ރައްޔިތުންގެ މަޖިލީހުގެ ގަވާއިދުގައި ރައީސުލްޖުމްހޫރިއްޔާ އަޒުލު ކުރުމުގެ މަރުހަލާތައް ބަޔާން ކުރާ މާއްދާތައް ބަދަލު ކުރުމުން، ބަންޑާރަ ނައިބުގެ އޮފީހުން ހުށަހެޅި ދުސްތޫރީ މައްސަލަ ރައްދުވާ އެއްވެސް ފަރާތެއް ނެތް ގޮތަށް ސުޕްރީމް ކޯޓުގައި މިއަދު ޝަރީއަތް ފަށައިފި އެވެ.
ރާއްޖޭގެ ޝަރުއީ އެންމެ މަތީ ކޯޓު، ސުޕްރީމް ކޯޓުގައި މި މައްސަލަ ބައްލަވަނީ ފަސް ފަނޑިޔާރުންގެ ބެންޗަކުންނެވެ. ރިޔާސަތުގައި އިންނެވީ ފަނޑިޔާރު ޑރ. އަޒްމިރަލްދާ ޒާހިރެވެ. ދެން ތިއްބެވީ ފަނޑިޔާރު އައިޝާ ޝުޖޫނާއި، ފަނޑިޔާރު ހުސްނުއްސުއޫދު، ފަނޑިޔާރު މަހާޒު އަލީ ޒާހިރު، އަދި ފަނޑިޔާރު ޑރ. މުހައްމަދު އިބްރާހީމެވެ.
މިއަދު ހެނދުނު 10:00 ޖަހާކަށްހާއިރު މައްސަލައިގެ ފުރަތަމަ އަޑުއެހުން ފައްޓަވަމުން، ރިޔާސަތުގައި އިންނެވި ފަނޑިޔާރު އަޒްމިރަލްދާ ވިދާޅުވީ މި މައްސަލަ ފުރަތަމަ ރައްޔިތުންގެ މަޖިލީހަށް ރައްދުވާ ގޮތަށް ހުށަހެޅި ނަމަވެސް އެ ކަން ބަދަލުކޮށްދިނުމަށް އެދި ބަންޑާރަ ނައިބު ފަހުން ސިޓީއެއް ފޮނުވާފައިވާ ކަމަށެވެ.
"އެއީ ރައްޔިތުންގެ މަޖިލިސް ތަމްސީލް ކުރަން ޖެހޭ ފަރާތަކީ [ވެސް] ބަންޑާރަ ނައިބުގެ އޮފީސް،" އެ ގޮތަށް ބަދަލު ކުރަން ބަންޑާރަ ނައިބު ބޭނުންވި ސަބަބު ހާމަކޮށްދެއްވަމުން ފަނޑިޔާރު އަޒްމިރަލްދާ ޒާހިރު ވިދާޅުވި އެވެ.
މިކަމުގައި ރައްޔިތުންގެ މަޖިލީހުގެ އެއްވެސް އިއުތިރާޒެއް އޮތްތޯ ސުޕްރީމް ކޯޓުން ސާފުކުރިއިރު، މަޖިލީހުގެ އެއްވެސް އިއުތިރާޒެއް ނެތް ކަމުގެ ލިޔުމެއް ވެސް ލިބިފައިވާ ކަން ފަނޑިޔާރު އަޒްމިރަލްދާ ޒާހިރު ފާހަގަ ކުރެއްވި އެވެ. އެހެންވެ މައްސަލަ ރައްދުވާ ފަރާތެއް ނެތް ގޮތަށް ގެންދަން ކޯޓުން ވަނީ ނިންމައިފަ އެވެ.
މިއަދުގެ ޝަރީއަތު އަޑުއެހުމަށް ވެސް ހާޒިރުވެ ތިބީ ބަންޑާރަ ނައިބުގެ އޮފީހުގެ ވަކީލުން އެކަންޏެވެ. ރައްޔިތުންގެ މަޖިލީހުގެ ފަރާތުން އެއްވެސް މީހަކު ހާޒިރުވެފައެއް ނުވެ އެވެ.
ސުޕްރީމް ކޯޓުން މި މައްސަލާގައި ރައްޔިތުންގެ މަޖިލީހުގެ މައްޗަށް ވަގުތީ އަމުރެއް ނެރުނު ނަމަވެސް މަޖިލީހުގެ މެންބަރުންގެ ވޯޓަކުން ނިންމީ އެ އަމުރަށް އަމަލު ނުކުރުމަށެވެ.
ގާނޫނު އަސާސީގައިވާ ގޮތުން ރައީސާއި ނައިބު ރައީސް މަގާމުން ދުރުކުރެވޭނީ މަޖިލީހުގެ ޖުމްލަ މެމްބަރުންގެ ތިން ބައިކުޅަ ދެ ބައި މެންބަރުންގެ ވޯޓުންނެވެ. އެއީ ރައްޔިތުންގެ މަޖިލީހުގެ މި ދައުރަށް އިންތިހާބުކުރި 87 މެންބަރުންގެ ތެރެއިން 58 މެންބަރުންގެ ވޯޓެވެ.
ނަމަވެސް ސަރުކާރާ ގުޅުނު ހަތް މެމްބަރުންގެ ގޮނޑި ހުސްވި ފަހުން އިދިކޮޅު އެމްޑީޕީގެ ކޮންޓްރޯލުގައި އޮތް ރައްޔިތުންގެ މަޖިލީހުގެ ގަވާއިދަށް ގެނައި އިސްލާހަކުން ރައީސާއި ނައިބު ރައީސް މަގާމުން ވަކިކުރުމުގެ މަރުހަލާތައް ފަސޭހަކޮށް، މަޖިލީހުގެ މެންބަރުންގެ ޖުމުލަ އަދަދާއި އަގުލަބިއްޔަތު ގުނާ ގޮތަށް ބަދަލުގެނަ އެވެ.
ގަވާއިދަށް ގެނައި ބަދަލުގައި ވަނީ މަޖިލީހުގެ ޖުމުލަ މެންބަރުންނަކީ އެ ވަގުތެއްގައި މަޖިލީހުގައި ދެމިތިބި މެންބަރުން ކަމަށެވެ. އެހެންވެ، ޖުމުލަ މެންބަރުންގެ ގޮތުގައި 87 މެންބަރުން ތިބި ކަމަށް ބެލުމުގެ ބަދަލުގައި 80 މެމްބަރުންނަށް ތިރިވީ އެވެ.
މިއާ ގުޅިގެން މަޖިލީހުގައި ކަންކަން ފާސްކުރަން ކަނޑައަޅާފައިވާ އަގުލަބިއްޔަތުގެ މިންވަރުތަކަށް ބަދަލު އައިސް ރައީސާއި ނައިބު ރައީސް އަޒުލުކުރަން ބޭނުންވާ ވޯޓުގެ އަދަދު 54 އަށް ތިރިވި އެވެ. މިހާރު މަޖިލިސް ބެހިފައި އޮތް ގޮތުން އެމްޑީޕީ އާއި ދަ ޑިމޮކްރެޓްސްގެ މެމްބަރުން ގުޅިގެން ލިބޭ 56 ވޯޓުން ރައީސް އަޒުލުކުރެވޭނެ އެވެ.
މައްސަލަ ސުޕްރީމް ކޯޓަށް ހުށަހެޅި ފަހުން މަޖިލީހުން ވަނީ ގަވާއިދަށް އަނެއްކާ ވެސް ބަދަލެއް ގެނެސްފަ އެވެ. އެއީ ކޯޓަށް ހުށަހެޅިފައިވާ މާއްދާތަކުން އެ ބައިތައް އުނިކުރުމަށް ފަހު މުޅިން އާ މާއްދާތަކެއްގައި އެ ބައިތައް ހިމެނުމަށެވެ.
ވަޒީރުންނަށް ރުހުން ދިނުމުގެ މައްސަލައިގެ ތެރެއިން އުފެދުނު އަރައިރުމުގައި އެމްޑީޕީން ވަނީ ރައީސް އަޒުލުކުރާ މައްސަލަ މަޖިލީހަށް ހުށަހަޅަން ބޭނުންވާ ވަރަށް ސޮއި ހަމަކޮށްފަ އެވެ. ނަމަވެސް މި މައްސަލަ އަދި މަޖިލީހަށް ހުށަނާޅަ އެވެ. އެމްޑީޕީގެ މެންބަރުން ވިދާޅުވަނީ، އެ މައްސަލަ މަޖިލީހަށް ވައްދާނީ އެ ކަމަށް "އެންމެ ރަނގަޅު" ވަގުތު ޖެހުމުން ކަމަށެވެ.
