މި ސަރުކާރުން ވެރިކަމާ ހަވާލުވެެ ރަށްރަށުގައި ހިންގަމުން އައި ތަރައްގީގެ މަޝްރޫއުތައް ހުއްޓާލާފައިވާ ކަމަށް އިދިކޮޅުން ބުނަމުން އަންނަ ވާހަކަ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ދޮގު ކުރައްވައިފި އެވެ.
ހިޔާ ފްލެޓުތައް ކައިރީ މިރޭ ބޭއްވި ކެމްޕެއިން ޖަލްސާއެއްގައި ވާހަކަ ދައްކަވަމުން މުއިއްޒު ވިދާޅުވީ މަޝްރޫއުތައް ހުއްޓާލީ މިދިޔަ ސަރުކާރުން ކަމަށެވެ. ކުރީ ސަރުކާރުން ހުއްޓާލި މަސައްކަތްތަކާއި އިތުރު މަޝްރޫއުތަކާއެކު މިހާރު ސަރުކާރުން 527 މަޝްރޫއެއް ހިންގަމުންދާ ކަމަށް ރައީސް ވިދާޅުވި އެވެ.
"އަޅުގަނޑުމެންނަށް އިވިގެން މި ދަނީ އަޅުގަނޑުމެން ހަވާލުވެގެން މިދިޔަ ހަތަރު މަހާއި ބައިގެ ތެރޭގައި އަޅުގަނޑުމެން ނުކުރެއޭ އެއްވެސް މަސައްކަތެއް. އަޅުގަނޑުމެން، މިދިޔަ ސަރުކާރުގައި ބާރު ސްޕީޑުގައި މަސައްކަތް ކުރަމުން ދަނިކޮށް އަޅުގަނޑުމެން ހަވާލުވެ ހުއްޓާލީއޭ ހުރިހާ ކަމެއް. މިކަހަލަ ވާހަކަތައް އަޑު އަހާ ބަޔަކަށް އަޅުގަނޑުމެން ވާންވީ ސަބަބެއް ނެތް ލޯ ކުރިމަތިން ކަންކަން ފެންނަން ހުރިއިރު،" ރައީސް ވިދާޅުވި އެވެ.
ރައީސް ވިދާޅުވީ މިދިޔަ ސަރުކާރުން ފެށި ގިނަ މަޝްރޫއުތައް ހުއްޓާލާފައި އޮތީ ކޮންޓްރެކްޓަރުންނަށް ފައިސާ ނުދީގެންނާއި ޕްރޮޖެކްޓުތައް މިސްމެނޭޖް ކުރުމުގެ ސަބަބުން ކަމަށެވެ.
"އަޅުގަނޑުމެން އައިސް، މި މަސައްކަތްތައް ހުއްޓިފައި ހުރި ސަބަބުތައް ބަލައި، ހުއްޓިފައި ހުރީ އެ މަޝްރޫއުތައް ހިންގި ފަރާތްތަކަށް ދޭންޖެހޭ ފައިސާ ނުދީގެންކަން އެ ހުރީ ހިސާބުތަކުން ފެންނަން. ނުވަ ހާސް މިލިއަން ރުފިޔާގެ ފައިސާ، ކުޑަ އަދަދެއް ނޫން، އެކިއެކި ކުންފުނިތަކަށް ދޭން ހުރި މިދިޔަ ސަރުކާރު ނިމުނުއިރުގައި،" އެމަނިކުފާނު ވިދާޅުވި އެވެ.
ރައީސްގެ ހިސާބުތައް
- ފެނާއި ނަރުދަމާގެ މަޝްރޫއުތައް - 27 މަޝްރޫއެއް ހުއްޓިފައި، މިހާރު 74 މަޝްރޫއު އެބަ ހިނގާ
- ބަނދަރު ހެދުމާއި ބިން ހިއްކުމާއި ތޮށިލުން - 30 ރަށެއްގައި މަޝްރޫއުތައް ހުއްޓިފައި، މިހާރު 90 މަޝްރޫއު އެބަ ހިނގާ
- އެއާޕޯޓު ހެދުމުގެ މަޝްރޫއުތައް - ހަތް ރަށެއްގައި ހުއްޓިފައި - ހަތް ރަށް ވެސް ފެށިފައި
- މަގު ހެދުމުގެ މަޝްރޫއުތައް - 17 ރަށެއްގައި މަޝްރޫއު ހުއްޓިފައި، މިހާާރު 24 ރަށެއްގައި އެބަ ހިނގާ
- ދަނޑުތަކާއި ކޯޓުތައް ހެދުން - 84 މަޝްރޫއު ހުއްޓިފައި، އޭގެ ތެރެއިން 71 މަޝްރޫއު ފެށިފައި
- މިސްކިތް ބިނާ ކުރުން - މިސްކިތްތަކުގެ 20 މަޝްރޫއެއް ހުއްޓިފައި، 42 މަޝްރޫއު މިހާރު އެބަ ހިނގާ
- ތައުލީމީ ދާއިރާ - 90 މަޝްރޫއު ހުއްޓިފައި، 217 މަޝްރޫއު މިހާރު ހިނގާ
- ޖުމްލަ 527 މަޝްރޫއު ރާއްޖޭގެ އެކި ކަންކޮޅުތަކުގައި ހިނގާ ކަމަށް ވިދާޅުވި
މިރޭގެ ޖަލްސާގައި ވާހަކަ ދައްކަވަމުން ރައީސް އިތުރަށް ވިދާޅުވީ ސިޔާސީ ގޮތުން ވަކި ކޮޅަކަށް ޖެހިފައި ހުރި މީހާ ވެސް ވިސްނާލުމުން އެމަނިކުފާނު ދައްކަވަނީ ތެދު ވާހަކަކަން އެނގޭނެ ކަމަށެވެ. އެއީ މުސްލިމަކަށްވީތީ ވެސް އެކަން ކުރަންޖެހޭ ކަމަށް ރައީސް ވިދާޅުވި އެވެ.
"ސިޔާސީ ވިސްނުމުން ގޮސް އެއްކޮށް ފޯވެގެން ވަކި އަތަކަށް ގޮސް ހުސްވެފައި ހުރި މީހާ ވެސް ވިސްނާލަންޖެހޭނެ ތިމަންނަ މިއީ ﷲ ދެއްވި ސިކުނޑިއެއް ހުރި މީހެއްކަން. އެ ސިކުނޑިން ތިމަންނާއަށް ވިސްނަން ޒިންމާއެއް އޮތްކަން މުސްލިމަކަށްވީތީ ވެސް،" ރައީސް މުއިއްޒު ވިދާޅުވި އެވެ.
އިދިކޮޅު މޯލްޑިވިއަން ޑިމޮކްރެޓިކް ޕާޓީން ބުނެފައި ވަނީ މި ސަރުކާރު ވެރިކަމަށް އައިސް ޖުމްލަ 1720 މަޝްރޫއެއް ހުއްޓާލާފައިވާ ކަމަށެވެ.
"މި މަޝްރޫއުތަކަކީ ރައްޔިތުންގެ އަސާސީ ހައްގުތަކާ ގުޅޭ ވަރަށް މުހިންމު މަޝްރޫއުތަކެއް. އަޅުގަނޑުމެން އަމަލު ކުރާ މި ގާނޫނުއަސާސީ ދައުލަތަށް، ރައީސްއަށް ލާޒިމު ކުރަނީ ރައްޔިތުންގެ ޓެކްސް ފައިސާ ހަރަދު ކުރުމުގައި އިސްކަންދޭންވާނީ ގާނޫނުއަސާސީގައި ބަޔާންކުރާ ރައްޔިތުންގެ އަސާސީ ހައްގުތައް ފުރިހަމަކޮށްދިނުމަށް ކަމަށް،" ކުރިން ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ތަރުޖަމާނު އަހުމަދު އީސާ ވިދާޅުވެފައިވެ އެވެ.
