ކުރިއަށް އޮތް ތިން ހަފުތާ ތެރޭގައި ރާއްޖޭގައި ކޮވިޑް ފެތުރޭ މިންވަރު އިތުރުވާނެ ކަމަށް ސިއްހީ މާހިރުން ލަފާކޮށްފައިވާ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ނ. އަތޮޅުގެ ފަސް ރަށަކަށް ރައީސް ކުރައްވާ ދެ ދުވަހުގެ ދަތުރުފުޅުގައި އެ އަތޮޅު ލަންދުއަށް ވަޑައިގެން އެ ރަށުގެ ބަނދަރު ރަސްމީކޮށް ހުވުމަށް ބޭއްވި ރަސްމިއްޔާތުގައި ރައީސް ވިދާޅުވީ ދުނިޔޭގައި މިހާރު ފެތުރެމުންދާ ކޮވިޑްގެ އާ ވޭރިއަންޓް "އޮމިކްރޮން" އާ ގުޅިގެން، ރާއްޖޭގެ ސިއްހީ މާހިރުންނާ އެކު އިއްޔެ މަޝްވަރާ ބައްދަލުވުމެއް ބާއްވާފައިވާ ކަމަށެވެ.
ކުރިއަށް އޮތް ތިން ހަފްތާއަކީ ވަރަށް ބާރަށް ރާއްޖޭގައި ކޮވިޑް ފެތުރުމުގެ ފުރުސަތު އޮތް ތިން ހަފްތާ ކަމަށް ސިއްހީ މާހިރުން ވިދާޅުވި ކަމަށް ވެސް ރައީސް ވިދާޅުވި އެވެ.
"ސިއްހީ މާހިރުން ލަފާ ދެއްވީ ކުރިއަށް މި އޮތް ތިން ހަފުތާއަކީ އަނެއްކާ ވެސް ވަރަށް ބޮޑަށް ރާއްޖޭގައި ކޮވިޑް ފެތުރިގެން ދިއުމުގެ ފުރުސަތު އޮތް ކަމަށް, މާހިރުން އެދިވަޑައިގަތީ ކުރިއެކޭ ވެސް އެއްގޮތަށް މި ބަލިމަޑުކަމަށް ހާއްސަ ސަމާލުކަމެއް ދެއްވުމަށް،" ރައީސް ވިދާޅުވި އެވެ.
މިދިޔަ ނޮވެމްބަރު މަހުގެ ފަސް ވަނަ ދުވަހު ރާއްޖެ އައި ފަތުރުވެރިއަކު އެ ވޭރިއަންޓަށް ޕޮޒިޓިވްވެފައިވާއިރު، ޑިސެމްބަރު މަހު ވަނީ އިތުރު ހަތަރު ކޭސް ފެނިފަ އެވެ.
އާ ވޭރިއެންޓާ ގުޅީގެން އިތުރު ފިޔަވަޅުތައް އެޅުމަށް މަޝްވަރާ ކުރެވެމުންދާއިރު ކޮވިޑާ ގުޅިގެން މިހާރު އަޅާފައިވާ ފިޔަވަޅުތަކަށް އިތުރަށް ސަމާލުވުމަށް އެޗްޕީއޭން ވަނީ އިލްތިމާސް ކޮށްފަ އެވެ.
އެގޮތުން, ބޭރުގައި އުޅޭއިރު މާސްކް އެޅުމަށާއި، އަތް ދޮވުމާއި، ކޮންޓެކް ބަބުލް މަދުކޮށް ބެހެއްޓުމަށާއި ކޮންމެހެން ދާން ޖެހޭ ހާލަތެއްގައި ނޫނީ ބޭރަށް ނުދިޔުމަށް ވެސް އެޗްޕީއޭން ވަނީ އިލްތިމާސް ކޮށްފަ އެވެ.
