ސަރުކާރުގެ ބިންވެރިޔާ ސްކީމުގެ ދަށުން މާލެ ސަރަހައްދުން ގޯތި ލިބޭ މީހުންގެ ލިސްޓު މިއަދު އާންމުކުރާއިރު އެ ސްކީމަށް ޝަރުތު ހަމަވާ އެންމެނަށް ގޯތި ދޭނެ ކަން ސަރުކާރުން ހާމަކޮށްފި އެވެ.
އެކަން ހާމަކުރެއްވީ, ގޯތި ލިސްޓު އިއުލާން ކުރުމުގެ ކުރިން ބޭއްވި ނޫސްވެރިންގެ ބައްދަލުވުމެއްގައި ހައުސިން މިނިސްޓަރު މުހައްމަދު އަސްލަމް އެވެ.
ގޯއްޗާއި ފްލެޓަށް ކުރިމަތިލުމަށް ސަރުކާރުން ހުޅުވާލީ ޖޫން 26, 2022 ގަ އެވެ. މިހާރު ނިންމާފައި ވަނީ ހުޅުމާލޭން 1،000 ގޯތީގެ އިތުރުން، ގުޅީފަޅުން 2،000 ގޯއްޗާއި އަދި ގިރާވަރު ފަޅު ހިއްކާ އެ ބިމުން މަދުވެގެން 2,000 ގޯތި މާލޭ ރަށްވެހިންނަށް ދިނުމަށެވެ. އެ 5،000 ގޯތީގެ ތެރެއިން ފުރަތަމަ ބުރުގައި ދޫކުރާނީ 3،000 ގޯއްޗެވެ.
އެގޮތުން, މިއަދު އިއުލާންކުރާ 5,000 މީހުން ލިސްޓަކީ ލައިވް ލިސްޓެއް ކަމަށާއި އެ ލިސްޓު އަޕްޑޭޓް ކުރަމުންގޮސް ޝަރުތު ހަމަވާ އެންމެނަށް ގޯތި ދެވޭނެ ކަމަށް ހައުސިން މިނިސްޓަރު ވިދާޅުވި އެވެ.
މާލެއަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދައިދިނުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދުފުޅެކެވެ.
މިދިޔަ އޮކްޓޫބަރު މަހުގެ 15 ވަނަ ދުވަހަށް އެ މުއްދަތު ހަމަވި އިރު، ބިންވެރިޔާ ސްކީމްގެ ދަށުން ދޫކުރުމަށް ކަނޑައެޅި 3000 ގޯއްޗަށް އެދި ޖުމްލަ 15،164 މީހުން ހުށަހަޅާފައިވެ އެވެ.
އޭގެ ތެރެއިން ޝަރުތު ހަމަވީ 12،794 އެޕްލިކޭޝަނެވެ. އެއީ, 19,857 މީހުންނެވެ. އެހެންކަމުން, ބިންވެރިޔާ ސްކީމްގެ ދަށުން އަދި 7,794 ގޯތި ދޫކުރާނެ އެވެ.
އޭގެ އިތުރުން, ގެދޮރުވެރިޔާ ސްކީމްގެ ދަށުން ދޫކުރުމަށް ކަނޑައެޅި 4000 ފުލެޓަށް އެދި 20،697 މީހުން ހުށަހަޅާފައިވެ އެވެ. މި ސްކީމުގެ ދަށުން ފްލެޓު ލިބޭ މީހުންގެ ލިސްޓު އަދި އިއުލާނެއް ނުކުރެ އެވެ. ބެލެވޭ ގޮތުގައި ވަރަށް އަވަހަށް މި ލިސްޓު ވެސް އިއުލާން ކުރާނެ އެވެ.
ބިންވެރިޔާ ސްކީމްގެ ދަށުން ދޫކުރާ ގޯތީގެ ތެރެއިން އެންމެ ކުޑަ ގޯތީގައި ވެސް 1250 އަކަފޫޓު ހުންނާނެ ކަމަށް އޭރު ސަރުކާރުން ކުރި އިއުލާނުގައިވެ އެވެ.
