މީގެ ތިނެއް ނޫނީ ހަތަރު އަހަރު ކުރިއަށް ބަލާއިރު، ރާއްޖެ އަކީ ވެސް ބަލިކުރަން އުނދަގޫ ޓީމެއް ކަމަށް އިންޑިއާގެ ކެޕްޓަން، ސުނިލް ޗެތުރީ ބުނެފި އެވެ.
އެންމެ ފަހުން ބޭއްވި ސާފް ޗެމްޕިއަންޝިޕް ފުޓްބޯޅަ މުބާރާތުގެ މޮޅު ކުުޅުންތެރިޔާގެ މަގާމު ހޯދި ޗެތުރީ، 38، ވަނީ މި ފަހަރުގެ މުބާރާތުގައި މިހާތަނަށް ފަސް ގޯލު ޖަހައިފަ އެވެ. މި ފަހަރުގެ ސާފް ޗެމްޕިއަންޝިޕްގެ މޮޅު ކުޅުންތެރިޔާގެ މަގާމަށް ވެސް ވާދަކުރާ ކުޅުންތެރިންގެ ތެރޭގައި ޗެތުރީ ހިމެނެ އެވެ.
ސާފް ޗެމްޕިއަންޝިިޕްގެ ސެމީ ފައިނަލް މެޗުތަކުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ޗެތުރީ ވަނީ އޭނާގެ ކުޅުމުގެ ކެރިއަރާއި އިންޑިއާ ފުޓްބޯޅައިގެ އިތުރުން ސާފްގެ ފުޓްބޯޅައާ ބެހޭގޮތުން ގިނަ ވާހަކަތަކެއް ދައްކައިފަ އެވެ.
އެ ގޮތުން ޗެތުރީ އަށް އަމާޒުވި އެއް ސުވާލަކީ އިންޑިއާ އިން މިހާރު ފުޓްބޯޅައިން ހޯދަމުން އަންނަ ކުރިއެރުމާއި މި ހުރިހާ ކަމަކަށް ބަލާއިރު، އެ ޓީމު އެ ދަނީ ސާފްގެ އެހެން ގައުމުތަކަށް "އަތްނުފޯރާ ފަށަށް" ކަމަށް ގިނަ ބަޔަކު ދެކެ އެވެ. އެކަމާ މެދު ހާއްސަކޮށް މި ސަރަހަައްދުގެ ފުޓްބޯޅައިގެ ހާލަތާ މެދު ދެކެނީ ކިހިނެއްތޯ އެހުމުން ޗެތުރީ ބުނީ އިންޑިއާ އިން އޭޝިއަން ކަޕްގައި ވާދަކުރާތީ އެ ޓީމު ވަރަށް ބޮޑަށް ކުރިއަރައިގެން ދިޔަ ކަމަށް ބެލެވިދާނެ ކަމަށާއި އެކަމަކު، ހަގީގަތަކީ ކޮންމެ ގައުމެއްގެ ފުޓްބޯޅައިގައި ވެސް އެކި ހާލަތްތައް އަންނާނެ ކަމަށެވެ.
"ބަންގްލަދޭޝަކީ އެއް މިސާލެއް. އެ މީހުން ވަރަށް ރަނގަޅަށް މަސައްކަތް އެބަކުރޭ. އަހަންނަށް ޔަގީން ނޭޕާލް ވެސް ދެން އެހެން ޓީމުތަކުން ވެސް ވަރަށް ރަނގަޅަށް މަސައްކަތް ކުރާނެ ކަމަށް. ރާއްޖެ އަކީ މީގެ ތިނެއް ނޫނީ ހަތަރު އަހަރު ކުރިން ބަލިކުރަން އުނދަގޫ ޓީމެއް. އެެހެންވީމަ އަހަންނަށް ހީވަނީ ކޮންމެ ޓީމަަކަށް ވެސް އެބަ އާދޭ ފޭސް އެއް. އެ ނިމުމަށް ފަހު މަސައްކަތް ކޮށްގެން ހާލަތު ބަދަލުކުރެވޭނެ،" ޗެތުރީ ބުންޏެވެ.
ޗެތުރީ ބުނީ އިންޑިއާ މި ވަގުތު ދުނިޔޭގެ ރޭންކިންގެ 100 ވަނަ އަށް އެރި ނަމަވެސް އެ ގައުމުގައި މި ވަގުތު އޮތް ޓީމަކީ ތާރީހުގައި ވެސް ފެނުނު އެންމެ މޮޅު އިންޑިއާ ޓީމޭ ބުނަން ނޭނގޭނެ ކަމަށެވެ. އަދި އެ ގޮތަށް އެއް އިރެއްގެ ޓީމަކާއި އަނެއް އިރެއްގެ ޓީމެއް އަޅާކިޔުމަކީ އެންމެ ރަނގަޅު ގޮތް ކަމަށް ވެސް ނުވާނެ ކަމަށް ޗެތުރީ ވަނީ ބުނެފަ އެވެ.
"އަހަރެން ކުރާ ކަމެއް ނޫން، އެއް ޖީލު އަނެއް ޖީލާ އަޅާކިޔުމަކީ، ތާރީހީ ގިނަ ކަންކަން އިންޑިއާ ފުޓްބޯޅައިގައި އެބަހުރި،" ޗެތުރީ ބުންޏެވެ.
އިންޑިއާ އިން ދިގު ސީޒަނަކަށް ފަހު މިދިޔަ މެއި މަހު މެދުތެރޭގައި އިންޓަ ކޮންޓިނެންޓަލް ކަޕާއި ސާފް ޗެމްޕިއަންޝިޕަށް ޕްރެކްޓިސް ފެށިއިރު، ހުރިހާ ކުޅުންތެރިން ތިބީ ވަރަށް ވަރުބަލިކޮށް ކަމަށް ޗެތުރީ ވަނީ ބުނެފަ އެވެ. އެކަމަކު، ޕްރެކްޓިސް ފަށައިގެން ހަފްތާއެއް ތެރޭ ހުރިހާ ކުޅުންތެރިން ރަނގަޅު ހާލަތަށް އައިސް، އެއް ރޫހެއްގައި މަސައްކަތް ކުރުމުގެ ނަތީޖާ އަކަށްވީ އިންޓަކޮންޓިނެންޓަލް ކަޕް ކާމިޔާބު ކުރެވުން ކަމަށާއި ބޭނުންވަނީ އެ ފޯކަސް ގެއްލުވައިނުލައި ސާފް ޗެމްޕިއަންޝިޕްގައި ވެސް ކުރިއަށް ދިއުމަށް ކަމަށް ޗެތުރީ ވަނީ ބުނެފަ އެވެ.
އިންޑިއާ އިން ވަނީ އިންޓަކޮންޓިނެންޓަލް ކަޕްގައި ލެބަނަންއާ ދެ ފަހަރު ކުޅެފަ އެވެ. އެއް މެޗުން 0-0 އިން އެއްވަރުވިއިރު، ފައިނަލުގައި ޗެތުރީގެ ވެސް ލަނޑަކާ އެކު، އިންޑިއާ މޮޅުވީ 2-0 އިންނެވެ. މިރޭ، ސާފް ޗެމްޕިއަންޝިޕްގެ ސެމީ ފައިނަލުގައި ލެބަނަންއާ ކުޅޭއިރު، އެ ޓީމުން ކުރިން ދެ މެޗުގެ ބަދަލެއް ހިފަން ވިސްނާނެ ކަމަށް ޗެތުރީ ވަނީ ބުނެފަ އެވެ.
ލެބަނަންގެ ކޯޗު އަލެކްސަންޑަ އިލިކް ވަނީ ޗެތުރީ އަކީ އޭރިއާތެރޭގެ ކޮންމެ ހިސާބަކުން ބޯޅަ ލިބުނު ކަމުގައި ވިޔަސް ނުރައްކާކުރާ ކުޅުންތެރިއެއް ކަމަށް ބުނެފަ އެވެ. އަދި ޗެތުރީގެ އިތުރުން އިންޑިއާ އެޓޭކްގައި ބައިވެރިވާ ހުރިހާ ކުުޅުންތެރިންނަށް މުޅި މެޗުގައި ލެބަނަން އިން ސަމާލުވާން ޖެހޭނެ ކަމަށް އިލިކްގެ ވާހަކައިގައި ފާހަގަކުރި އެވެ.
