މާލެ ސިޓީގެ އާ މޭޔަރު އާދަމް އާޒިމާއި، އެ ކައުންސިލަށް އިންތިހާބުވި އާ ތިން ކައުންސިލަރުން މަގާމުގެ ހުވާކޮށްފި އެވެ.
ދަރުބާރުގޭގައި މިރޭ ކުރިއަށްދާ ރަސްމިއްޔާތުގައި މޭޔަރަށާއި ކައުންސިލަރުންނަށް ހުވާ ލައިދެއްވީ ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރެވެ.
މިރޭ ކައުންސިލަރުންގެ މަގާމުގެ ހުވާ ކުރެއްވި ބޭފުޅުންނަކީ، ހެންވޭރު ދެކުނު ދާއިރާގެ ކައުންސިލަރު އައިމިނަތު އަހުމަދު ރިޝްފާ (ޕީއެންސީ)، މެދު ހެންވޭރު ދާއިރާގެ ކައުންސިލަރު އަހުމަދު ރިލުވާން ރަޝީދު (ޕީއެންސީ)، އަދި މާފަންނު ދެކުނު ދާއިރާގެ ކައުންސިލަރު ހަސަން ނިޒާމު (ޕީއެންސީ) އެވެ.
މަގާމުގެ ހުވާ ކުރެއްވުމަށް ފަހު، މަގާމުގެ އިގުރާރުގައި ހަތަރު ބޭފުޅުން ވަނީ ސޮއިކުރައްވައިފަ އެވެ.
ކައުންސިލަރު ކަމުގެ މަގާމުގެ ހުވާ ކުރެއްވި ބޭފުޅުންގެ ތެރޭގައި ހިމެނިވަޑައިގަންނަވާ އަހުމަދު ރިޝްވާން ރަޝީދު އިންތިހާބުވީ އިދިކޮޅު އެމްޑީޕީގެ ޓިކެޓުގަ އެވެ. ނަމަވެސް, ހުވާ ކުރެއްވުމުގެ ރަސްމިއްޔާތުގެ ކުރިއަށް އޭނާ ވަނީ ވެރިކަންކުރާ ޕީޕީއެމްއަށް ސޮއިކުރައްވައިފަ އެވެ.
ސިޓީ ކައުންސިލްގައި މޭޔަރު ހިމެނޭހެން 19 ކައުންސިލަރުން ހިމެނޭ އިރު، ރިޝްވާން ވެސް ހިމެނޭހެން 13 ކައުންސިލަރުންނަކީ ވެރިކަންކުރާ ޕީއެންސީ/ޕީޕީއެމްގެ މެމްބަރުންނެވެ. އޭގެ ތެރެއިން ދެ ކައުންސިލަރުންނަކީ ކުރިން އެހެން ޕާޓީތަކުގައި ތިބެފައި ޕީއެންސީއާ ގުޅުނު މެންބަރުންނެވެ.
އިދިކޮޅު އެމްޑީޕީއަށް ނިސްބަތްވާ މޭޔަރަކު ހުރި ނަމަވެސް ކައުންސިލްގެ ސުޕަ މެޖޯރިޓީ އޮތީ ވެރިކަންކުރާ ޕީއެންސީއަށެވެ.
