އިދިކޮޅު މޯލްޑިވިއަން ޑިމޮކްރެޓިކް ޕާޓީއަށް ނިސްބަތްވާ ރައްޔިތުން މަޖިލީހުގެ 12 މެންބަރަކު ވެރިކަން ހިންގާ ޕީޕަލްސް ނެޝަނަލް ކޮންގްރެސްއަށް ގެންދިޔައީ ފައިސާ ދީގެން ކަމަށް ކުރީގެ ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ކުރިއަށް އޮތް ރައްޔިތުންގެ މަޖިލީހުގެ އިންތިހާބަށް ނ. މަނަދޫގައި ކެމްޕެއިން ކުރައްވަމުން ސޯލިހު ވިދާޅުވީ އެމްޑީޕީއަށް ނިސްބަތްވާ 12 މެންބަރަކު ވެރިކަން ހިންގާ ޕާޓީއަށް ގެންދިޔުމުގެ އެއް މަގުސަދަކީ "މަޖިލީހުގެ ބޭނުން ކަނޑުވާލުން" ކަމަށެވެ.
"ގާނޫނުއަސާސީގައި ބޮޑު އެއް ބާރުގެ ގޮތުގައި ކަނޑައަޅާފައި އޮތް ރައްޔިތުންގެ މަޖިލީހުގެ ބޭނުން ކަނޑާލައި ބާރުތައް އަތް މައްޗަށް ނެގުމަށް ކުރައްވަން ފެއްޓެވި މަސައްކަތް. ފުރަތަމަ ކަމަކަށް ކުރެއްވީ އޭގެ ތެރެއިން ތިޔަ ބޭފުޅުން، އަޅުގަނޑުމެން އެމްޑީޕީގެ ބުރަ މަސައްކަތުން ހޮއްވަވާފައި ތިބި 12 ރައްޔިތުންގެ މަޖިލީހުގެ މެންބަރަކު ގެންދެވީ،" ސޯލިހު ވިދާޅުވި އެވެ. "އެކަން ކުރި ގޮތް ވަރަށް ސާފުކޮށް އެބަ އެނގޭ. މިތާ މި ތިއްބެވި ދެ ބޭފުޅުންނަށް ވެސް ފައިސާ ހުށަހެޅި. ފައިސާ ދީގެން 12 މެންބަރަކު އެ ތިބީ ގެންގޮސްފަ. އެއްޗެއް ހިތަށް ވެސް ނާރާ."
އޭގެ އިތުރުން އެމަނިކުފާނު ވިދާޅުވީ ރައްޔިތުންގެ މަޖިލީހުން ފާސް ކުރާ ގާނޫނުތައް ތަސްދީގު ނުކޮށް ރައީސް ޑރ. މުހައްމަދު މުއިއްޒު މަޖިލީހަށް ގޮންޖައްސަވަމުން ގެންދަވާ ކަމަށެވެ. ނަމަވެސް އެމްޑީޕީގެ މެޖޯރިޓީ މަޖިލީހުގައި އޮތުމުން އެކަމުން މިވަގުތު ސަލާމަތްވަމުންދާ ކަމަށް ސޯލިހު ވިދާޅުވި އެވެ.
"ރައްޔިތުންގެ މަޖިލީހުން ފާސް ކުރާ ގާނޫނުތައް ތަސްދީގުނުކޮށް ގޮންޖައްސަވަމުން ގެންދަވަނީ. އަޅުގަނޑުމެންނަށް އެކަމުން ސަލާމަތްވެވުނީ ރައްޔިތުންގެ މަޖިލީހުގެ މެޖޯރިޓީ މިވަގުތު އޮތީމަ. [މެޖޯރިޓީ] ނެތް ނަމަ، ރައްޔިތުންގެ މަޖިލީހުން ފާސްކުރާ އެއްވެސް ފާސް ކުރުމަކަށް މި ސަރުކާރުން ބޯލަނބައި، ތަބައެއްނުވާނެ،" ސޯލިހު ވިދާޅުވި އެވެ.
އެމްޑީޕީގެ 12 މެންބަރަކާއި އެ ޕާޓީއިން ކުރިން ވަކިވި މެންބަރަކު ޕީއެންސީއަށް ސޮއި ކުރީ ޑިސެމްބަރު 28، ގަ އެވެ. ރައީސް މުއިއްޒު ވިދާޅުވީ އަދި ވެސް އިތުރު އެމްޑީޕީގެ މެންބަރުން ޕީއެންސީއާ ގުޅޭނެ ކަމަށް އުއްމީދު ކުރައްވާ ކަމަށެވެ.
"އަޅުގަނޑު ޔަގީން ކުރަނީ ތިޔަ ބޭފުޅުން ތިޔަ ނިންމެވި ނިންމެވުމާއެކު ހިތްވަރު ލިބިގެން އަދިވެސް ގިނަ މަޖިލިސް މެމްބަރުން މި ސަފަށް، ގައުމީ ސަފަށް އަރުއްވާނެ ކަމަށް. އެކަމުގެ އުއްމީދުގައި އަޅުގަނޑުމެން ތިބި ވާހަކަ ދަންނަވާލަން،" ރައީސް އެ ރޭ ވިދާޅުވި އެވެ.
