އިންޑިއާގެ ލޯނު އަދި ގްރާންޓް އެހީތައް މެދުވެރިކޮށް ރާއްޖޭގައި ހިންގާ އުމްރާނީ ތަރައްގީގެ މަޝްރޫއުތަކާ ގުޅޭ ގޮތުން އެ ގައުމުގެ ފޮރިން މިނިސްޓަރު ސުބްރަމަންޔަމް ޖައިންޝަންކަރުއާ ރާއްޖޭގެ ފޮރިން މިނިސްޓަރު އަބްދުﷲ ޝާހިދު މިއަދު މަޝްވަރާ ކުރައްވައިފި އެވެ.
ޝާހިދު އިންޑިއާއަށް ކުރައްވާ ރަސްމީ ދަތުރުފުޅުގެ ތެރެއިން އެ ގައުމުގެ ފޮރިން މިނިސްޓަރާ ބައްދަލުކުރެއްވުމަށް ފަހު، ބައްދަލުވުމުގެ ބައެއް ފޮޓޯތައް ޓްވީޓާއަށް ވަނީ ދޫކޮށްލައްވައިފަ އެވެ.
އެ ޓްވީޓްގައި ޝާހިދު ލިޔުއްވާފައިވާ ގޮތުން ބައްދަލުވުމުގައި މައިގަނޑު ގޮތެއްގައި ވާހަކަ ދެއްކެވި މައުޟޫއަކީ ރާއްޖޭގައި އިންޑިއާގެ ލޯނު އަދި ހިލޭ އެހީ މެދުވެރިކޮށް ހިނގާ ތަރައްގީގެ މަޝްރޫއުތަކާއި، ދެ ގައުމުގެ ތަރައްގީއަށް ވެސް ގުޅިގެން ކުރެވިދާނެ މަސައްކަތްތަކާ ގުޅޭ ގޮތުންނެވެ.
އޭގެ އިތުރަށް، އިންޑިއާ ކަނޑުގެ ސުލްހަމަސަލަސްކަމާއި އަމާންކަން ދެމެހެއްޓުމަށް ދެ ގައުމުގެ އަސްކަރިއްޔާއިން ގުޅިގެން ކުރަމުން އަންނަ މަސައްކަތްތަކާ ގުޅޭ ގޮތުން ވެސް ވާހަކަ ދެއްކެވި ކަމަށް ޝާހިދު ލިޔުއްވާފައިވެ އެވެ.
ރައީސް އިބްރާހިމް މުހައްމަދު ސޯލިހު ވެރިިކަމާ ހަވާލުވެވަޑައިގަތް ފަހުން، ރާއްޖޭން އެންމެ ގާތް ގުޅުމެއް ބާއްވަނީ އިންޑިއާއާ އެކުގަ އެވެ. ރާއްޖޭގައި މިހާރު ހިންގާ އެންމެ ބޮޑެތި އުމްރާނީ މަސައްކަތްތައް ހިންގަނީ އިންޑިއާއިން ދޫކޮށްފައިވާ ފަންޑުތައް މެދުވެރިވެގެނެވެ.
މި ސަރުކާރުން ފަށާފައިވާ އެންމެ ބޮޑު އެއް މަޝްރޫއު ކަމަށްވާ މާލޭން ތިލަފުއްޓާ ހަމައަށް ގުޅާލާ ބްރިޖާއި ގުޅީފަޅުގައި ބައިނަލްއަގްވާމީ ވިޔަފާރި ބަނދަރު ތަރައްގީ ކުރުމުގެ މަޝްރޫއަކީ ވެސް އިންޑިއާގެ އެގްޒިމް ބޭންކުން ދިން 400 މިލިއަން ޑޮލަރުގެ ކްރެޑިޓް ފެސިލިޓީއާއި 100 މިލިއަން ޑޮލަރުގެ ހިލޭ އެހީ އެވެ.
މީގެ އިތުރުން، ހދ. ހަނިމާދޫ އިންޓަނޭޝަނަލް އެއާޕޯޓް ތަރައްގީ ކުރުމުގެ މަޝްރޫއާއި ލ. ގަމުގައި ކެންސަރު ހޮސްޕިޓަލް އެޅުމާއި އަދިވެސް ރަށްރަށުގައި އެކި ފެންވަރު އެކި މަސައްކަތްތައް ކުރުމަށް އިންޑިއާއިން ފައިސާ ހަމަޖައްސާދީފައިވެ އެވެ. އޭގެ ތެރޭގައި ސްކޫލްތަކާއި ހޮސްޕިޓަލްތަކާއި ބަނދަރުތައް ތަރައްގީ ކުރުމާއި، މަގުބައްތި ބެހެއްޓުމުގެ މަސައްކަތްތައް ވެސް ހިމެނެ އެވެ.
