ބެއިޖިން، ޗައިނާ (ޑިސެމްބަރު 28) - ޗައިނާގައި 13 މިލިއަނަށް ވުރެ ގިނަ މީހުން ލޮކްޑައުންކޮށް، ކޮވިޑް ފެތުރުން ކޮންޓްރޯލް ކުރެވޭތޯ ފިޔަވަޅުތައް އިތުރަށް ހަރުކަށިކޮށްފި އެވެ.
ޔޫރަޕާއި އެމެރިކާގައި ހަލުވިކަމާ އެކު ކޮވިޑް ފެތުރެމުން ދާއިރު އެ ތަންތަނުގައި ވެސް ވަނީ ފިޔަވަޅުތައް ވަރުގަދަކޮށްފަ އެވެ. ޗައިނާގެ ކޭސްތައް އެމެރިކާ އާއި ޔޫރަޕާ އަޅާ ބަލާއިރު މަދު ނަމަވެސް، ޗައިނާ އިން ނިންމީ އެންމެ ބޮޑަށް ބަލި ފެތުރެމުންދާ ހިސާބުތައް ލޮކްޑައުން ކުރުމަށެވެ.
އެގޮތުން ޔަނާން ސިޓީގެ އެތައް ލައްކަ ބަޔަކު ގެތަކުން ނުކުތުން މިހާރު ވަނީ މަނާކޮށްފަ އެވެ. އޭގެ ކުރިން ޒިއާން ސިޓީގެ 13 މިލިއަން މީހުން ވެސް ލޮކްޑައުން ކުރި އެވެ. އެ މީހުން ގެތަކުގައި ބަންދުވެފައި ތިބޭތާ މިހާރު ހަފުތާއެއް ވަނީ އެވެ.
ޗައިނާގައި މިހާރު ކޮވިޑްގެ އާ ރާޅެއް ފެންނަމުން ދާއިރު، 21 މަސް ތެރޭގައި ކޭސްތައް މައްޗަށް ނުދާ މިންވަރަށް ވަނީ މަތިވާން ފަށާފަ އެވެ. ލޮކްޑައުންގައި ތިބި ބައެއް މީހުން ދަނީ ކާބޯތަކެތި ހުސްވެގެން އެ ވާހަކަ ސޯޝަލް މީޑިއާގައި ދައްކަމުންނެވެ.
ލޮކްޑައުންކޮށްފައިވާ ހިސާބުތަކުގައި ގެއިން ބޭރަށް ޒަރޫރީ ތަކެތި ގަންނަން ނުކުމެވެނީ ކޮންމެ ތިން ދުވަހަކުން ހުއްދަ އޮތް އާއިލާގެ އެންމެ މީހަކަށެވެ. ބޭރަށް ނުކުންނަ ވަގުތުތަކުގައި ވެސް އެއްގަމު އުޅަނދުތައް ދުއްވުން އޮތީ މަނާކޮށްފަ އެވެ.
މިއީ ބަލިމަޑުކަމުގެ ކުރީ ދުވަސްކޮޅުގައި ވައިރަސް އެންމެ ފުރަތަމަ ފެނުނު ވޫހާން ސިޓީ ލޮކްޑައުން ކުރި ފަހުން ޗައިނާގެ ސިޓީއަކަށް ކުރިމަތިވި އެންމެ ހަރުކަށި ލޮކްޑައުނެވެ.
