ސަރުކާރުގެ ހަރަދު ބޮޑުވެގެން ދިޔައީ ސިޔާސީ މަގާމުތައް އިންތިހާ އަށް އިތުރު ކުރުމުން ކަމަށާއި އަންދާޒާ ކުރެވޭ ގޮތުގައި މިހާރު ވެސް ސިޔާސީ މަގާމުތަކުގެ އަދަދު 1،500 އަށް ވުރެ އިތުރުވެއްޖެ ކަމަށް، ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ކުރިއަށް އޮތް 20 ވަނަ ރައްޔިތުންގެ މަޖިލީހުގެ މާފަންނު އުތުރު ދާއިރާ އަށް އެމްޑީޕީގެ ޓިކެޓުގައި ވާދަކުރާ އިފްހާމް ހުސައިން އަށް ތާއިދު ހޯދަން ރޭ ބޭއްވި ޖަލްސާގައި ސޯލިހު ވިދާޅުވީ ރާއްޖޭގެ އިގުތިސާދީ ހާލަތު އޮތް ގޮތާބެހޭ ގޮތުން ސަރުކާރުގެ ވެރިން ދައްކާ ވާހަކަ އާއި އަމަލު ދިމާ ނުވާ ކަމަށެވެ.
ރައީސް ޑރ. މުހައްމަދު މުއިއްޒާ ހަވާލުކުރީ ބަނގުރޫޓުވެފައި އޮތް ސަަރުކާރެއް ކަމަށް އެ ބޭފުޅުން ވިދާޅުވާއިރު، ވޭތުވެދިޔަ ހަތަރު މަސް ދުވަސްތެރޭގައި ކަން ކޮށްފައިވާ ގޮތް ސާފުކޮށް ފެންނަން އެބަ އޮތް ކަމަށް ސޯލިހު ވިދާޅުވި އެވެ. އެ ވާހަކަ ކުރީގެ ރައީސް އަބްދުﷲ ޔާމީން ވެސް މިހާރު ދައްކަވަން ފައްޓަވައިފި ކަމަށް ވެސް ސޯލިހު ފާހަގަ ކުރެއްވި އެވެ. އެ ފާހަގަ ކުރެއްވީ ސިޔާސީ މަގާމުތައް އިތުރުވުމާއި، ސަރުކާރުގެ މަޝްރޫއުތައް ހުއްޓިފައިވުމެވެ.
ސޯލިހު ވިދާޅުވީ މި ވޭތުވެދިޔަ ތިން މަސް ދުވަހު، ކުރީ އަހަރުގެ އެ މުއްދަތަށް ވުރެ 300 މިލިއަން ރުފިޔާ އިތުރަށް ހަރަދުކޮށްފައިވާ ކަމަށާއި އަދި، 1700 ޕްރޮޖެކްޓު ހުއްޓާލާފައިވާ ކަމަށެވެ.
"މި ފައިސާ ހަރަދުކުރީ ކޮން ބަޔަކަށްތޯ؟" ސޯލިހު ސުވާލު އުފެއްދެވި އެވެ.
އެ މަނިކުފާނު ވިދާޅުވި ގޮތުގައި އެނގެން އޮތީ އިށީންނާނެ ގޮނޑިއެއް މޭޒެއް ނެތް މިންވަރަށް ސިޔާސީ މަގާމުތައް އިތުރުވުމެވެ.
"އަންދާޒާ މިހާރު ކުރެވޭ ގޮތުގައި، އެ ބޭފުޅުން މައުލޫމާތު ދެއްވީމަ އެނގޭނީ، 1500 އަށް ވުރެ ގިނަ ސިޔާސީ މަގާމު މިހާރު ވާނީ އުފައްދާފައި. އެހެން ނަމަކަ މަހެއްގެ މައްޗަށް 100، 150 މިލިއަން ރުފިޔާ ރިކަރަންޓު ހަރަދަށް، މުސާރައަކަށް ހަރަދު ކުރަން ނުޖެހޭނެ،" ސޯލިހު ވިދާޅުވި އެވެ.
"އިސްރާފު އިންތިހާއަށް، އިސްރާފު އިންތިހާއަށް. މިހާރު ހުއްޓާލާފަ އެހުރި ޕްރޮޖެކްޓުތައް ދެން އަލުން ފައްޓަން ވެއްޖިއްޔާ ވާނީ ކިހިނެއްތޯ؟ ދެގުނަ އިތުރަށް ހަރަދު އަނެއްކާ ވެސް ކުރަން ޖެހޭނީ. އަނެއްކާ ވެސް ތިބޭފުޅުންގެ ލާރި، ތިބޭފުޅުންގެ ފައިސާ ހަރަދުވެގެން އެދަނީ."
ރައްޔިތުންގެ މަޖިލީހުގެ މެޖޯރިޓީ މިއަދު މިއޮތް ސަރުކާރަށް ލިބިއްޖެ ނަމަ، "ހީނުކުރާ ވަރުގެ ދަތި އުނދަގޫ ނާމާން ހާލަތަކަށް މި ގައުމު ވެއްޓިގެން ދާނެ" ކަމަށް ސޯލިހު ވިދާޅުވި އެވެ.
