ދިވެހިރާއްޖެއިން ނައްތާލާފައިވާ ފައިލޭރިއާގެ ކޭސްތަކެއް ގްރޭޓާ މާލެ ސަރަހައްދުން ފެނިފައިއިރު އެ ބަލި ފެތުރުން ކޮންޓްރޯލް ކުރުމަށް އާބަންކޯގެ އިސްނެގުމަށް ގިނަ މަސައްކަތްތަކެއް އެކި ސަރަހައްދުތަކުގައި ފަށައިފި އެވެ.
އެގޮތުން, އާބަންކޯއިން ވަނީ މި މަހުގެ 22 ވަނަ ދުވަހު އެޗްޕީއޭ އާއި ދިވެހި ރެޑް ކްރެސެންޓާއި ގުޅިގެން ހުޅުމާލޭގައި ދިރިއުޅޭ ބިދޭސީންގެ ހެލްތު ސްކީރިންން ކުރިއަށްގެންގޮސްފަ އެވެ. އޭގެ އިތުރުން ތިލަފުށި، ގުޅީފަޅު އަދި ހުޅުމާލެ ހިމެނޭހެން ޑިސެމްބަރު 23, ގައި ރެންޑޮމް ސާމަޕް ނަގާފައިވާ ކަމަށް ވެސް އެ ކުންފުނިން ބުންޏެވެ.
އޭގެ އިތުރުން, "ފައިލޭރިއާއިން ރައްކާ" ގެ ނަމުގައި ކެމްޕޭނެއް ފަށައި, ހުޅުމާލެ 12 ޒޯނަކަށް ބަހާލައިގެން ކޮންމެ ޒޯނެއްގައި ވެސް މަދިރި އާލާވާ ތަންތަން ދެނެގަނެ މުޅި ހުޅުމާލޭގެ ސާވޭ ވަނީ ފަށާފަ އެވެ. އަދި, ސްކޫލުތަކަށާއި ސަރުކާރު އަދި އަމިއްލަ ކުންފުނި މުއައްސަސާތަކުގެ މުވައްޒިފުންނަށް ހޭލުންތެރި ކުރުވުމުގެ ޕްރޮގްރާމެއް ވެސް އާބަންކޯއިން ފެށުމަށް ވަނީ ނިންމާފަ އެވެ.
ހުޅުމާލޭގައި ދިރިއުޅޭ މީހުންނާއި، ސްކޫލް ކުދިންނާއި ސަރުކާރު އޮފީސް އަދި އަމިއްލަ ކުންފުނިތައް ހިމެނޭހެން ސާފުކުރުމުގެ ބޮޑު ހަރަކާތެއް ވެސް ބޭއްވުމަށް އާބަންކޯއިން ވަނީ ނިންމާފަ އެވެ.
ހުޅުމާލެ އިން މި ބައްޔަށް ޕޮޒިޓިވް ފަސް މީހަކު އަދި މާލެއިން ޕޮޒިޓިވް އެކަކު ފެނިފައިވެ އެވެ. ޕޮޒިޓިވް ކޭސްތައް ފެނިފައި ވަނީ، ބިދޭސީން މަސައްކަތްކުރާ ސައިޓުތަކުން ނެގި ސާމްޕަލްތަކުންނެވެ.
ހުޅުމާލެއިން ފަސް މީހުން ޕޮޒިޓިވްވީ ޓެސްޓު ކުރި 25 މީހުން ތެރެއިންނެވެ. މާލެއިން އެކަކު ޕޮޒިޓިވް ވީ، ޓެސްޓު ކުރި 15 މީހުންގެ ތެރެއިންނެވެ. ގުޅީފަޅުން ޓެސްޓު ކުރި 20 މީހުން ތެރެއިން ވެސް، އެކަކު ޕޮޒިޓިވް ވެފައިވެ އެވެ.
