ރާއްޖެ ވަޑައިގެން އުޅުއްވާ ޔޫރަޕިއަން ޔުނިއަން (އީޔޫ) ގެ ސަފީރުންގެ ވަފުދަށް ރާއްޖޭން ޔޫރަޕަށް ބޭރުކުރާ މަހުގެ އުފެއްދުންތަކުގެ ޓެރިފް ކުޑަކުރުމަށް ރައީސް އިބްރާހީމް މުހައްމަދު ސޯލިހް ހުށަހަޅުއްވައިފި އެވެ.
ހަ ވަނަ "މޯލްޑިވްސް-އީޔޫ ޕޮލިސީ ޑައިލޮގް" ގައި ބައިވެރިވެވަޑައިގަތުމަށް ރާއްޖެ ވަޑައިގެން އުޅުއްވާ އީޔޫގެ ސަފީރުންނާ ރައީސް މިއަދު ބައްދަލުކުރެއްވީ ރައީސް އޮފީހުގަ އެވެ.
ރައީސް އޮފީހުން ބުނި ގޮތުގައި މި ބައްދަލުވުމުގައި ރައީސް ވަނީ ދިވެހިންނަށް މުހިންމު ދެ ކަމަކާ ގުޅޭ ގޮތުން މަޝްވަރާ ކުރައްވައިފަ އެވެ. އެއީ ޔޫރަޕަށް އެކްސްޕޯޓް ކުރާ ދިވެހި މަހުގެ އުފެއްދުންތަކުން ނަގާ ޓެރިފް ކުޑަކުރުމުގެ އިތުރަށް ޝެންގެން ވިސާ ހޯދުމުގައި ލުއި ފަސޭހަ ގޮތްތަކެއް ހަމަޖެއްސުމަށެވެ.
އީޔޫގެ ވަފުދުގެ ބޭފުޅުން ވަނީ ބައިނަލްއަގްވާމީ މައިދާނުގައި ރާއްޖެއަކީ މުހިންމު ދައުރެއް އަދާކުރާ ގައުމެއްކަން ފާހަގަކުރައްވައިފަ އެވެ.
އެ ގޮތުން އދ. ގެ އާންމު މަޖިލީހުގެ ރިޔާސަތު ރާއްޖޭގެ ފޮރިން މިނިސްޓަރު އަބްދުﷲ ޝާހިދު ބަލަހައްޓަވައި، އަދާކުރެއްވި ދައުރު އީޔޫން ފާހަގަ ކުރެއްވި އެވެ. އެ ބައްދަލުވުމުގައި ފޮރިން މިނިސްޓަރު ވެސް ބައިވެރިވެވަޑައިގެންނެވި އެވެ.
އޭގެ އިތުރަށް އދ. ގެ ހިއުމަން ރައިޓްސް ކައުންސިލުގެ 2023-2025 ވަނަ ދައުރުގެ މެންބަރުކަން ރާއްޖެއިން ކާމިޔާބުކޮށްފައިވުމާއި އެ ކައުންސިލް މެދުވެރިކޮށް ހުޅަނގުގެ ގައުމުތަކާއި އޭޝިއާގެ ގައުމުތަކުގެ މެދުގައި ގުޅުން ބަދަހިކުރުމުގައި ރާއްޖޭން އަދާކުރާ މުހިންމު ދައުރު ވެސް ފާހަގަކުރެއްވި އެވެ.
އީޔޫ ސަފީރުންގެ ވަފުދުގައި ހިމެނޭ ބޭފުޅުން؛
- އީޔޫއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ދެނިސް ޗައިބީ
- އިޓަލީން ރާއްޖެއަށް ކަނޑައަޅުއްވާފައި ހުންނަވާ ސަފީރު ރިޓާ މަނެއްލާ
- އޮސްޓްރިއާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރު ކެތެރީނާ ވީޒާ
- ޖަރުމަނުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ހޮލްގާ ލޯތާ
- ނެދަލެންޑްސް އިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ބޮނީ ހާބޯކް
- އެމްބަސީ އޮފް ރޮމޭނިޔާގެ ޗާޖް ޑި އެފެއާޒް ވިކްޓާ ޗިއުޑިއާ
- ފްރާންސް އެމްބަސީގެ ޑެޕިއުޓީ ހެޑް އޮފް މިޝަން، އޮރެލިއެން މެއިލޭ
