސިފައިން ތިބިކަން ދައްކައިފި ނަމަ [ގައްސާން] އިސްތިއުފާ ދެއްވާނެތޯ އެވެ.
ދެ ބަގާވާތުގެ ވާހަކަ
އެމްޑީޕީ އަށް ވެސް ޕީޕީއެމް ގޯސްވި ވާހަކަތަކަށް ފަހު ޔާމީން ފާހަގަ ކުރެއްވީ، ޕީޕީއެމް/ޕީއެންސީގެ ލީޑަރަކަށް ހުންނަވަނިކޮށް އެ ކޯލިޝަންގެ ތެރެއިން އެ މަނިކުފާނާ ދެކޮޅަށް ހިންގި ބައެއް ކަންކަމެވެ.
ފުރަތަމަ ޖަލަށްލި ފަހަރު އަދި އޭގެ ފަހުން ވެސް ޕާޓީގެ އެތެރެއިން ބަގާވާތެއް ކުރި ކަމަށް ޔާމީން ވިދާޅުވި އެވެ. ވަކި ކަމެއް ފާހަގަ ނުކުރެއްވިޔަސް، ދެ ވަނަ ބަގާވާތުގެ ގޮތުގައި ފާހަގަ އެ ކުރެއްވީ ރައީސް ޑރ. މުހައްމަދު މުއިއްޒަށް ރިޔާސީ ޓިކެޓު ދިނުމާއި، ޕީޕީއެމް/ޕީއެންސީގެ ބާރު ގެންދިޔުން ކަމަށް ބެލެވެ އެވެ.
ރައީސް މުއިއްޒަށް ޕީއެންސީގެ ރިޔާސީ ޓެކެޓު ލިބިވަޑައިގަތީ، ރައީސް ޔާމީނަށް އިންތިހާބުގައި ވާދަނުކުރެވޭ ހާލަތެއްގައި ވާދަ ކުރެއްވުމަށެވެ. އެ ޝަރުތާއެކު ސެންޓުގައި ނެގި ވޯޓުގައި 48 މީހުންގެ ތެރެއިން 25 މީހުން ވޯޓުނީ މުއިއްޒު ކެންޑިޑޭޓަކަށް ހެދުމަށެވެ. އެ ޕްރައިމަރީގައި މުއިއްޒާ ވާދަ ކުރެއްވި މިހާރު ލޯކަލް ގަވަމެންޓް މިނިސްޓަރަކަށް ހުންނެވި އާދަމް ޝަރީފަށް ލިބިވަޑައިގަތީ 23 ވޯޓެވެ.
ޔާމީންގެ ޝަރީއަތަށް އަދި އެ މަނިކުފާނަށް ލިބިފައި އޮތް ރިޔާސީ ޓިކެޓު ބާތިލުކުރަން މި ސަރުކާރުގައި އިސްކޮށް ތިއްބެވި ބޭފުޅުން ނުފޫޒު ފޯރުވި ކަމަށާއި، އެ މީހުންގެ "ފުލް ލިސްޓު" އެބަ އޮތް ކަމަށް ޔާމީން ވިދާޅުވި އެވެ.
"ހައި ކޯޓުގައި އަޅުގަނޑުގެ މައްސަލަ ހިނގަމުން ދިޔައިރު އޭގެތެރެއަށް އަތް ބާނައި އަޅުގަނޑަށް ގެއްލުންދޭން މިހާރު ތި ގަރުދިޔަ ޖަގަހައިގައި މަސައްކަތް ކުރާ އިސް ބޭފުޅުންގެ ތެރެއިން ކޮން ބައެއްކަން، ފުލް ލިސްޓު އެބަ އޮތް. ކޮން ފަނޑިޔާރަކާތޯ ގުޅި ވެސް އަޅުގަނޑަށް އެނގެ. އެ ބޭފުޅުން ހީފުޅު ނުކުރައްވާ މި ކަހަލަ މައުލޫމާތު އަޅުގަނޑުމެންގެ ނުހުންނާނެ ކަމަށް،" ޔާމީން ވިދާޅުވި އެވެ.
"އަދި ހަމަ އެހެންމެ، އަޅުގަނޑުގެ ކެންޑިޑެސީ ބާތިލުކުރުމަށްޓަކައި ހިނގައި ދިޔަ ކަންތަކުގެ ވާހަކަ އަޅުގަނޑު ދެންނެވިން. މި ސަރުކާރުގެ ވަޒީރަކު [ފަނޑިޔާރާ] ބައްދަލުކުރީ، ބައްދަލުކުރީ ޕުކެޓުގައި. އެކަންކަން އަޅުގަނޑުމެންނަށް ނޭނގެނީއަކީ ނޫން އިނގޭތޯ."
ސެޕްޓެމްބަރު 2023 ގައި ބޭއްވި ރިޔާސީ އިންތިހާބު ކާމިޔާބު ވުމާއެކު ވެސް، ޔާމީން މިނިވަން ކުރަން ރައީސް ސޯލިހަށް ދެންނެވި ކަމަށް ރައީސް މުއިއްޒު ތަކުރާރުކޮށް ވިދާޅުވެފައިވެ އެވެ. ނަމަވެސް ޔާމީން ވިދާޅުވީ އިންތިހާބު ކާމިޔާބު ކުރެއްވުމަށް ފަހު، އޭރުގެ ރައީސް ސޯލިހާއި މުއިއްޒުއާއެކު ބޭއްވި ބައްދަލުވުމުގައި ވެސް އެ މަނިކުފާނު މިނިވަންކުރުމުގެ ވާހަކަ ނުދެއްވި ކަމަށެވެ.
"އެ މީޓީންގައި ތިބީ ހަތަރު މީހުން. މުއިއްޒުއާއެކީ ދިޔައީ އަބްދުއްރަހީމް. އަނެއްކޮޅުން އިބްރާހިމް މުހައްމަދު ސޯލިހު، ދެން ވެސް އެތާ އިން ރައީސް އޮފީހުގެ އިސް ބޭފުޅެއް. އެ މީޓީންގައި ރައީސް ޔާމީން ގެއަށް ބަދަލުކޮށްދޭށޭ، ރައީސް ޔާމީން މިނިވަންކޮށްދޭށޭ މުއިއްޒެއް ނުބުނޭ. މިއީ ހުރިހާ ދިވެހިރައްޔިތުންނަށް އެނގެންޖެހޭ ވާހަކައެއް،" ޔާމީން ވިދާޅުވި އެވެ.
ރައީސް ޔާމީން މިނިވަން ކުރަން ގޮވާލައި ކުރަމުން މުޒާހަރާތައް ހުއްޓުވީ ރައީސް މުއިއްޒުކަން ފާހަގަ ކުރެއްވުމަށް ފަހު ޔާމީން ވިދާޅުވީ އެ މަނިކުފާނު މިނިވަން ކުރުމުގެ އިހުލާސްތެރި ނިޔަތެއް މި ސަރުކާރުގެ ބޭފުޅުންގެ ނެތް ކަމަށެވެ.
