ރީއެސްކްޕޯޓު ކުރުމަށް ހާއްސަ ޒޯނެއް، އެސްއީޒެޑް ގާނޫނުގެ ދަށުން ކަނޑައަޅަން ނިންމާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ވެލާނާ އެއާޕޯޓު ތަރައްގީ ކުރުމުގެ ތިން ވަނަ ފިޔަވަހި އިފުތިތާހު ކުރުމަށް ބޭއްވި ޖަލްސާގައި ވާހަކަ ދައްކަވަމުން ރައީސް ވިދާޅުވީ ތިލަފުއްޓާއި އެ ސަރަހައްދުން ހިއްކާ އެހެން ބައެއް ބިންތަކުގައި ރީއެކްސްޕޯޓު ކުރުމަށް ހާއްސަ ޒޯނެއް ކަނޑަޅަން ނިންމާފައިވާ ކަމަށެވެ.
"އަޅުގަނޑުމެންނަށް ފަހިވެފައިވާ އެހެން ފުރުސަތުތަކުގެ ބޭނުން ހިފައި، ރީ އެކްސްޕޯޓް ކުރެވޭ އިންޓަނޭޝަނަލް އެސްއީޒެޑްގެ ޒޯނަކަށް އެތަން ހެދިގެންދާނެ،" ރައީސް ވިދާޅުވި އެވެ.
ރައީސް ވިދާޅުވީ ރީއެކްސްޕޯޓު ކުރުމަށް ހާއްސަ ކުރާނީ މޯލްޑިވްސް އިންޑަސްޓްރިއަލް ފްރީ ޒޯން ކޮމްޕެނީގެ ނަމުގައި މިހާރު އުފައްދަން މަސައްކަތް ކުރާ ކުންފުނިން ކަމަށެވެ. އެމަނިކުފާނު ވިދާޅުވީ، ގޯތި ދޫކުރުމާއި އެހެނިގެން ބޭނުންތަކަށް ބިން ދިނުމަށްފަހު ގާތްގަނޑަށް 100 ވަރަކަށް ހެކްޓަރުގެ ބިން އެ ކުންފުނީގެ މަސައްކަތަށް ހާއްސަ ކުރައްވާނެ ކަމަށެވެ.
ކޮންސްޓްރަކްޝަން ސާމާނުގެ އިތުރުން ރާއްޖެއަށް ބޭނުންވާ ރޯ މެޓީރިއަލްސް އުފެއްދުމާއި ރާއްޖެއަށް ބޭނުންވާ ރާއްޖޭގައި ހެދޭ ކާބޯތަކެތި ވެސް އެ ކުންފުނިން އުފައްދާނެ ކަމަށެވެ.
އޭގެ އިތުރުން ރައީސް ވަނީ މިރޭ ބޮޑު އެހެން މަޝްރޫއެއްގެ ވާހަކަ ވެސް ދައްކަވައިފަ އެވެ. އެއީ ތެޔޮ ރައްކާ ކުރުމަށް މިހާރު ބޭނުން ކުރަމުންދާ ކ. ފުނަދޫ ހުސް ކުރުމަށްފަހު އެތަން ބައިނަލްއަގުވާމީ ފައިނޭންޝަލް ސެންޓަރަކަށް ހެދުމެވެ. އެކަން ވެސް ކުރާނީ އެސްއީޒެޑްގެ ދަށުން ކަމަށް އެމަނިކުފާނު ވިދާޅުވި އެވެ.
"އެ ތަނަކީ [ފުނަދޫއަކީ] އިންޓަނޭޝަނަލް ފައިނޭންޝަލް ސެންޓާއަކަށް ހެދުމަކީ އެކަމަށް ފުރުސަތު ހުޅުވާލެވި، އެގޮތަށް ފުނަދޫ، އެ ލޮކޭޝަން ޑިވެލޮޕް ކުރުމަކީ އަޅުގަނޑުމެންގެ ދެންމެ ފެނިގެންދިޔަ ތަސައްވުރުގައި ހިމެނޭ ގޮތް،" ރައީސް ވިދާޅުވި އެވެ.
އެމަނިކުފާނު ވިދާޅުވީ އެ މަސައްކަތް މިހާރު ވެސް ފަށާފައިވާ ކަމަށާއި އެކަމުގެ މަޝްވަރާ އަންނަ އާދީއްތަ ދުވަހު ކެބިނެޓުގައި ވެސް ކުރައްވާނެ ކަމަށެވެ.
"އިރާދަކުރެއްވިޔާ މި އަންނަ އާދީއްތަ ދުވަހު އޮންނަ ކެބިނެޓް ބައްދަލުވުމުގައި މަޝްވަރާކޮށް ނިންމޭނެ ކަމަށް މޯލްޑިވްސް އިންޓަނޭޝަނަލް ފައިނޭންޝަލް ސާވިސާސް އޮތޯރިޓީގެ ނަމުގައި އާ އޮތޯރިޓީއެއް އެސްޓެބްލިޝް ކުރަން. މޯލްޑިވްސް އިންޓަނޭޝަނަލް ފައިނޭންޝަލް ސާވިސާސް އޮތޯރިޓީވެގެންދާނީ އިންޓަނޭޝަނަލް ފައިނޭންޝަލް ސެންޓާސް ރާއްޖޭގައި ގާއިމް ކުރުމުގެ މަގު މިވަގުތަށް އެޅޭ ފުރަތަމަ ފިޔަވަޅު ކަމަށް،" އެމަނިކުފާނު ވިދާޅުވި އެވެ.
އެ ދެ މަޝްރޫއަކީ ސަރުކާރުން މިހާތަނަށް އިއުލާނު ކުރި އެންމެ ފުރަތަމަ ދެ އެސްއީޒެޑް ޒޯނެވެ. ސްޕެޝަލް އިކޮނޮމިކް ޒޯނަކީ ބައެއް ހާއްސަ އިނާޔަތްތައް ލިބިދޭނެ ޒޯންތަކެކެވެ. އެފަދަ ތަނަކަށް އިންވެސްޓް ކުރެވޭނެ އެންމެ ދަށް އަދަދެއް ސަރުކާރުން ކަނޑައަޅާފައި އޮވެ އެވެ.
