ރާއްޖެއަށް ބޮޑެތި ގެއްލުންތައް ވަމުންދާ ކަމަށާއި އެމްޑީޕީގެ މެމްބަރުންނާއި އެހެން ރައްޔިތުންނަށް ވެސް އެ މަންޒަރު ބަލަން (އަޅައިނުލައި) ނުތިބެވޭނެ ކަމަށް ކުރީގެ ރައީސް އިބްރާހީމް މުހައްމަދު ސޯލިހު މިރޭ ވިދާޅުވެއްޖެ އެވެ.
ވެރިކަމުގެ ދައުރު ނިމުނު ފަހުން ފުރަތަމަ ފަހަރަށް އެމްޑީޕީގެ ޕޯޑިއަމަށް ވަޑައިގެން ސޯލިހު ވިދާޅުވީ އެމްޑީޕީން ސަރުކާރަށް ވަގުތުކޮޅެއް ދިނީ އެއީ ރައްޔިތުން އިންތިހާބުކުރި ސަރުކާރަކަށް ވާތީ ކަމަށެވެ. ރައްޔިތުން އިންތިހާބުކުރި ސަރުކާރަަކަށް ވާތީ "އަދިވެސް ވަގުކޮޅެއް ދޭންވީއޭ ހިތަށް އަރާ" ކަމަށް ވެސް އެމަނިކުފާނު ވިދާޅުވި އެވެ.
"މިހައިތަނަށް އަޅުގަނޑުމެން މަޑުކޮށްލައިގެން މިތިބީ، ރައްޔިތުން އިންތިހާބުކުރި ސަރުކާރަކަށް ވާތީ ވަގުތުކޮޅެއް ދޭން ޖެހޭނެ ކަމަށް އަޅުގަނޑުމެން ގަބޫލުކުރާތީ. އަދިވެސް ހިތަށް އަރާ ބައެއް ފަހަރު، އަދިވެސް ކުޑަވަގުތުކޮޅެއް އަޅުގަނޑުމެން ބަލައިލަންވީއޭ، އެކަމަކު އަޅުގަނޑަކަށް ހިއެއް ނުވޭ އެހެން ދެން ބަލަން ތިބެވޭކަށް އޮތް ހެނެއް،" ސޯލިހު ވިދާޅުވި އެވެ.
ސަރުކާރު ޖަވާބުދާރީކުރަން އެމްޑީޕީ އަލުން ނުކުންނަން ޖެހޭ ކަމަށް ދެކެވަޑައިގަންނަވާ ގިނަ ސަބަބުތަކެއް އެމަނިކުފާނު ވިދާޅުވެދެއްވި އެވެ.
އެފަދަ އެއް ކަމަކީ އެމަނިކުފާނު ވިދާޅުވި ގޮތުގައި ރާއްޖޭގެ އެކި ކަންކޮޅުތަކުގައި އެމްޑީޕީގެ ސަރުކާރުން ފަށާފައިވާ މަސައްކަތުގެ ބޮޑުބައި މިހާރުގެ ސަރުކާރުން ހުއްޓައިލުމެވެ. އެމަނިކުފާނު ތުހުމަތުކުރެއްވި ގޮތުގައި އެ މަސައްކަތްތަކުގެ 70 ނުވަތަ 80 ޕަސެންޓް މިހާރު ހުރީ ހުއްޓައިލައިފަ އެެވެ.
"ރައްޔިތުން ނުތިބޭނެ ބަލާކަށެއް. އަޅުގަނޑުމެން [އެމްޑީޕީ] ވެސް ތިބެގެނެއް ނުވާނެ. ޖަވާބުދާރީ ކުރުވުން އޮތް އެންމެ ބޮޑު ޕާޓީއަކީ އެމްޑީޕީން،" ސޯލިހު ވިދާޅުވި އެވެ.
އެއާ އެކު އެމަނިކުފާނު އެދިވަޑައިގެންނެވީ ޒިންމާދާރުކަމާ އެކު ސަރުކާރު ޖަވާބުދާރީ ކުރުމުގެ މަސައްކަތް ކުރުމަށެވެ. އެ މަސައްކަތް އެމްޑީޕީން ނުކޮށްފި ނަމަ ރާއްޖެ ބޮޑު އަނދަވަަޅަކަށް ވެއްޓޭނެ ކަަށް ވެސް ވިދާޅުވި އެވެ.
ސަރުކާރުގެ ސަބަބުން ލިބެމުންދާ އަނެއް ގެއްލުމަކީ ސޯލިހު ތުހުމަތުކުރެއްވި ގޮތުގައި ރާއްޖޭގެ ހާރިޖީ ގުޅުން ގޯސްވަމުން ދިއުމެވެ. ބެލެވޭ ގޮތުގައި އެމަނިކުފާނު އިޝާރާތް އެ ކުރެއްވީ އަވަށްޓެރި އިންޑިއާއާ އެކު އޮތް ގުޅުން ހީނަރުވާތީ އެކަމަށެވެ.
" ހަމަ އެކަނި ރާއްޖޭގެ އަމަން އަމާންކަމެއް ނޫން ގެއްލިގެން ދަނީ މަގުތަކުގެ، އިގުތިސާދީ ގޮތުން ވެސް ވެސް އެތައް ދައްޗެއް ކުރިމަތިވޭ. ހާރިޖީ ގުޅުންތައް މިދަނީ ނެތިގެން،" ސޯލިހު ވިދާޅުވި އެވެ.
އެމަނިކުފާނުގެ ވެރިކަމުގެ ފަހު ދުވަސްކޮޅު ފެށްޓެވި ބިންވެރިޔާ ސްކީމާއި ގެދޮރުވެރިޔާ ސްކީމުން ދޫކުރި ގޯއްޗާއި ފްލެޓް ހަވާލުކުުރުން ސަރުކާރުން ލަސްކުރާތީ އެކަމަށް ވެސް ވަަރަށް ބޮޑަށް ފާޑުވިދާޅުވި އެވެ.
ސޯލިހު ވިދާޅުވި ގޮތުގައި ފްލެޓާއި ގޯތި ހަވާލުކުރުން ލަސްކުރާ މައްސަލަ ހައްލުކުރެވޭނީ މާލޭގެ މޭޔަރަކަށް އާޒިމް އިންތިހާބުކޮށްގެންނެެވެ.
