ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) ރީބްރޭންޑުކޮށް، "އާބަންކޯ"ގެ ނަމަށް ބަދަލުކޮށްފި އެވެ.
އެ ކުންފުނި ރީބްރޭންޑު ކޮށްފައިވަނީ މިއަދު ފާހަގަކުރަމުން ގެންދާ އެ ކުންފުނީގެ 22 ވަނަ އަހަރީ ދުވަސް ފާހަގަކުރުމަށް މިރޭ ބޭއްވި ރަސްމިއްޔާތެއްގަ އެވެ.
އެއާއެކު އެ ކުންފުނީގެ އިމާރާތުގެ ނަމާއި ލޯގާ ވެސް ވަނީ "އާބަންކޯ"އަށް ބަދަލުކޮށްފަ އެވެ. އަދި "އާބަންކޯ" މޯބައިލް އެޕްލިކޭޝަން ވަނީ ލޯންޗު ކޮށްފަ އެވެ. މި އެޕުން އެ ކުންފުނިން ދޭ ހުރިހާ ހިދުމަތެއް ފަސޭހަ ކަމާއެކު ލިބޭނެ އެވެ.
އެ ކުންފުނިން ބުނީ ރީބްރޭންޑުގެ އަސްލެއް ކަމުގައި ބަލާފައި ވަނީ ރައްޔިތުން ދެކޭ ހުވަފެންތައް ހަގީގަތަކަށް ހަދާ ދޭނެ ބައިވެރިއަކީ އާބަންކޯ ކަމުގައި ވުން ކަމަށެވެ.
އަދި މިބްރޭންޑިން ވެގެން ދާނީ މިހާރު ކުންފުނިން ދޭ ހިދުމަތްތައް ފުޅާ ކުރުމަށް ކުރެވޭ މުހިއްމު މަސައްކަތަށް ކަމަށް ބުންޏެވެ.
އާބަންކޯގެ އަމާޒަކީ މިހާރު، ރާއްޖޭގެ އެކި ސަރަހައްދުތަކުގައި ވެސް ސަރުކާރުގެ ވިސްނުމާއި އެއްގޮތަށް، ކައުންސިލްތަކާއި ގުޅިގެން ގެނެވެން ހުރި ތަރައްގީގެ މަސައްކަތްތައް ބަލައި، ލިބިފައިވާ ތަޖުރިބާ އާއި ހޯދިފައިވާ ކާމިޔާބީތަކުގެ ބޭނުންކޮށް ރައްޔިތުންނަށް ފައިދާ ހުރި ކަންތައްތައް ކުރުމަށް ކުންފުނި ފުޅާ ކުރުމެވެ.
އެ ކުންފުނި އެންމެ ފުރަތަމަ އުފައްދާފައިވަނީ ބޯހިޔާވަހިކަމުގެ މައްސަލައަށް ހައްލު ހޯދައިދިނުމުގެ 2001 ވަނަ އަހަރު ރައީސް އޮފީހުގެ ޔުނިޓެއްގެ ގޮތުގަ އެވެ. އޭގެ ފަހުން ހުޅުމާލެ ޑިވޮލޮޕްމެންޓު ކޯޕަރޭޝަންގެ ނަމުގައި ހިންގުމަށް ފަހު ފަހުން ކުންފުނި ހިންގާފައިވަނީ ހައުސިން ޑިވޮލޮޕްމެންޓު ކޯޕަރޭޝަން ނަމުގަ އެވެ.
