މާލެ ސަރަހައްދުގެ ލޭންޑް ޔޫސް ޕްލޭން ފާސްނުކޮށް ވިލިމާލެއިން އެއްވެސް ބޭނުމަކަށް ބިން ދޫނުކުރަން ޕްލޭނިން މިނިސްޓްރީން މާލެ ސިޓީ ކައުންސިލަށް އަންގައިފި އެވެ.
ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ސޮއިކުރައްވައި މާލެ ސިޓީގެ މޭޔަރު ޑރ. މުހައްމަދު މުއިއްޒުއަށް މިދިޔަ ބުރާސްފަތި ދުވަހު ފޮނުއްވި ސިޓީއެއްގައި ވިދާޅުވީ ވިލިމާލެއިން ފައިބަރު މަސައްކަތަށް ބިން ދޫކުރަން ސިޓީ ކައުންސިލުން މަސައްކަތް ކުރަމުންދާކަމުގެ މައުލޫމާތު އެ މިނިސްޓްރީއަށް ލިބިފައިވާ ކަމަށެވެ.
އަދި ސިޓީ ކައުންސިލުން ދޫކުރަން މަސައްކަތްކުރަމުންދާ ބިންތަކަކީ ވިލިމާލޭއިން ސްޓެލްކޯ އަދި ދިރާގަށް ދޫކޮށްފައިވާ ބިން ހިމެނޭ ސަރަހައްދާއި ކައިރި ސަރަހައްދުތަކެއްކަމަށް އެ ސިޓީގައި ބުނެ އެވެ. އެ ސިޓީގައި ވިލިމާލެއިން އެއްވެސް ބޭނުމަކަށް ބިން ދޫކުރެވޭނީ ލާމަރުކަޒީ ގާނޫނުގެ ދަށުން ލޭންޑް ޔޫސް ޕްލޭން ފާސްކުރުމަށްފަހުކަމަށް ބުނެފައި ވެއެވެ.
އަދި އެ ޕްލޭން ފާސްނުކޮށް ވިލިމާލެއިން އެއްވެސް ކަމަކަށް ބިން ދޫކުރުމުގެ މަސައްކަތް ނުކުރުމަށް ޕްލޭނިން މިނިސްޓްރީން ވަނީ މާލެ ސިޓީ ކައުންސިލަށް އަންގައިފަ އެވެ.
ޕްލޭނިން މިނިސްޓްރީން މިގޮތަށް އެންގިއިރު، މާލެ ސިޓީ ކައުންސިލުން ވަނީ މާލެ ސަރަހައްދަށްވާ ލޭންޑް ޔޫސް ޕްލޭން ތައްޔާރުކޮށް މިދިޔަ ނޮވެމްބަރު ޕްލޭނިން މިނިސްޓްރީއަށް ހުށަހަޅާފަައިވާކަމަށް ބުނެފަ އެވެ. އަދި ޕްލޭނިން މިނިސްޓްރީން ލޭންޑް ޔޫސް ޕްލޭން ފާސްކޮށްނުދީ ލަސް ކުރަމުން އަންނަކަމަށް ސިޓީ ކައުންސިލުން ވަނީ ތުހުމަތުކޮށްފަ އެވެ.
ނަމަވެސް އެކަން ދޮގުކޮށް، ޕްލޭނިން މިނިސްޓްރީން ބުނަނީ ސިޓީ ކައުންސިލްގެ ލޭންޑް ޔޫސް ޕްލޭން ހުށަހަޅާފައި ވަނީ ޑިސެމްބަރު މަހު ކަމަށެވެ. އަދި އެ ލޭންޑް ޔޫސް ޕްލޭންގައި މައްސަަލަތަކެއް އުޅޭތީ އެކަން އިސްލާހުކުރުމަށް ސިޓީ ކައުންސިލަށް އެ މަސްތެރޭ އެންގި ކަމަށެވެ.
އެކަންކަން އިސްލާހުކުރުމަށްފަހު ސިޓީ ކައުންސިލުން އަނެއްކާވެސް މިދިޔަ ހަފްތާތެރޭ ލޭންޑް ޔޫސް ޕްލޭނެއް ހުށަހެޅި ކަމަށާއި ނަމަވެސް އެއީ ހަމައެކަނި މާލެ ސިޓީގެ ޕްލޭން އެކަނިކަމަށް އެ މިނިސްޓްރީން ބުނެ އެވެ. އަދި އެ ޕްލޭނާ ދޭތެރޭ ގޮތެއް ނިންމަން ވަގުތު ނަގާނެކަމަށް ވެސް އެ މިނިސްޓްރީން ބުނެފައި ވެއެވެ.
ވިލިމާލެ ސިނާއީ ސަރަހައްދާއި އެ ސަރަހައްދާއި ކައިރިން އަޅާ މާލެ-ތިލަފުށި ބްރިޖާ ގުޅިގެން ސިޓީ ކައުންސިލާއި ޕްލޭނިން މިނިސްޓްރީއާ ދެމެދު ވަނީ ދެބަސްވުންތަކެއް އުފެދިފަ އެވެ.
އެގޮތުން ސިނާއީ ސަރަހައްދުގެ ކަންކަން ކުރިޔަށް ގެންދިޔުމަށް ޕްލޭނިން މިނިސްޓްރީން މީގެ ކުރިން ހުއްދަދިންކަމަށް ސިޓީ ކައުންސިލުން ބުނެ އެވެ. ނަމަވެސް ޕްލޭނިން މިނިސްޓްރީން ވަނީ އެކަން ދޮގުކޮށްފަ އެވެ.
