ނިއުޔޯކް، ޔުނައިޓެޑް ސްޓޭޓްސް (ޖޫން 13) - މިހާރު ކުރިއަށްދާ ޓީ20 ކްރިކެޓް ވޯލްޑް ކަޕްގައި ހަތް ވިކެޓުން އެމެރިކާ ބަލިކޮށް އިންޑިއާ އިން ސުޕަ އެއިޓްސް އިން ޖާގަ ހޯދައިފި އެވެ.
އިންޑިއާގެ އިތުރުން ދެން ސުޕަ އެއިޓްސް އިން ފުރުސަތު ހޯދީ ކުޅުނު ތިން މެޗުން ވެސް މޮޅުވެފައިވާ އޮސްޓްރޭލިއާ އެވެ. އެކަމަކު، އޮސްޓްރޭލިއާ އަށް އަދި ގްރޫޕްގައި ބާކީ އެއް މެޗު އެބައޮތެވެ. އެއީ އެ ގްރޫޕްގައި ފަސް ޓީމު އޮތުމުންނެވެ.
އިންޑިއާ އިން ފުރަތަަމަ ބުރުގައި ގްރޫޕް ސްޓޭޖު ނިންމާލީ ސައްތަ އިން ސައްތަ ރެކޯޑަކާ އެކު އެވެ. އިންޑިއާ އިން ވަނީ ގްރޫޕްގައި ކުޅުނު ތިން މެޗުން، އަޔަލެންޑާއި ޕާކިސްތާން އަދި އެމެރިކާ ބަލިކޮށްފަ އެވެ.
ޓޮސް ދިމާވުމުން އިންޑިއާ އިން ގަސްދުކުރީ ހޮވާށެވެ. އެމެރިކާ އިން ކުޅެން އަރައި، 20 އޯވަރުގެ ތެރޭގައި އަށް ކުޅުންތެރިން ނުބައިވެގެން ހެދުނީ 110 ލަނޑެވެ. އެމެރިކާ އަށް އެންމެ ރަނގަޅު ކުޅުމެއް ދެއްކީ އިންޑިއާ ދަރިކޮޅަށް ނިސްބަތްވާ ނިތިޝް ކުމާރް އެވެ. އޭނާ ވަނީ، 23 ބޯޅައިން 27 ލަނޑު ހަދައިފަ އެވެ.
މި އިނިންސްގައި އިންޑިއާގެ އަރްޝްދީޕް ސިންގް ވަނީ ހަތަރު ވިކެޓް ނަގައިފަ އެވެ.
އިންޑިއާ މޮޅުވީ ޖަވާބުގައި ކުޅެން އަރައި، 18.2 އޯވަރުގެ ތެރޭގައި ތިން ކުޅުންތެރިން ނުބައިވިއިރު، 111 ލަނޑު ހަަދައިގެންނެވެ. އިންޑިއާގެ އޯޕަނިން ބެޓްސްމަނުންގެ ގޮތުގައި އަރައި، ކެޕްޓަން ރޯހިތު ޝަރްމާ އާއި ވިރާތު ކޯލީ އަށް ކަމެއް ނުކުރެވުނެވެ. ރޯހިތު ތިން ލަނޑަށް ނުބައިވިއިރު، ވިރާތު ވަނީ ފުރަތަމަ ބޯޅައިން ނުބައިވެފަ އެވެ.
އިންޑިއާ މޮޅުކޮށްދިނުމުގައި އެންމެ ހިއްސާ ބޮޑީ ސޫރްޔަކުމާރް ޔާދަވް އެެވެ. އޭނާ ވަނީ ނުބައިނުވެ، 49 ބޯޅައިން 50 ލަނޑު ހަދައިފަ އެވެ. ޒުވާން ކުޅުންތެރިޔާ، ޝިވަމް ދޫބޭ ވަނީ ނުބައިނުވެ، 35 ބޯޅައިން 31 ލަނޑު ހަދައިފަ އެވެ. ދެން، އިންޑިއާ އިން މި މެޗުގައި ކުޅެން އެރި ރިޝަބް ޕާންޓް ވަނީ 20 ބޯޅައިން 18 ލަނޑު ހަދައިފަ އެވެ.
އިންޑިއާ ސުޕަ އެއިޓްސް އަށް ދަތުރުކޮށްފައިވާއިރު، މި ބުރުގައި ވެސް ކުރިއަށްދާނީ ހަތަރު ޓީމު ޓީމުގެ ދެ ގްރޫޕްގެ މެދުގަ އެވެ. ކޮންމެ ގްރޫޕަކުން ދެ ޓީމެއް ސެމީ ފައިނަލަށް ދާ ގޮތަށެވެ.
