ޖެނީވާ، ސްވިޓްޒަލޭންޑް (ޑިސެމްބަރު 29) - ފާއިތުވި ހަފުތާގައި ދުނިޔޭގެ ކޮވިޑް ކޭސްތަކުގެ އަދަދު 11 ޕަސެންޓު އުފުލުމާ އެކު އޮމިކްރޯން ވޭރިއެންޓުގެ ނުރައްކާ އަދިވެސް ވަރަށް ބޮޑު ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ގިނަ ގައުމުތަކެއްގައި މިހާރު ކުއްލިއަކަށް ކޭސްތައް އުފުލިގެން އުޅެނީ އޮމިކްރޯން ވޭރިއެންޓާ ހެދި އެވެ. ބައެއް ގައުމުތަކުގައި ޑެލްޓާ ވޭރިއެންޓް ފަހަތަށް ވައްޓާލުމަށް ފަހު އެންމެ ފުޅާކޮށް ފެތުރިފައިވާ ވޭރިއެންޓަށް އޮމިކްރޯން ވަނީ ވެފަ އެވެ.
"އަލަށް ފެނިގެން އުޅޭ ކަންބޮޑުވުންތައް ހުރި ވޭރިއެންޓު، އޮމިކްރޯންގެ ނުރައްކާ މިންވަރު އަދިވެސް އޮތީ ވަރަށް މަތީގައި،" ސިއްހަތާ ބެހޭ އދ. ގެ އެޖެންސީން ބުންޏެވެ.
"ހެކިތަކުން އެނގޭ ގޮތުގައި ޑެލްޓާ ވޭރިއެންޓުގެ މައްޗަށް ކުރި ހޯދުމުގެ ގާބިލްކަން އޮމިކްރޯން ވޭރިއެންޓަށް ލިބިގެންވޭ. އެގޮތުން ދެ ތިން ދުވަސް ތެރޭގައި ދެ ގުނަ އިތުރުވޭ. އަދި ކޭސްތައް ފެންނަމުންދާ ގައުމުތަކުން ކުޑަ ދުވަސްކޮޅެއްގެ ތެރޭގައި ވަރަށް ބޮޑަށް އަދަދުތައް ވަނީ މަތިވެފައި،" އިނގިރޭސިވިލާތާއި އެމެރިކާ ފާހަގަކުރަމުން ޑަބްލިއުއެޗްއޯ އިން ބުންޏެވެ.
އެ ދެ ގައުމުގައި ވެސް މިހާރު "ޑޮމިނެންޓް" ނުވަތަ އެންމެ ފުޅާކޮށް ފެތުރިފައިވާ ވޭރިއެންޓަކީ އޮމިކްރޯން އެވެ.
"އެހާ ހަލުވިކަމާ އެކު ފެތުރޭ ކަމަށް ބެލެވެނީ އިމުނިޓީ ނުވަތަ ހަށިގަނޑަށް ކުރިން ލިބިފައިވާ ރައްކާތެރި ކަމަށް ނުގުޑުމާއި އޮމިކްރޯން ވޭރިއެންޓުގެ ޓްރާންސްމިސިބިލިޓީ ނުވަތަ ފެތުރޭ ރޭޓް ހަލުވިކަމުން."
ނަމަވެސް ޑަބްލިއުއެޗްއޯ އިން ވަނީ މި ވޭރިއެންޓް އެންމެ ފުރަތަމަ ރިޕޯޓު ކުރި ދެކުނު އެފްރިކާގެ ކޮވިޑް ކޭސްތައް 29 ޕަސެންޓު މަދުވެފައިވާކަން ފާހަގަކޮށްފަ އެވެ.
އިނގިރޭސިވިލާތާއި، ދެކުނު އެފްރިކާ އަދި ޑެންމާކުން މިހާތަނަށް ހެދި އެންމެ ފުރަތަމަ ދިރާސާތަކުގެ ނަތީޖާއިން ދައްކާ ގޮތުގައި ޑެލްޓާ އަށް ވުރެ އޮމިކްރޯންގައި ހޮސްޕިޓަލްގައި އެޑްމިޓް ކުރަން ޖެހޭ ރޭޓް ކުޑަ އެވެ.
އެހެން ނަމަވެސް، އޮމިކްރޯންގައި ހާލު ސީރިއަސްވާ މިންވަރާ ބެހޭ ގޮތުން އެއްޗެއް ބުނެވޭނީ އިތުރު ދިރާސާތަކަށް ފަހު ކަމަށް ޑަބްލިއުއެޗްއޯ އިން ބުނެ އެވެ. އެގޮތުން ބަލަނީ ސީރިއަސްވާ މީހުންނަށް އޮކްސިޖަން ބޭނުންވާ މިންވަރާއި، ވެންޓިލޭޝަންގެ އެހީ ބޭނުންވާ މިންވަރާއި މަރުވާ މިންވަރަށެވެ.
އޭގެ އިތުރުން ވެކްސިން ޖަހާފައި ތިބޭ މީހުންނާއި ކުރިން ކޮވިޑް ޖެހި ހަށިގަނޑަށް ކޮންމެވެސް ވަރެއްގެ ރައްކާތެރިކަމެއް ލިބިފައިވާ މީހުންގެ މެދުގައި ހާލު ސީރިއަސް ވަނީ ކިހާ ވަރަކަށްތޯ ބެލުމަށް ވެސް އިތުރު ދިރާސާ ބޭނުންވެ އެވެ.
ޑަބްލިއުއެޗްއޯ އިން ބުނީ އޮކްޓޯބަރު މަހުން ފެށިގެން މުޅި ދުނިޔޭގައި ކޮވިޑް ކޭސްތައް އިތުރުވަމުން ގޮސް، މިދިޔަ އާދީއްތަ ދުވަހާ ހަމައަށް ނިމުނު ހަފުތާގައި އެކަނިވެސް 11 ޕަސެންޓުގެ އުފުލުމެއް އައި ކަމަށެވެ. ނަމަވެސް މަރުވި މީހުންގެ އަދަދުތައް ވަނީ ހަތަރު ޕަސެންޓު މަދުވެފަ އެވެ.
ފާއިތުވި ހަފުތާގައި އެންމެ ގިނަ ކޭސްތައް ރިޕޯޓު ކުރީ އެމެރިކާ، އިނގިރޭސިވިލާތް، ފްރާންސް އަދި އިޓަލީންނެވެ.
