ކުރީގެ ރައީސް އަބްދުﷲ ޔާމީނުގެ ސަރުކާރަށް ވުރެ ވެސް ރައީސް ޑރ. މުހައްމަދު މުއިއްޒުގެ ސަރުކާރު ގޯސް ކަމަށް އިދިކޮޅު އެމްޑީޕީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެ އެވެ.
ވިހި ވަނަ ރައްޔިތުންގެ މަޖިލީހަށް މެންބަރުން ހޮވަން އަންނަ އޭޕްރިލްމަހު ބާއްވާ އިންތިހާބުގައި އެމްޑީޕީގެ ފަރާތުން ތިމަަރަފުށި ދާއިރާއަށް ވާދަކުރައްވާ ކެންޑިޑޭޓް ފަތުހުﷲ ޖަމީލަށް ކެމްޕޭން ކުރަން ރޭ ބޭއްވި ހަރުގެ ޖަލްސާއެއްގައި ފައްޔާޒް ވިދާޅުވީ މި ސަރުކާރު "އޮބި އަޅައި" ނުހިފެހެއްޓިއްޖެ ނަމަ ރާއްޖޭގެ ކަންތައްތައް ސަލާމަތްނުވާ ހިސާބަށް ގެންދާނެ ކަން މިހައިތަނަށް އަމަލުކުރި ގޮތުން އެނގިއްޖެ ކަމަށެވެ. ސަރުކާރު "އޮބި އެޅޭނީ" އޭނާ ވިދާޅުވި ގޮތުގައި މަޖިލީހުގެ އަޣުލަބިއްޔަތު އެމްޑީޕީއަށް ލިބިގެންނެވެ.
"އަޅުގަނޑުމެން ހީކުރީ ރައީސް ޔާމީނުގެ ސަރުކާރުގައޭ އެންމެ ބޮޑަށް އަނިޔާވެރިކަން އަޅުގަނޑުމެނަށް ފެނުނީ، ނޫން. އަޅުގަނޑަށް އެއަށް ވުރެ މާ ބޮޑަށް އަނިޔާވެރިކަން އެބަ ފެނޭ މިސަރުކާރާ އެއްކޮށް. ރައީސް ޔާމީނުގެ ސަރުކާރުގައި އަނިޔާކުރެއްވީ ރައީސް ޔާމީނުގެ ވެރިކަމާ ތޮޅޭ މީހުންނަށް، އެ ބޭފުޅާއަށް ދެކެވުނީ އޮޕޮޒިޝަނެއް އޮވެގެން ނުވާނެ ކަމަށް،" ފައްޔާޒް ވިދާޅުވި އެވެ.
އޭގެ ބަދަލުގައި މި ސަރުކާރުން އެެކިއެކި މީހުންނާ ދެކޮޅުވަނީ ޒާތީގޮތުން ކަމަށް އޭނާ ސިފަކުރެއްވި އެވެ. އެގޮތުން ރައީސް ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދާއި އެކަމަނާގެ އާއިލާގެ ބޭފުޅުންނަށް "އެއްޗެއް ބުނާ" މީހާއާ ވެސް މި ސަރުކާރުން ޒާތީވާ ކަމަށް އޭނާ ތުހުމަތުކުރެއްވި އެވެ.
ފައްޔާޒް މިމޭރުމުން ވާހަކަ ދެއްކެވި އިރު ކުރީގެ ރައީސް އަބްދުﷲ ޔާމީނުގެ ވެރިކަމުގައި އޭރުގެ އިދިކޮޅު ހުރިހާ ލީޑަރުންހެން އެކި އެކި ތުހުމަތުކޮށް ޖަލަށް ލި އެވެ. އޭގެ ތެރެއިން ގިނަ ބޭފުޅުން ޖަލަށްލީ ފްރޭމްކޮށް، އެކި އެކި މައްސަލަ އުފައްދައިގެން ކަމަށް ވެސް އޭރުގެ އިދިކޮޅު ފަރާތްތަކުން އޭރު ތުހުމަތުކުރި އެވެ.
