ރައީސް ޑރ. މުހައްމަދު މުއިއްޒުގެ ހުވަފެނީ މަޝްރޫއު، ފުށިދިއްގަރުފަޅު ހިއްކަން ރާއްޖޭގައި މިހާރު ވެސް ބިޔަ މަޝްރޫއުތައް ހިންގަމުން އަންނަ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓަރަކްޝަން ކުންފުންޏާ ހަވާލުކުރަން ނިންމައިފި އެވެ.
އެ މަޝްރޫއުގެ އެއްބަސްވުމުގައި އާބަންކޯ އާއި ސީއެމްސީސީއާ ދެމެދު މިރޭ ސޮއިކުރާނެ ކަމަށް ވަނީ އެނގިފަ އެވެ. ނަމަވެސް، އެއްބަސްވުމާ ގުޅޭ ގޮތުންނާއި މަޝްރޫއުއާ ގުޅޭ ގޮތުން ސަރުކާރާއި އާބަންކޯއިން ވެސް މައުލޫމާތެއް އަދި ހާމައެއް ނުކުރެ އެވެ.
ސީއެމްސީސީއާ މަޝްރޫއު ހަވާލުކުރަނީ ކޮން ޝަރުތު ތަކަކަށް ކަމެއް، ކޮން އަގަކަށް ކަމެއް އަދި ޕްރޮޖެކްޓަށް ފައިސާ ހޯދަނީ ކިހިނެއް ކަމެއް ހާމައެއް ނުކުރެ އެވެ.
މާލެގެ ދެކުނުން 16 ކިލޯމީޓަރު ދުރުގައިވާ ބިޔަ ފަޅު ހިއްކައި އެތަން އާބާދުކުރުމަކީ ރައީސް މުއިއްޒުގެ ރިޔާސީ ވައުދެކެވެ. އެހެންވެ، އެ މަޝްރޫއު ފެށުމަށް އަންނަ އަހަރަށް ލަފާކުރާ ބަޖެޓަށް 400 މިލިއަން ރުފިޔާ ޖެހި އެވެ.
ނަމަވެސް އެމްޑީޕީގެ މެޖޯރިޓީ އޮތް ރައްޔިތުންގެ މަޖިލީހުގެ ބަޖެޓު ދިރާސާކުރާ ކޮމިޓީން ވަނީ ބަޖެޓުން އެ 400 މިލިއަން އުނިކޮށް، އެމްޑީޕީ ސަރުކާރުން ފެށި ގިރާވަރު، ގުޅިފަޅު އަދި ހުޅުމާލެއިން ގޯދި ދޭ ސަރަހައްދުގައި ވަސީލަތްތައް ގާއިމުކުރަން 200 މިލިއަން ރުފިޔާ ބަދަލުކޮށްފަ އެވެ. އަނެއް 200 މިލިއަން ރުފިޔާ ވަނީ އެކި މަޝްރޫއުތަކަށް ބަހާލައިފަ އެވެ.
އެބަދަލާ ގުޅޭ ގޮތުން ސަރުކާރުން ރަސްމީ އެއްވެސް ބަހެއް ނުބުނެ ތިބެ، މަޝްރޫއު ބަޔަކާ ހަވާލުކުރަން އެ ވަނީ ނިންމައިފަ އެވެ.
ގާތްގަނޑަކަށް 1،280 ހެކްޓަރުގެ ފުށިދިއްގަރުފަޅު 10 ވަރަކަށް މަސްތެރޭގައި ހިއްކައި ނިންމާލެވޭނެ ރައީސް މުއިއްޒު ކުރިން ވަނީވިދާޅުވެފަ އެވެ. އެއަށްފަހު އެތަނުގެ ވަށައިގެން ބޮޑު ހިލަޖަހައި ބޭނުންވާ އިންވެސްޓްމަންޓްތައް ގެންނާނެ ކަމަށް އެ މަނިކުފާނު ވިދާޅުވެފައިވެ އެވެ.
ސީއެމްސީސީއާ މަޝްރޫއު ހަވާލުކުރަނީ ހިއްކުމާއި ގޮނޑުދޮށް ހިމާޔަތްކުރުމާއެކު އެވެ.
މުއިއްޒުގެ ރިޔާސީ ވައުދަކީ މާލެ ސަރަހައްދު ކައިރީގައި އޮތް، އަދި މި ސަރުކާރުން ވެސް ހިއްކަން ފަށާފައިވާ ގިރާވަރުފަޅާއި ގުޅީފަޅުގެ އިތުރުން ފުށިދިއްގަރުފަޅު ހިއްކައިގެން 65،000 ގޯތި ދޫކުރުމެވެ. ފުށިދިއްގަރު ފަޅުން 11،970 ގޯއްޗާއި، ތިން ކޮޓަރި އަދި ހަތަރު ކޮޓަރި އެޕާޓްމަންޓްތަކުގެ 26،500 ހައުސިން ޔުނިޓް އެޅުމަށް ރައީސް މުއިއްޒުގެ މެނިފެސްޓޯގައި ވަނީ ހިމަނައިފަ އެވެ.
ފުށިދިއްގަރުފަޅު ހިއްކަން ގެންނާނީ ދުނިޔޭގެ އެންމެ ބޮޑެތި ޑްރެޖަރުތައް ކަމަށާއި އެ މަޝްރޫއު ކުރިއަށް ގެންދާނީ ދައުލަތުން ބޮޑު ހަރަދެއް ކުރަން ނުޖެހޭ ފޯމިއުލާއެއް ބޭނުންކޮށްގެން ކަމަށް ވެސް ރައީސް މުއިއްޒު ވަނީ ވިދާޅުވެފަ އެވެ.
އެތައް ސަތޭކަ މިލިއަން ޑޮލަރު ހޭދަކޮށްގެން ފުށިދިއްގަރުފަޅު ތަރައްގީކުރިޔަސް، މާލެ އާއި އެ ފަޅާދެމެދު އޮތް މާކަނޑަކީ، ވަރަށް ގަދަ ކަނޑެކެވެ. އެ ދެމެދުގައި ބްރިޖެއް ނޭޅޭނެ ކަމަށް ތަޖުރިބާކާރުން ބުނެއެވެ.
ފުށިދިއްގަރުފަޅު ހިއްކަން ބޭރު ބަޔަކާ ހަވާލުކުރަން ނިންމާފައިވާއިރު، އެ މަޝްރޫއުއާ ގުޅޭ ގޮތުން ކުރިން އެމްޓީސީސީގެ މެނޭޖިން ޑިރެކްޓަރަކަށް ހުންނެވި އާދަމް އާޒިމް ވިދާޅުވީ އެ މަޝްރޫއު އެމްޓީސީސީއާ ހަވާލުކޮށްފި ނަމަ ދައުލަތުގެ މާލިއްޔަތުން 100 މިލިއަން ޑޮލަރު ސަލާމަތް ކުރެވޭނެ ކަމަށެވެ.
