އޭނާ އަކީ އަބަދުވެސް ރާއްޖޭގެ ފުޓްބޯޅަ ތަރި، އަލީ އަޝްފާގު (ދަގަނޑޭ)ގެ ސަޕޯޓަރެއް ކަމަށާއި އެއްވެސް އިރެއްގައި ރެކޯޑަކާ މެދު ނުވިސްނާ ކަމަށް އިންޑިއާގެ ކެޕްޓަން ސުނިލް ޗެތުރީ ބުނެފި އެވެ.
ބެންގަލޫރުގައި މިހާރު ކުރިއަށްދާ ސާފް ބަންގުބަންދު ޗެމްޕިއަންޝިޕް 2023 ގެ ސެމީ ފައިނަލްގައި ލެބަނަންއާ ދެކޮޅަށް ކުޅޭ މެޗުގެ ކުރިން މިއަދު ބޭއްވި ނޫސްވެރިންގެ ބައްދަލުވުމުގައި ކުރި ސުވާލެއްގެ ޖަވާބު ދެމުން ޗެތުރީ ބުނީ ދަގަނޑޭއާ ވާހަކަ ދެކެވޭ ކަމަށާއި އަބަދުވެސް އޭނާ އަށް ސަޕޯޓްކުރާ ކަމަށެވެ.
"އަޝްފާގަށް އަހަރެން އަބަދުވެސް ސަޕޯޓް ކުރަން. އަހަރެން އަބަދުވެސް ވަރަށް ބަލައިގަންނަ ޕްލޭޔަރެއް އެއީ. މިއީ އަހަރެން މޮޑެސްޓްވާން ބުނާ އެއްޗެއް ނޫން، އަހަންނަކީ އެއްވެސް އިރެއްގައި ރެކޯޑަކަށް ބަލައިގެން މަސައްކަތް ކުރާ މީހެއް ނޫން،" ދަގަނޑޭ އަތުގައި ކުރިން އޮތް ސާފް ޗެމްޕިއަންޝިޕް ފުޓްބޯޅަ މުބާރާތަކުގެ ގޯލު ޖެހުމުގެ ރެކޯޑް މުގުރާލުމާ ބެހޭގޮތުން ސުވާލުކުރުމުން ޗެތުރީ، 38، ބުންޏެވެ.
ދަގަނޑޭއާ ގުޅުން އޮވޭތޯ ސުވާލުކުރުމުން ޗެތުރީ ބުނީ "އީދު، ދިވާލީ ނުވަތަ އެ ނޫން ވެސް ހާލަތްތަކުގައި މެސެޖް ކުރެވޭ" ކަމަށާއި ސާފް ޗެމްޕިއަންޝިޕް ފުޓްބޯޅަ މުބާރާތުގައި މި ފަހަރު ނުކުޅެވޭތީ ވެސް ވާހަކައެއް ދެކެވުނު ކަމަށެވެ.
"އަޝްފާގަކީ އަބަދުވެސް އަހަރެން ވަރަށް ބަލައިގަންނަ ކުޅުންތެރިއެއް، އަހަރެންް އޭނަ އަށް ވަރަށް ސަޕޯޓް ކުރަން،" ޗެތުރީ އޭނާގެ ވާހަކަ ތަކުރާރުކުރި އެވެ.
ދަގަނޑޭ އާއި ޗެތުރީ ވަނީ ސާފް ޗެމްޕިއަންޝިޕް ފުޓްބޯޅަ މުބާރާތްތަކުގައި ޖުމްލަ އެކު، 23 ގޯލު ޖަހައިފަ އެވެ. އެންމެ ފަހުން ދެ ސާފް ޗެމްޕިއަންޝިޕަށް ބަލާ ކަމަށްވާނަމަ ޗެތުރީ ވަނީ 10 ގޯލު ޖަހައިފަ އެވެ. އެންމެ ފަހުން 2021، ވަނަ އަހަރު ބޭއްވި ސާފް ޗެމްޕިއަންޝިޕްގައި ޗެތުރީ ޖެހީ ފަސް ގޯލެވެ. މި ފަހަރުގެ މުބާރާތުގައި މިހާތަނަށް ވަނީ ފަސް ގޯލު ޖަހައިފަ އެވެ.
ޗެތުރީ ވަނީ އިންޑިއާ ގައުމީ ޓީމަށް 132 މެޗުން 91 ގޯލު ޖަަހައިފަ އެވެ.
ނޫސްވެރިންގެ ބައްދަލުވުމުގައި ޗެތުރީ ވާހަަކަ ދައްކަނީ.--- ފޮޓޯ: މުހައްމަދު ޝާބިން/ އަދަދު
އަށް ފަހަރު ސާފް ޗެމްޕިއަންޝިޕްގެ ޗެމްޕިއަންކަން ހޯދާފައިވާ އިންޑިއާ އަކީ މި މުބާރާތުގެ އެންމެ ކާމިޔާބު ޓީމެވެ. ޗެތުރީ ބުނީ މި ފަހަރުގެ މުބާރާތަށް ދައުވަތު ދީގެން ކުޅޭ ކުވެއިތާއި ލެބަނަންގެ ސަަބަބުން މުބާރާތުގެ "ލެވަލް" މައްޗަށް ގޮސްފައިވާ ކަމަށެވެ.
މުބާރާތުގެ ސެމީ ފައިނަލުގައި މާދަމާ އިންޑިއާ އިން ލެބަނަން އާއި ކުޅޭއިރު، އަނެއް ސެމީގައި ކުވެއިތު ކުޅޭނީ ބަންގްލަދޭޝްއާ އެވެ. ޗެތުރީ ބުނީ އިންޑިއާ އާއި ބަންގްލަދޭޝް ފައިނަލަށް ދިއުމަކީ އޭނާ އެދޭ ގޮތް ކަމަށެވެ. އެކަމަކު، އެ ގޮތަށް އެކަން ނުހިނގައި އިންޑިއާ ފައިނަލަށް ނުގޮސް ހަަމައެކަނި، ބަންގްލަދޭޝް ފައިނަލަށް ގޮސްފިނަމަ އެ ޓީމަށް ވެސް ކާމިޔާބަށް އެދޭނެ ކަމަށް ޗެތުރީ ވަނީ ބުނެފަ އެވެ.
"މިއީ ސާފް ކަޕް، އަހަރެން ބޭނުން ސާފްގެ ޓީމަކަށް އެދެން، އަހަރެން މިހެން ބުނާއިރު އެންމެންނަށް ވެސް އެނގޭނެ ދަނޑުމަތީގައި އެއްވެސް އިރެއްގައި އަހަންނަށް ބަންގްލަދޭޝް ޓީމުގެ ފަރާތުން ފަސޭހައެއް ނުކުރޭ، އަހަރެމެންނާ ބަންގްލަދޭޝް ކުޅޭއިރު އެއީ ހަަމަ ހަނގުރާމައެއް،" ޗެތުރީ، ބުންޏެވެ.
އިންޑިއާ އިން ވަނީ ދާދި ފަހުން އެ ގައުމުގައި ބޭއްވި އިންޓަ ކޮންޓިނެންޓަލް ކަޕްގައި ލެބަނަން ބަލިކޮށް ޗެމްޕިއަންކަން ހޯދައިފަ އެވެ. ޗެތުރީ ބުނީ މާދަމާގެ މެޗުގައި ލެބަނަން އިން ނުކުންނާނީ އިންޑިއާގެ ކިބައިން "ބަދަލުހިފަން" ކަމަށާއި އެ އަށް ވިސްނައިގެން އެ ޓީމަށް ކުރެވޭނެ ހުރިހާ ކަމެއް ކުރާނެ ކަމަށެެވެ.
އިންޑިއާގެ ކޯޗު އީގޯ ސްޓިމަކް އަށް މި ފަހަރުގެ ސާފް ޗެމްޕިއަންޝިޕްގައި ދެއްކި ދެ ވަނަ ރަތް ކާޑުގެ ސަބަބުން މާދަމާ މެޗަށް އޭނާ އަށް ބެންޗަށް ނާދެވޭނެ އެވެ. ޗެތުރީ ބުނީ ކޯޗު ސްޓިމަކަށް ބެންޗުގައި ނުހުރެވުނަސް ޓީމު ތައްޔާރުކުރުމުގައި ކުރަން ޖެހޭ ހުރިހާ ކަމެއް ކުރާ ކަމަށާއި އެސިސްޓަންޓް ކޯޗު މަހޭޝް ގޯލީ އާއި އެހެން ކޯޗިން ސްޓާފުން ވެސް ޕްލޭނާ އެއްގޮތަށް ކުރިއަށްދާ ކަމަށެވެ.
