ސިޔާސީ ގޮތުން ބަދަލު ހިފުމުގެ ރޫހެއް ނުގެންގުޅުއްވާނެ ކަމަށާއި އެމަނިކުފާނާ އެކު ރައްޔިތުން ތިބިހާ ދުވަހަކު ބަދަލުނުހިފާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ވެރިކަން ކުރާ ޕާޓީ, ޕީއެންސީގެ ހަރުގެ ހުޅުވުމުގެ ރަސްމިއްޔާތުގައި ވާހަކަދައްކަވަމުން ރައީސް ވިދާޅުވީ އެމަނިކުފާނު ވެރިކަމަށް ވަޑައިގެންނެވިފަހުން ވޭތުވި ހަތް މަހުގެ ތެރޭގައި ސިޔާސީ ވިސްނުމެއްގައި ނުވަތަ މަގުސަދެއްގައި އެއްވެސް މީހަކު ހައްޔަރު ނުކުރާ ކަމަށާއި, ކުރިއަށް އޮތްތާ ވެސް އެފަދަ މަންޒަރެއް ނުފެންނާނެ ކަމަށެވެ.
ރައްޔިތުން އެމަނިކުފާނާ ހަވާލުކުރީ ބަދަލުހިފުމުގެ ރޫހު ނައްތާލުމަށް ކަމަށާއި އެކަން ފުރިހަމަ ކުރައްވަމުން ގެންދަވާ ކަމަށް އެމަނިކުފާނު ވިދާޅުވި އެވެ.
"އެކަން ވަނީ މި ގައުމުން މިހާރު ނައްތާލާފައި. ނުފެންނާނެ މި ގައުމަކުން ބަދަލު ހިފުމުގެ ރޫހެއް. އަޅުގަނޑުމެންނާ އެކީގައި ރައްޔިތުން ތިބިހާ ދުވަހަކު މި ގައުމުން ބަދަލުހިފުމުގެ ރޫހެއް ނުފެންނާނެ," ރައީސް ވަރަށް ޖޯޝުގައި ރޭ ވިދާޅުވި އެވެ.
ފާޑުކިއުމަކީ އެމަނިކުފާނަށް އާ ކަމެއް ނޫންކަން ފާހަގަކުރައްވާ ރައީސް ވަނީ, ކޮންމެ ކަހަލަ މީޑިއަމެއްގައި ވެސް އެމަނިކުފާނަށް ފާޑު ކިޔަސް ތެދު ބަހުން ޖަވާބު ދެއްވާނެ ކަމަށް ވިދާޅުވެފަ އެވެ. އަދި ކިޔަން ބޭނުންވާ ފާޑެއް, ތެދު ބަހުން ކިޔުމަށް ރައީސް އިލްތިމާސް ކުރެއްވި އެވެ.
"ތެދު ބަހުން ވާހަކަ ދެއްކުމަށް ހުރިހާ ބޭފުޅުންނަށް އަޅުގަނޑު ހިތްވަރު ދެން. ދެން އެ ބޭފުޅުންގެ އެ ހިތްވަރު ނެތިއްޔާ ދޮގު ހައްދަވާ, ކިތަންމެ ވަރަކަށް ހެއްދެވިއަސް މައްސަލައެއް ނެތް. އަޅުގަނޑުމެންގެ އެބަހުރި ތެދު ހެދުމުގެ ހިތްވަރު," ރައީސް ވިދާޅުވި އެވެ.
ރައީސް ވިދާޅުވީ ސިޔާސީ ގޮތުން ކިތަންމެ ދޮގެއް ހެދިއަސް ހައްޔަރު ކުރާނެ މީހެއް ނުހުންނާނެ ކަމަށާއި, ސިޔާސީ ބަދަލު ހިފުމެއް ނުހިއްޕަވާނެ ކަމަށެވެ. އަދި ރައްޔިތުން ބޭނުންވީ ބަދަލު ހިފުމުގެ ރޫހު ނައްތާލަން ކަމަށްވާތީ އެކަން ނައްތާލާފައިވާ ކަމަސް ވެސް ވިދާޅުވި އެވެ.
ރައީސް ވިދާޅުވީ, ކޮރަޕްޝަނާއި, ވައްކަން އަދި ނާޖާއިޒު ގޮތެއްގައި ގަވައިދާ ހިލާފަށް ކަންކަން ކުރުމުގެ ފުރުސަތު ނުދެއްވާނެ ކަމަށެވެ. އަދި އެފަދަ ކަމެއް ކުރާ މީހަކު ހެއްކާއެކީގައި އެމަނިކުފާނު ކުރިމައްޗަށް ގެނެސްފިނަމަ, އެމީހަކާ ދެކޮޅަށް އިސްވެ ފިޔަވަޅު އަޅުއްވާނެ ކަމަށް ރައީސް ވިދާޅުވި އެވެ.
