ނިއުޔޯކް، ޔުނައިޓެޑް ސްޓޭޓްސް (ޖޫން 12) - އެމެރިކާ އާއި ވެސްޓް އިންޑީސްގައި މިހާރު ކުރިއަށްދާ ޓީ20 ކްރިކެޓް ވޯލްޑް ކަޕްގައި، ހަތް ވިކެޓުން، ކެނަޑާ ބަލިކޮށް ޕާކިސްތާނުން މުބާރާތުގައި ކުރިއަށްދިއުމުގެ އުންމީދެއް ހޯދައިފި އެވެ.
އެންމެ ފަހުން ވޯލްޑް ކަޕްގެ ރަނަރަޕް، ޕާކިސްތާން މި ފަހަރުގެ މުބާރާތުގައި ކުޅުނު ފުރަތަމަ ދެ މެޗުން ވަނީ ބަލިވެފަ އެވެ. އެ ގޮތުން، ފުރަތަމަ މެޗުގައި ހައިރާންކުރަނިވި ގޮތަކަށް އެމެރިކާ އަތްދަށުވިއިރު، ދެ ވަނަ މެޗުން ވަނީ ވާދަވެރި އިންޑިއާ އަތުން ބަލިވެފަ އެވެ. އަމިއްލަ ބާރުގައި އަނެއް ބުރަށް ދިއުމުގެ ފުރުސަތު ނެތްއިރު، ޕާކިސްތާނަށް ކިރިޔާ ވެސް ގްރޫޕް ސްޓޭޖު ފަހަނައަޅައި ދެވެން އޮތީ ފަހު ދެ މެޗުން މޮޅުވެގެންނެވެ. އޭގެ ތެރެއިން ފުރަތަމަ މެޗުން މި ވަނީ ކެނަޑާ އަތުން މޮޅުވެފަ އެެވެ.
ޓޮސް ދިމާވުމުން ޕާކިސްތާނުން ނިންމީ ހޮވާށެވެ. ކެނަޑާ އިން ކުޅެން އަރައި، 20 އޯވަރު ހަމަވިއިރު، ހަތް ކުޅުންތެރިން ނުބައިވެގެން 106 ލަނޑު ހެދި އެވެ. އެ ޓީމަށް އެންމެ ރަނގަޅު ކުޅުމެއް ދައްކައިދިނީ، 52 ލަނޑު ހެދި އާރޮން ޖޯންސަން އެވެ.
މި އިނިންސްގައި ޕާކިސްތާންގެ މުހައްމަދު އާމިރު އާއި ހާރިސް ރައޫފް، ކޮންމެ ކުޅުންތެރިއަކު ދެ ވިކެޓް ނެގި އެވެ.
ޕާކިސްތާން މޮޅުވީ ޖަވާބުގައި ކުޅެން އަރައި، 17.3 އޯވަރުގެ ތެރޭގައި ތިން ކުޅުންތެރިން ނުބައިވިއިރު، 107 ލަނޑު ހަަދައިގެންނެވެ. ޕާކިސްތާނަށް އެންމެ ރަނގަޅު ކުޅުމެއް ދެއްކީ، ނުބައިނުވެ، 53 ބޯޅައިން 53 ލަނޑު ހެދި މުހައްމަދު ރިޒްވާން އެވެ.
ސުޕަ އެއިޓްގެ ފުރުސަތެއް ޕާކިސްތާނަށް އޮތީ، އެ ޓީމުން ފަހު މެޗުގައި ގިނަ ލަނޑުގެ ތަފާތަކުން، އަޔަލެންޑް އަތުން ބޮޑު މޮޅެއް ހޯދައި، ނެޓް ރަން ރޭޓް ރަނގަޅުކޮށްގެންނެވެ. އަދި އެ އަށް ފަހު ވެސް ޕާކިސްތާނުން، އިންޑިއާ އާއި އެމެރިކާގެ މެޗުތަކުގެ ނަތީޖާ އަށް ބަލަންޖެހޭނެ އެވެ.
މުބާރާތުގައި މިރޭ އޮތީ، އިންޑިއާ އާއި އެމެރިކާ ބައްދަލުކުރާ މެޗެެވެ.
