މާލޭގެ މޭޔަރަކު ހޮވުމަށް މިއަދު ބޭއްވި އިންތިހާބު ކާމިޔާބު ކުރެއްވި އިދިކޮޅު އެމްޑީޕީގެ ކެންޑިޑޭޓު އާދަމް އާޒިމްއަށް ފޯނުން ގުޅުއްވައި މަރުހަބާ ވިދާޅުވުމަށް ފަހު ސަރުކާރަށް އެއްބާރުލުން ދެއްވުމަށް ރައީސުލްޖުމްހޫރިއްޔާ ޑރ. މުހައްމަދު އެދިވަޑައިގަނެފި އެވެ.
މޭޔަރުގެ އިންތިހާބުގައި ގާތްގަނޑަކަށް 17442 މީހުން ވޯޓުލިއިރު އާދަމް އާޒިމް އޭގެ ތެރެއިން 44 ޕަސެންޓު ވޯޓު ހޯއްދެވި އެވެ. އިންތިހާބުގެ ނަތީޖާއަށްފަހު ރައީސް އާޒިމްއަށް ފޯނުން ގުޅުއްވައި ވިދާޅުވީ ސަރުކާރުގެ ފުރިހަމަ އެއްބާރުލުން މޭޔަރަށް ދެއްވާނެ ކަމަށެވެ. އަދި އެދިވަޑައިގަތީ ލާމަރުކަޒީ ނިޒާމުގެ ތެރެއިން ސަރުކާރަށް ވެސް އެއްބާރުލުން ދެއްވުމަށެވެ.
"މާލެ ސިޓީގެ މޭޔަރުކަމަށް އިންތިހާބުވެވަޑައިގަތް އާދަމް އާޒިމްއަށް ރައީސުލްޖުމްހޫރިއްޔާ ފޯނުން ގުޅުއްވައި މަރުހަބާ ކިޔުއްވައިފި. ރައީސުލްޖުމްހޫރިއްޔާ ދެއްކެވި ވާހަކަފުޅުގައި ސަރުކާރުގެ ފުރިހަމަ އެއްބާރުލުން މާލެ ސިޓީ ކައުންސިލަށާ އަދި މޭޔަރަށް ދެއްވާނެ ކަމަށް ވިދާޅުވި،" ރައީސް އޮފީހުން، ސޯޝަލް މީޑީއާ ޕްލެޓްފޯމް އެކްސްގައި ކުރި ޕޯސްޓެއްގައި ބުންޏެވެ.
"ރައްޔިތުން ބޭނުންވާ ކަންކަމުގައި ލާމަރުކަޒީ ނިޒާމުގެ ތެރެއިން ސަރުކާރަށް އެއްބާރުލުން ދެއްވައިގެން މާލެ ސިޓީ ކައުންސިލުން މަސައްކަތްކޮށްދެއްވުމަށް އެދިވަޑައިގެންނެވި."
މިއަދުގެ އިންތިހާބު އާޒިމް ކާމިޔާބު ކުރައްވާފައި މި ވަނީ ސަރުކާރާއި ސަރުކާރުގެ ސިޔާސަތުތަކަށް ތާއީދު ކުރާ ކެންޑިޑޭޓަކު ހޮވުމަށް ރައީސް މުއިއްޒު ހުކުރު ދުވަހު ދެއްވި ވީޑިއޯ މެސެޖެއްގައި އެދިވަޑައިގަނެފައި އޮއްވަ އެވެ.
"މޭޔަރަކު ހޮވުމުގައި މާލޭގެ ރައްޔިތުން މާދަމާ [މިއަދު]، ސަރުކާރަށް ތާއީދު ކުރައްވާ، ސަރުކާރުގެ ސިޔާސަތުތައް ރައްޔިތުންނާ ގުޅިގެން ތަންފީޒުކޮށްދޭނެ މޭޔަރަކު ހޮވާނެ ކަމަށް [ޔަގީންކުރަން]،" ޗައިނާގައި ހުންނަވާ ރައީސް އާންމު ކުރެއްވި ވީޑިއޯއެއްގައި ވިދާޅުވި އެވެ.
އާޒިމްގެ އިތުރުން މިއަދުގެ އިންތިހާބުގައި ވާދަ ކުރެއްވީ ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ ކެންޑިޑޭޓު އާޒިމާ ޝަކޫރާއި ދަ ޑިމޮކްރެޓްސްގެ ކެންޑިޑޭޓު ސައިފު ފާތިހާއި އަމިއްލަ ގޮތުން ވާދަ ކުރެއްވި ހުސެއިން ވަހީދާއި ޝުއައިބު އަލީ އެވެ.
މިއަދުގެ އިންތިހާބުގައި 54،680 މީހުންނަށް ވޯޓުލުމުގެ ހައްގު ލިބުނެވެ. ނަމަވެސް ވޯޓުލާން ނުކުތީ 31 ޕަސެންޓު މީހުންނެވެ.
