ރައީސް ޑރ. މުހައްމަދު މުއިއްޒު އައްޔަންކުރެއްވި ވަޒީރުންނަށް ރުހުން ދިނުމުގެ މައްސަލަ އެޖެންޑާކޮށް ރައްޔިތުންގެ މަޖިލީހުގައި މިއަދު ފެށި ޖަލްސާއަށް ސަރުކާރުގެ މެންބަރުން ހުރަސްއެޅުމުގެ ސަބަބުން ކުރިއަށް ނުގެންދެވި ނިންމާލުމަށް ފަހު އެ މެމްބަރުން ވަޑައިގަތީ ރައީސް އޮފީހަށްކަން ހާމަވެއްޖެ އެވެ.
މީގެ ކުޑަވަގުތުކޮޅެއް ކުރިން އެ މެމްބަރުން ވަނީ ހިންގަވާފައި ގޮސް ރައީސް އޮފީހަށް ވަދެވަޑައިގަނެފަ އެވެ. މިވަގުތު އެ ބޭފުޅުން ރައީސް އޮފީހަށް ވަދެވަޑައިގަންނަވާނީ ހަމައެކަނި ރައީސްއާ ބައްދަލުކުރައްވަން ކަމަށް ބެލެވެ އެވެ.
ބައްދަލުކުރައްވަނީ ކޮން ބޭފުޅަކާކަން ސުވާލު ކުރުމުން އެއްވެސް ބޭފުޅަކު ޖަވާބެއް ނުދެއްވަ އެވެ. މި މެމްބަރުންގެ ތެރޭގައި އިދިކޮޅު އެމްޑީޕީ ދޫކޮށް ޕީއެންސީއަށް ދިޔަ މެމްބަރުން ވެސް ހިމެނެ އެވެ.
މިއަދުގެ ޖަލްސާ ފުރަތަމަ ފެށީ ހެދުނު 9:00 ގަ އެވެ. އެ ދަންފަޅީގައި މަޖިލީހުގެ މަސައްކަތްތައް ކުރިއަށް ގެންދިއުމަށްފަހު ޖަލްސާ މެދުކަނޑާލީ މެންދުރު 1:30 ގައި ވޯޓުލާ ދަންފަޅި ފެށުމަށް މަސައްކަތް ކުރުމުން ސަރުކާރުގެ މެންބަރުން ވަނީ އެކަމަށް ހުރަަސް އަޅާފަ އެވެ.
އޭގެ ފަހުން ޖަލްސާ ބޭއްވުމަށް މިރޭ 08:00 އިން ފެށިގެން މަސައްކަތް ކުރިއިރު އެކަން ވެސް ކާމިޔާބު ނުވެ މެދުކަނޑާލި އެވެ.
އެއަށްފަހު, އަނެއްކާ ވެސް 10:30 ގައި ޖަލްސާ ބާއްވަން މަސައްކަތް ފެށި އެވެ. އޭރު ރިޔާސަތުގައި ހުރި މައިކް ސިސްޓަމް ނެގުމާ ގުޅިގެން މަޖިލިސް ރައީސް މުހައްމަދު އަސްލަމް އިންނެވީ ވަޒީރުން ތިއްބަވާ މޭޒުގަ އެވެ.
އަދި, ދެ މެމްބަރަކަށް މަޖިލީހުގެ ގަވާއިދަށް ހުރުމަތްތެރިކޮށް ހިތުމަށް ނަސޭހަތް ދެއްވި އެވެ. އެއަށް ފަހު ވެސް މުޅި މަޖިލިސް ކުރާ ހޯލުން ވެސް ދުންމާރީގެ އަޑު ކެނޑިފައިނުވާއިރު 10:57 ހާއިރު އަސްލަމް ވަނީ ޖަލްސާ ނިންމަވާލައްވާފަ އެވެ.
