އެމްޑީޕީގެ 13 މެމްބަރަކު ވެރިކަންކުރާ ޕާޓީ، ޕީއެންސީއަށް ބަދަލުވުމާ ގުޅިގެން ކުރީގެ ރައީސް އަބްދުﷲ ޔާމީންގެ ގާނޫނީ ވަކީލު ޑރ. މުހައްމަދު ޖަމީލު އަހުމަދު ފާޑުވިދާޅުވެއްޖެ އެވެ.
ޖަމީލް ވިދާޅުވީ އެ މެމްބަރުންނަކީ ކުރިން ޕީއެންސީ/ޕީޕީއެމްގެ ކޯލިޝަނުން ދެކޮޅު ހެދި އަދި ފާޑުކިޔަމުން ދިޔަ ކަންކަން ދިފާއުކުރައްވަން ތިއްބެވި ބޭފުޅުން ކަމަށެވެ. އެފަދަ ކަންކަމުގެ ދިގު ލިސްޓެއް އޭނާ ލިޔުއްވާފައިވެ އެވެ. އޭގެ ތެރޭގައި އެމްޑީއެން ދިފާއު ކުރުމާއި ކަނޑު ވިއްކާލުން ދިފާއު ކުރިކަން އިސް ކަމެއްގެ ގޮތުގައި ފާހަގަކޮށްފައިވެ އެވެ.
"މިއަދު މި ގުޅުނީ އިއްޔެ ބޭރު ސިފައިން ތިބުން ދިފާއުކުރި މީހުން. މިއަދު މިގުޅުނީ ޕީޕީއެމް/ ޕީއެންސީ ބުނަމުންދިޔަ 'ޗޯރު' ސަރުކާރު ދިފާއުކުރި މީހުން،" ޖަމީލް ވިދާޅުވި އެވެ.
އެ މެމްބަރުން ޕީއެންސީއާ ގުޅުމަށް އެތައް މިލިއަނުން ރުފިޔާ ނެގި ކަމަށް ތުހުމަތުކޮށްފައި ވާއިރު ސަރުކާރުގައި ތިއްބެވި އިލްމުވެރިން ރިޝްވަތުގެ އަމަލަށް ދޭނީ ހުއްޖަތެއްތޯ ސުވާލު އުފައްދައި ޖަމީލު ވިދާޅުވީ އިސްލާމީ އުއްމަތުގައި އެފަދަ އިލްމުވެރިން ވެސް ފެނިފައިވާ ކަމަށެވެ.
މި ސަރުކާރުގެ މޮޓޯ "ދިވެހީންގެރާއްޖެ" ދަތުރަކީ ފަސާދަ އާއި ކޮރަޕްޝަނާއި ރިޝްވަތުން ޖަރީ ކުރެވިފައިވާ ނާމާން ދަތުރެއް ކަމަށް ވެސް ޖަމީލް ވިދާޅުވި އެވެ.
އެމްޑީޕީގެ މެމްބަރުން ވެރިކަންކުރާ ޕީއެންސީއަށް ކުއްލިއަކަށް ބަދަލުވުމާ ގުޅިގެން އެ މެމްބަރުންނާއި ސަރުކާރަށް ފާޑުކިޔުން ވަނީ އަމާޒުވެފަ އެވެ.
