އޮމިކްރޯން ވޭރިއެންޓް ވަރަށް ބާރު ސްޕީޑުގައި ޔޫރަޕުގައި ފެތުރެމުން ދާ ކަމަށާއި 2022 ވަނަ އަހަރު ފެށޭއިރު ފްރާންސްގައި އެންމެ ގިނަ ވާނީ އެ ވޭރިއެންޓް ކަމަށް ބޮޑު ވަޒީރު ޖޯން ކެސްޓެކްސް ވިދާޅުވެއްޖެ އެވެ.
ހުކުރު ދުވަހު އެމަނިކުފާނު އެހެން ވިދާޅުވުމުގެ ފަހުން ފްރާންސުން ވަނީ އިނގިރޭސިވިލާތުން އެ ގައުމަށް އެތެރެވާ ފަރާތްތަކާ ދެކޮޅަށް ހަރުކަށި ފިޔަވަޅު އަޅާނެކަން އިއުލާންކޮށްފަ އެވެ. މި ވަގުތު ޔޫރަޕުން އޮމިކްރޯންގެ އަސަރު އެންމެ ބޮޑަށް ކުރަމުން ދަނީ އިނގިރޭސިވިލާތަށެވެ.
އެގޮތުން ހުކުރު ދުވަހު އެކަނިވެސް އޮމިކްރޯންއާ ގުޅުން ހުރި 15،000 ކޮވިޑް ކޭސް ރިޕޯޓު ކުރި އެވެ. އެ ގައުމުގެ ހާލަތަށް ބަލައި، މުޅި ޔޫރަޕްގައި ދަނީ ކޭސްތައް މަތިވާނެ ކަމަށް ލަފާކުރެވޭތީ، އާ ރާޅަކަށް ތައްޔާރުވެ ފިޔަވަޅުތައް އަޅަމުންނެވެ.
ޖަރުމަނުވިލާތާއި، އަޔަލޭންޑް އަދި ނެދަލޭންޑުން ވެސް ހުކުރު ދުވަހު އާ ފިޔަވަޅުތައް އިއުލާނު ކުރި އެވެ. ޔޫރަޕުގައި މިހާތަނަށް ކޮވިޑްގެ 89 މިލިއަން ކޭސް ރިޕޯޓުކޮށްފައި ވާއިރު، މި ބަލި ޖެހިގެން 1.5 މިލިއަނަށް ވުރެ ގިނަ މީހުން މަރުވެފައި ވެ އެވެ.
ޖަރުމަނުގެ ހެލްތު މިނިސްޓަރު ކާލް ލޯޓާބެކް ނޫސްވެރިންނަށް ވިދާޅުވީ ބަލިމަޑުކަމުގައި މިހާތަނަށް ކުރިމަތިނުވާ ފަދަ ގޮންޖެހުމަކަށް ތައްޔާރުވަމުންދާ ކަމަށާއި ފްރާންސާއި، ނޯވޭ އަދި ޑެންމާކަކީ ވެސް "ހައި ރިސްކު" ގައުމުތައް ކަމަށެވެ.
އެ ގައުމުތަކުން ދަނީ ކޭސްތައް އިތުރުވަމުންނެވެ. ނަމަވެސް ޖަރުމަނުގައި ހުކުރު ދުވަހު 50،000 ކޭސް ރިޕޯޓު ކުރިއިރު، ހޮނިހިރު ދުވަހު ރިޕޯޓު ކުރީ 42،000 ކޭސް އެވެ.
އިނގިރޭސިވިލާތުގައި ޖެހިޖެހިގެން ތިން ވަނަ ދުވަހަކު ރިކޯޑް އަދަދަކަށް ވަނީ ކޭސް ރިޕޯޓުކޮށްފަ އެވެ. އެގޮތުން ހޮނިހިރު ދުވަހު 93،000 ކޭސް ރިޕޯޓު ކުރި އެވެ. ފްރާންސުން މިހާރު ފެންނަ ކޭސްތަކުގެ 10 ޕަސެންޓުގައި ހިމެނެނީ އޮމިކްރޯން އެވެ.
ނެދަލޭންޑްސް "ހަރުކަށި" ލޮކްޑައުނަކަށް ދާން ތަޖުރިބާކާރުން ބާރު އަޅަން ފަށާފައި ވާއިރު، ބޮޑު ވަޒީރު މާކް ރުޓް ވިދާޅުވީ ޖެނުއަރީ މަހާ ހަމައަށް ދާއިރު، އެ ގައުމުގައި އެންމެ ބޮޑަށް ފެތުރިފައިވާ ވޭރިއެންޓަށް އޮމިކްރޯން ވާނެ ކަމަށެވެ.
