ބޮލީވުޑްގެ އަލިގަދަ ތަރި އަމީތާބް ބައްޗަން ހުށަހަޅައިދޭ މަޝްހޫރު ޓީވީ ޝޯ "ކޯން ބަނޭގާ ކަރޯޑްޕަތީ" ގައި ރާއްޖޭގެ ރިޔާސީ އިންތިހާބާ ގުޅޭ ސުވާލެއް އަހައިފި އެވެ.
އަމީތާބް އެ ޝޯގެ ބައިވެރިޔަކާ ކުރި ސުވާލަކީ "އިބްރާހިމް މުހައްމަދު ސޯލިހު ބަލިކޮށް މުހައްމަދު މުއިއްޒު ކާމިޔާބުކުރީ ކޮން ގައުމެއްގައި ސެޕްޓެމްބަރު 2023 ގައި ބޭއްވި ރިޔާސީ އިންތިހާބެއްގައިތޯ؟" އެވެ. މި ސުވާލުގެ ޖަވާބުގެ ގޮތުގައި އިހްތިޔާރުކުރަން ދިން ގައުމުތަކީ ރާއްޖޭގެ އިތުރުން އިންޑޮނޭޝިއާ އާއި މެލޭޝީއާ އާއި ކޮމޮރޮސް އެވެ.
ސުވާލު ކުރުމާއެކީ ޖަވާބު ދޭން ހުރި މީހާ، ނިކަން ފަސޭހައިން ޖަވާބު ދެމުން ބުނީ، އެހާ ފަސޭހައިން ޖަވާބު އެނގުނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިންޑިއާ ދެކޮޅު ސިޔާސަތުތަކާ ހެދި ކަމަށެވެ.
ޖަވާބު ރަނގަޅު ކަމަށް ބުނުމަށް ފަހު އަމީތާބް، ރައީސް މުއިއްޒު އިންތިހާބުވެވަޑައިގެންނެވީ މާލެ ސިޓީގެ މޭޔަރުކަމުގައި ހުންނެވުމަށް ފަހު ކަން ފާހަގަކުރި އެވެ. އަދި ޕްރޮގްރާމްގެ ބައިވެރިޔާއަށް އެހާ ފަސޭހައިން ޖަވާބު އެނގުނީ ފޮރިން ސާވިސްގައި މަސައްކަތް ކުރުމުގެ ހުވަފެން ބަލާތީ ކަމަށް ބުނެ އަމީތާބް ސަމާސާ ވެސް ކޮށްލި އެވެ.
ރައީސް މުއިއްޒާ އެކު އިންޑިއާ އައުޓަށް އިންޑިއާ މީޑިއާތަކުގެ ބޮޑު ސަމާލުކަމެއް
އިންޑިއާގެ ގިނަ ބަޔަކު ބަލާ، މަގުބޫލު ޓީވީ ޝޯއެއްގައި އިންޑިއާއާ ދެކޮޅު ސިޔާސަތުގެ ވާހަކަ އެނގޭ ކަމަށް އިންޑިއާ މީހަކު މިބުނީ، ރައީސް މުއިއްޒު އިންތިހާބު ކާމިޔާބު ކުރި ފަހުން "އިންޑިއާ އައުޓް" ހަރަކާތަށް އެ ގައުމުގެ މީޑިއާތަކުގެ ސަމާލުކަން އިތުރުވެފައިވާ ދަނޑިވަޅެއްގަ އެވެ.
އިންޑިއާ މީޑިއާތަކުގައި ރައީސް މުއިއްޒު މުޅިންހެން ސިފަކޮށްފައި ވަނީ "ޗައިނާއާ ރައްޓެހި، އިންޑިއާއާ ދެކޮޅު" ވެރިއެއްގެ ގޮތުގަ އެވެ. މިކަމަށް ބާރު ދޭން ބޭނުންކުރަނީ އިންޑިއާ އައުޓް ހަރަކާތުގައި އެމަނިކުފާނު އަމަލީ ގޮތުން ބައިވެރިވެވަޑައިގެންފައި ވާތީ އާއި ކުރީގެ ރައީސް އަބްދުﷲ ޔާމީންގެ ސަރުކާރުގައި ޗައިނާއިން ފަންޑު ހޯދައިގެން ހިންގި ގިނަ ޕްރޮޖެކްޓުތަކުގައި ހަރަކާތްތެރިވެފައި ވާތީ އެވެ.
އޭގެ އިތުރުން ރާއްޖޭގައި ތިބި އިންޑިއާ ސިފައިން ބޭލުމަކީ ވެސް ރައީސް މުއިއްޒުގެ ވައުދެކެވެ. އަދި ވެރިކަމުގެ ފުރަތަމަ ދުވަހު މި މަސައްކަތް ފަށްޓަވާނެ ކަމަށް ވިދާޅުވި އެވެ.
އެގޮތުގެ މަތިން އެމަނިކުފާނުގެ ހުވާކުރެއްވުމުގެ ރަސްމިއްޔާތަށް ވަޑައިގެންނެވި އިންޑިއާ ސަރުކާރުގެ މަންދޫބު އަރިހުގައި އެ ވާހަކަ ނަންގަތް ކަމަށް ރައީސް އޮފީހުން ހާމަކުރި އެވެ.
ދުބާއީގައި ބޭއްވި ތިމާވެއްޓާބެހޭ ބައިނަލްއަގުވާމީ ސަމިޓު، ކޮޕް 28 ގެ ހަވާސާގައި އިންޑިއާގެ ބޮޑުވަޒީރު ނަރެންދުރަ މޯދީއާއެކު ރައީސް މުއިއްޒު ބޭއްވި ބައްދަލުވުމުގައި އިންޑިއާ ސިފައިން ބޭލުމުގެ ވާހަކަ ދެއްކެވިތޯ ސުވާލުކުރުމުން ސާފު ޖަވާބެއް ނުދެއްވަ އެވެ. އެ މަނިކުފާނު ވިދާޅުވީ އިންޑިއާ ސިފައިން ގެންދިޔުމާ ގުޅޭ ގޮތުން އެ ގައުމުގެ ސަރުކާރުން އިޖާބަދީ، އެކަމަށް އެއްބަސްވެފައިވާ ކަމަށެވެ. ނަމަވެސް އިންޑިއާ ސަރުކާރުން ސިފައިން ގެންދަން އެއްބަސްވެފައިވާ ކަމަށް ބާރުދޭ އެއްވެސް ވާހަކައެއް އިންޑިއާ އާއި ބައިނަލްއަގުވާމީ މީޑިއާތަކުން ރިޕޯޓުކޮށްފައި ނެތެވެ.
