ސޯޝަލް މީޑިއާއާ ދުރަށް ދާންވީތަ؟

ސޯޝަލް މީޑިއާއާ ދުރަށް ދާންވީތަ؟

ސޯޝަލް މީޑިއާއަކީ ރަނގަޅު ނުވަތަ ނުރަނގަޅު ނުފޫޒަކަށް ވަނީ ވެސް އެ މަންސައެއްގައި ތިޔަ ފޮލޯ ކުރާ އެކައުންޓުތަކުގެ ބާވަތުންނެވެ. އޭގެ ޒާތުގައި ވެސް އެ މަންސަތަކުގައި ހުރި މައްސަލަތަކެއް ހުއްޓަސް، މައިގަނޑު ނުފޫޒަކީ އެއީ އެވެ. މި ޒަމާނުގައި ސޯޝަލް މީޑިއާ އަކީ ހަބަރާއި މައުލޫމާތުގެ ހަޒާނާއެކެވެ. ދުނިޔޭގެ އެކި ކަންކޮޅުތަކުގައި ހިނގާ ކަންކަމާއި، މޫޑަށް ހެޔޮ ބަދަލު ގެނުވާ މަޖާ ކޮންޓެންޓުތަކުން އެ މަންސަތައް އެ ވަނީ މުއްސަނދި ކުރެވިފަ އެވެ. ރަހުމަތްތެރިންނާއި ދަންނަ މީހުންގެ ދަތުރުނާމާތަކުން ފެށިގެން އެ މީހުންނާ ކުރިމަތިވާ އުފަލާއި ހިތާމަތައް ހިއްސާކުރާ އެކުވެރިއަކީ ވެސް ސޯޝަލް މީޑިއާ އެވެ. މިހުރިހާ 'ރަނގަޅު' ކަންކަމާއެކު ވެސް، ސޯޝަލް މީޑިއާއިން ބްރޭކެއް ނަގާލުމަކީ މިހާރު ވައިގައި ހިފަމުންދާ ޓްރެންޑެކެވެ. އޭގެ ސަބަބުތައް ގިނަ އެވެ.

އެހެން މީހުންގެ 'އުފާވެރިކަމާމެދު' ހަސަދަވެރިވެވުން

ހަސަދައަކީ ހަށިގަނޑުން އުފުލާ ގެއްލުން ބޮޑު ބުރައެކެވެ. މީހަކު އޭނާގެ އާއިލާއާއެކު ހޭދަކުރާ އުފާވެރި ވަގުތުތަކުގެ، ނުވަތަ ޗުއްޓީ ހޭދަކުރާ މަންޒަރުގެ ފޮޓޯއެއް ސޯޝަލް މީޑިއާގައި ހިއްސާކުރުމުން އެއީ އޭނާގެ ދިރިއުޅުން ކަމަށް ދެކެވުމަކީ ބައެއް މީހުންނަށް ވާގޮތެކެވެ. އޭނާގެ ދިރިއުޅުން ކިހާ އުފާވެރިކަމާއި، ތިމާގެ ދިރިއުޅުމުގައި އެ އުފާ ނެތްކަމުގެ މައްޗަށް ވިސްނައި ފިކުރުކުރެވެ އެވެ. އަދި ގަސްތަކާ ނުލައި އެ އުފާތަކާމެދު ހަސަދަވެރިވެވެ އެވެ. އެ ހަސަދައިގެ ސަބަބުން އެހެން މީހަކަށް އަސަރެއް ނުކުރާއިރު ތިމާގެ ނަފުސަށާއި އިހުސާސްތަކަށް އެކަމުން ކުރިމަތިކުރުވާނީ ބޮޑު ގެއްލުމެކެވެ. މިގޮތަށް ދިމާވާނަމަ ވަގުތީ ގޮތުން ނަމަވެސް ސޯޝަލް މީޑިއާއާ ދުރަށް ޖެހިލުން ރަނގަޅެވެ.

މުޅި ދިރިއުޅުން ސޯޝަލް މީޑިއާއަށް ދޫކޮށްލެވުން

ސޯޝަލް މީޑިއާ ބޭނުންކުރާ އެންމެން އެ ތިބީ ތިބާ މިއަދު ހެނދުނު ކެއީ ކޮންއެއްޗެއްތޯއާއި، މާދަމާ ލާނީ ކޮން ހެދުމެއްތޯއާއި، މިއަދު ކިތައް ކިލޯ މީޓަރު ދުވެލިތޯ ބަލަން ޝައުގުވެރިވެގެނެއް ނޫނެވެ. ސޯޝަލް މީޑިއާގެ ދުނިޔެ އެނބުރެނީ ތިމާގެ ވަށައިގެން ކަމަށް ހީވެ، ކުރާ ކޮންމެ ކަމެއް އެ މަންސައިގައި ދޫކޮށްލުމަކީ މީހުންގެ ފަރާތުން ސިއްރުންނާއި ފާޅުގައި މަލާމާތުގެ ބަސް ރައްދުވާނޭ ކަމެކެވެ. އެ ވިހައަށް ހުށަނޭޅި، ޒާތީ ދިރިއުޅުން ޒާތީކޮށް ބޭއްވުމަކީ އެންމެ ބުއްދިވެރި ގޮތެވެ. ތިމާގެ ރައްޓެހިންނާ ހެޔޮއެދޭ މީހުންނަށް ދައްކާލުމަށް މީހަކު ފޮޓޯއެއް، ނުވަތަ އެ މީހަކު ކުރި ކަމެއްގެ ވާހަކަ ހިއްސާކޮށްފާނެ އެވެ. އަބަދާއަބަދު އެކަން ކުރާނަމަ އެއީ މީހުންނަށް ކުރާ ޖެއްސުމެކޭ ހީވެ، މީހުން ރުޅި އަންނަ ގޮތް ވެދާނެ އެވެ. އޭގެ ނަތީޖާއަކަށްވާނީ ގިނަ ބައެއްގެ ނަފުރަތުގެ އަމާޒަކަށް ތިމާވުމެވެ. އެހެންވީމާ، ތިމާގެ މުޅި ދިރިއުޅުމުގެ ހުރިހާ ކަމެއް ސޯޝަލް މީޑިއާގައި ހިއްސާކުރުމުގެ އާދަ ހުރި މީހެއްނަމަ ރަނގަޅު ގޮތަކީ ކުޑަ ބްރޭކެއް ނެގުމެވެ. އެނބުރި އަންނާނީ ސޯޝަލް މީޑިއާގައި ހިއްސާކުރާނީ ކޮން މިންވަރެއްކަން ކަނޑައަޅައި ނިންމައިގެންނެވެ.

Advertisement

މޫޑު ގޯސްވުން

ސޯޝަލް މީޑިއާއިން ފެންނަ ހަބަރުތަކާއި، އެ މަންސައިގައި ހަރަކާތްތެރި މީހުންގެ ވާހަކަ ފެނި މޫޑަށް އަސަރުކުރާނަމަ ރައްކާތެރި ގޮތަކީ ސޯޝަލް މީޑިއާއާ ދުރަށް ދިއުމެވެ. ޓުވީޓާ އަދި ފޭސްބުކަކީ ހުރިހާ ހަބަރަކާއި މައުލޫމާތެއްގެ މައި މަންސަތަކެވެ. އެ މަންސަތަކުން ފެންނަ ހަބަރުތަކާއި، އެ ހަބަރުތަކަށް ކޮށްފައިވާ ކޮމެންޓުތަކަކީ ތިމާގެ ޖަޒުބާތަށް އަސަރުކުރުވާ، އަދި އޭގެ ސަބަބުން މަސައްކަތްތަކަށް ދަތިވެދާ ކަމަކަށް ވެދާނެ އެވެ. އެހެންވަނީ ސޯޝަލް މީޑިއާއަށް ތިބާގެ ހިތުގައި ވެސް ދެވިފައި އޮންނަ ހާއްސަ މަގާމެއްގެ ސަބަބުންނެވެ. އޭގެ ހައްލަކީ އެ މަގާމު ދަށްކުރުމެވެ. އެއީ ދިރިއުޅުން ނޫންކަމާއި، ދިރިއުޅުމުގެ ކުޑަ މިންވަރެއްކަން ގަބޫލުކުރުމެވެ. އެކަން ގަބޫލުކުރެވެންދެން ސޯޝަލް މީޑިއާއާ ދުރަށް ދިއުމަކީ އެފަދަ މީހަކަށް އެންމެ ރައްކާތެރި ގޮތެވެ.

ފޭކް އެކައުންޓުތައް

ތިބާގެ އެންމެ ކައިރީގައި އުޅޭ މީހާވެސް ސޯޝަލް މީޑިއާގައި ދިހަ ބާރަ އެކައުންޓު ގެންގުޅެ އެވެ. އޭގެ ތެރެއިން ތިބާއަށް އެނގެނީ ދެތިން އެކައުންޓެވެ. ކުއްލިއަކަށް ސޯޝަލް މީޑިއާގައި ތިބާއާ ބެހޭގޮތުން ކޮށްފައި އޮންނަ ޕޯސްޓަކީ އެކުވެރިއާއަށް ނޫނީ ނޭނގޭނޭ މައުލޫމާތެކޭ ހީވާނަމަ އެ އުފެދެނީ ފިތުނައެކެވެ. ރާއްޖެއަށް އެކަނި ބަލާއިރުވެސް، ބައެއް މީހުންގެ ފޮލޯވާސްގެ އަދަދު ލައްކައިން މައްޗަށް އަރަ އެވެ. އެކަމަކު، ރާއްޖޭގައި ޓުވީޓާ ބޭނުންކުރާ އުޅެނީ ފަންސަވީހަކަށް ނުވަތަ ތިރީސްހާސް މީހުންނެވެ. ދެން މިހުރީ އެއްކަލަ 'ފޭކް އެކައުންޓް' ތަކެވެ. ބޮޓެވެ. މި އެކައުންޓުތަކުން އުފައްދާ ފިތުނައަށް ކެތްކޮށްނުލެވޭނަމަ އެންމެ ރަނގަޅު ގޮތަކީ އެ މަންސަތަކުން ވަކިވުމެވެ.

ސޯޝަލް މީޑިއާއަކީ ހެޔޮގޮތުގައި ބޭނުންކޮށްފިނަމަ ރަނގަޅު މުޖުތަމައުއެއް ބިނާކުރެވުމުގެ މަގެކެވެ. ހެޔޮ މައުލޫމާތާއި ހިތްހަމަޖެހުމާއި އުފާވެރިކަން ފެތުރުމަށް އެއީ އެންމެ ކުރު އަދި ފަސޭހަ މަގެވެ. ފިތުނަތަކުން ހަރާބުކޮށްފިނަމަ އެއީ މުޖުތަމައުގެ ހަލާކެވެ. ދެމިޔަލީ ހަންޖަރެކެވެ. ސޯޝަލް މީޑިއާއިން އުފެދޭ ފިތުނައިން ތިބާގެ ޖަޒުބާތަށް ކުރުވާ ނޭދެވޭ އަސަރުގެ ތިލަފަތް ބަރުވެއްޖެނަމަ އެވީ އެ މަންސަތަކުން ހިނދުކޮޅަކަށް ނަމަވެސް ވަކިވެލާށެވެ. އޭގެ ފަހަށް ބޭނުންތެރިކަންކަމުގައި ވަގުތު ހޭދަ ކުރަންވީ އެވެ. އެކަމަކު ސޯޝަލް މީޑިއާގައި އަމިއްލަ ނަމުގައި ބޭނުންކުރާ އެކައުންޓު ޑިއެކްޓިވޭޓުކުރުމަށްފަހު ފޭކު އެކައުންޓަކުން ހުރިހާ އެންމެންގެ އަމަލުތަކަށް ލޯއަޅައި، ފާޑު ކިޔަން އިންނަނަމަ އެ ސޯޝަލް މީޑިއާ ދޫކޮށްލައިގެން ހޯދަން ތިޔަ އުޅޭ ފަރުވާއެއް ނުލިބޭނެ އެވެ. އެކަންވެސް ކުރަންވާނީ ހެޔޮ ނިޔަތުގައި، އަމިއްލަ ނަފުސަށް ދޭ ފަރުވާއެއްގެ ގޮތުގަ އެވެ.

ކޮމެންޓް

ފަހުގެ ޚަބަރު

އުމުރުން 70 އަށް ދުޅަހެޔޮކޮށް ދިއުމަށް ސައިންސްވެރިން އިރުޝާދު

އުމުރުން 30 ގެ އަހަރުތަކަކީ ހަށިގަނޑަށް ބަދަލުތައް އަންނަ ދުވަސްވަރަކަށް ވުމުން، މި އުމުރުގައި ކަސްރަތުކުރުމާއި ނިދުމުގެ އާދަތައް ރަނގަޅުކުރުމަކީ އުމުރުން ދުވަސްވާއިރު ދުޅަހެޔޮކަންމަތީ ހުރުމަށް އެޅޭ މުހިންމު ފިޔަވަޅެކެވެ. މީގެ އިތުރުން، އަނގަޔާއި ދަތްތަކުގެ ސިއްހަތަށް ސަމާލުކަން ދިނުމާއި ނުރަނގަޅު އާދަތަކާ ދުރުހެލިވުމަކީ މުސްކުޅިވުމުން ކުރިމަތިވާ ބަލިތަކުން ރައްކާތެރިކޮށްދީ އުމުރު ދިގުކޮށްދޭނެ ކަންކަމެވެ.

ޖީޓީއޭ 6 ރެކޯޑް މާކްސްއަކާއެކު ނެރެފި

ތޭރަ އަހަރުގެ ދިގު އިންތިޒާރަކަށްފަހު ނެރުނު ޖީޓީއޭ 6 އަށް ރެކޯޑް މާކްސްއެއް ލިބި، ގޭމިން ދާއިރާއަށް އިންގިލާބީ ބަދަލެއް ގެނުވައިފިއެވެ. މި ގޭމުގެ ގްރެފިކްސް އާއި ވާހަކަ ކިޔައިދޭ ގޮތް ފުރިހަމަވުމުގެ އިތުރުން، މިއީ މި ސިލްސިލާގައި އަންހެން ކެރެކްޓަރަކަށް މައިގަނޑު ދައުރެއް ދިން ފުރަތަމަ ފަހަރެވެ.

މަސް ނުކައިވެސް ހަށިގަނޑަށް ބޭނުންވާ ދަގަނޑު ހޯދިދާނެ!

މަހުގެ ބާވަތްތަކުގެ އިތުރުން ފަތްޕިލާވެއްޔާއި ގޮވާމުގެ ބާވަތްތަކުން ވެސް ހަށިގަނޑަށް ބޭނުންވާ ދަގަނޑުގެ މާއްދާ ހޯދިދާނެކަން ސިއްހީ މާހިރުން ފާހަގަކުރެއެވެ. މިގޮތުން ކާނާ ތައްޔާރުކުރާ ގޮތަށް ބަދަލު ގެނައުމާއި، ވިޓަމިން ސީ އެކުލެވޭ ތަކެއްޗާއެކު ކެއުމަކީ ގަސްގަހާގެހިން ލިބޭ ދަގަނޑު ހަށިގަނޑަށް ދަމައިގަންނަ މިންވަރު އިތުރުކޮށްދޭނެ ކަންކަމެވެ.

އާ ޖޭމްސް ބޮންޑަކަށް ރޮބަޓް ޕެޓިންސަން

ޖޭމްސް ބޮންޑުގެ ރޯލު ކުޅޭނެ އާ އެކްޓަރަކަށް އިނގިރޭސި އެކްޓަރު ރޮބަޓް ޕެޓިންސަން ހަމަޖައްސައި، 2028 ވަނަ އަހަރު ރިލީޒްކުރާ ބޮންޑު ސިލްސިލާގެ 26 ވަނަ ފިލްމު ޑެނިސް ވިލެނޫވް ޑައިރެކްޓްކުރާ ގޮތަށް އެމެޒޯން އެމްޖީއެމް އިން ވަނީ އިއުލާންކޮށްފައެވެ. މި ރޯލު ލިބުމަކީ ބޮޑު ޝަރަފެއް ކަމަށް ޕެޓިންސަން ބުނެފައިވާއިރު، މިއީ ޑެނިއަލް ކްރެއިގަށް ފަހު މި މަޝްހޫރު ޖާސޫސީ ރޯލުން ފެންނާނެ ހަތްވަނަ އެކްޓަރެވެ.

އަނދިރީގައި ފެންވެރުން ނިދި އައުން ފަސޭހަވޭތަ؟

ނިދުމުގެ ކުރިން އަނދިރީގައި ފެންވެރުމަކީ ހަށިގަނޑުން މެލަޓޯނިން އުފައްދައިދީ، ސިކުނޑި ހަމަޖައްސައިދީ އަވަހަށް ނިދި އައުމަށް އެހީތެރިވެދޭ ކަމެއް ކަމަށް ސިއްހީ މާހިރުން ބުނެއެވެ. މިގޮތަށް ފެންވެރުމުން ހަށިގަނޑުގެ ފިނިހޫނުމިން ދަށްވެ، ދުވަހުގެ ސްޓްރެސް ކުޑަކޮށްދީ ނަފްސާނީ ގޮތުން އަރާމު ލިބިގެންދެއެވެ. ނަމަވެސް މިއީ ނިދުމުގެ ބޮޑެތި ބަލިތަކަށް އޮތް ދާއިމީ ހައްލެއް ނޫންކަމަށް މާހިރުން ފާހަގަކުރެއެވެ.

ޕްރޮސްޓޭޓް ކެންސަރަށް ގަވާއިދުން ސްކްރީން ކުރަން ބުނެފި

ޕްރޮސްޓޭޓް ކެންސަރު ޖެހޭ މިންވަރު އިތުރުވަމުންދާތީ، އެމެރިކަން ކެންސަރ ސޮސައިޓީން ވަނީ އުމުރުން 50 އަހަރާއި 69 އަހަރާ ދެމެދުގެ ފިރިހެނުން ގަވާއިދުން ސްކްރީން ކުރުމަށް އާ އިރުޝާދުތަކެއް ނެރެފައެވެ. މި ބަދަލުގެ ދަށުން ބަލީގެ ނުރައްކާ ބޮޑު މީހުން އުމުރުން 45 އަހަރުން ފެށިގެން ކޮންމެ އަހަރަކު ޓެސްޓުކުރަން ލަފާދީފައިވާއިރު، މީގެ މަގުސަދަކީ ބަލި ކުރީކޮޅު ދެނެގަނެ މަރުވާ މިންވަރު މަދުކުރުމެވެ.

ޓޭލާ ސުވިފްޓަކީ ފޭކު ސަޕޯޓަރެއް ކަމަށް ކުޅުންތެރިން ބުނެފި

ނިއުޔޯކް ނިކްސްގެ ބައެއް ކުޅުންތެރިން ޓޭލާ ސުވިފްޓަކީ ދެއްކުންތެރިކަމަށް މެޗުތަކަށް އަންނަ "ފޭކު" ސަޕޯޓަރެއް ކަމަށް ބުނުމުން، އެ ޓީމުން އޭނާގެ ދިފާއުގައި ވާހަކަދައްކައިފިއެވެ. ޓީމުގެ ތަރުޖަމާނު ވަނީ ސުވިފްޓަކީ ގިނަ ދުވަސްތަކެއް ވަންދެން ޓީމަށް ސަޕޯޓްކުރާ ވަފާތެރިއެއްކަން ފާހަގަކޮށް، ކުޅުންތެރިންގެ ވާހަކަތައް ދޮގުކޮށްފައެވެ.

Newsletter

Get the latest news delivered straight to your inbox