ނޯވިޗް، އިންގްލެންޑް (ޑިސެމްބަރު 11) - އިނގިރޭސި ޕްރިމިއާ ލީގުގެ ފުލުގައި އޮތް ނޯވިޗް ސިޓީ އަތުން ކްރިސްޓިއާނޯ ރޮނާލްޑޯ ޖެހި ޕެނަލްޓީން 1-0 އިން މޮޅުވެ، މެންޗެސްޓާ ޔުނައިޓެޑް ލީގުގެ ފަސް ވަނަ އަށް ޖެހިލައިފި އެވެ.
ޔުނައިޓެޑް މި މެޗަށް ނުކުތްއިރު އޮތީ ލީގުގެ ހަތް ވަނައިގަ އެވެ. އެކަމަކު، މިރޭ ނޯވިޗް އަތުން މޮޅުވެ، ހަތަރު ވަނައިގައި އޮތް ވެސްޓް ހޭމް ޔުނައިޓެޑާ ޕޮއިންޓުގެ ގޮތުން ވަނި އެއްވަރުކޮށްފަ އެވެ. ވެސްޓް ހޭމަށް ވަނީ 15 މެޗުން 27 ޕޮއިންޓް ލިބިފަ އެވެ. ޔުނައިޓެޑުން 27 ޕޮއިންޓް ހަމަކުރީ 16 މެޗުންނެވެ. ޔުނައިޓެޑް މޮޅުވުމުން މިރޭ ސައުތެމްޓަން އަތުން 3-0 އިން މޮޅުވި އާސެނަލް ވަނީ ހަ ވަނަ އަށް ވެއްޓިފަ އެވެ. އެ ޓީމަށް 16 މެޗުން ވަނީ 26 ޕޮއިންޓް ލިބިފަ އެވެ.
ނޯވިޗް ސިޓީގެ ކެރޯ ރޯޑްގައި މިރޭ ކުޅުނު މެޗުގައި އެ ޓީމުން ލަނޑު ޖަހާނެ ރަނގަޅު ފުރުސަތުތަކެއް ހޯދި އެވެ. ފުރަތަމަ ހާފުގައި އޭރިއާތެރެއިން ނޯވިޗްގެ ފިންލެންޑް ފޯވާޑް ޓީމޫ ޕޫކީ އަށް ލިބުނު ބޯޅަ އޭނާ އަށް ރަނގަޅަށް ކޮންޓްރޯލް ނުކުރެވި ފުރުސަތު ގެއްލުނީ އެވެ. މި ހާފުގައި ޔުނައިޓެޑަށް ލީޑުނަަގައިދޭން އަލެކްސް ޓެލޭސް ޖެހި ހިލޭ ޖެހުމެއް ބޭރުވީ ނޯވިޗް ކީޕަރު ޓިމް ކްރުލް އަތުގައި ޖެހި އަދި ހުރަސްދަނޑީގައި ވެސް ޖެހިފަ އެވެ.
ޔުނައިޓެޑް މޮޅުވި ގޯލު ޖެހީ މެޗުގެ 75 ވަނަ މިނިޓްގައި ރޮނާލްޑޯ އެވެ. މިއީ ނޯވިޗްގެ މެކްސް އާރޮންސް އޭރިއާތެރެއިން ރޮނާލްޑޯ އަށް ކުރި ފައުލަކަށް ރެފްރީ ދިން ޕެނަލްޓީ އެކެވެ.
މި މެޗުން ޔުނައިޓެޑް މޮޅުވުމުގެ އެންމެ ބޮޑު ކްރެޑިޓެއް ހައްގުވާނެ އެއް ކުޅުންތެރިއަކީ ކީޕަރު ޑޭވިޑް ޑެހެއާ އެވެ. ޑެހެއާ ވަނީ ނޯވިޗްގެ ޕޫކީ އާއި އޮޒާން ކަބަކް ފޮނުވާލި ނުރައްކާތެރި ހަމަލާތައް ހުށިޔާރުކަމާ އެކު މަތަކޮށްފަ އެވެ. ނޯވިޗަށް ގޯލު ޖަހައިދޭން އެ ޓީމަށް ޗެލްސީގެ ލޯން އެއްބަސްވުމެއްގެ ދަށުން ކުޅެމުން އަންނަ ސްކޮޓްލެންޑްގެ މިޑްފީލްޑަރު ބިލީ ގިލްމޯ ފޮނުވާލި ބޯޅައެއް ޔުނައިޓެޑްގެ ޑިފެންޑަރު އެރިކް ބާއީ ފައިގައި ޖެހިފައި ދިޔައީ ދަނޑިކައިރިން ބޭރުންނެވެ.
ކައުންޓަ އެޓޭކުގައި ޔުނައިޓެޑަށް ދެ ވަނަ ގޯލެއް ޖަހައިދޭން ރޮނާލްޑޯ އަށް ރަނުގެ ފުރުސަތެއް ލިބުނެވެ. މާކަސް ރެޝްފޯޑް އޭރިއާތެރެއިން ހުސްކޮށްލާފައި ރޮނާލްޑޯ އަށް ދިން ބޯޅަ ފޮނުވާލި ނަމަވެސް ދިޔައީ ހުރަސްދަނޑިމަތިންނެވެ.
ނޯވިޗް ލީގުގެ ފުލުގައި އޮތީ 16 މެޗުން 10 ޕޮއިންޓާ އެކު އެވެ.
ޔުނައިޓެޑްގެ ކޯޗުކަމާ ޖަރުމަނުގެ ރަލްފް ރަންގްނިކް ހަވާލުވި ފަހުން ލީގުގައި އެ ޓީމު ކުޅުނު ދެ މެޗުން ވެސް މޮޅުވީ 1-0 އިންނެވެ. މިދިޔަ ހަފްތާގައި ޔުނައިޓެޑުން އަމިއްލަ ދަނޑުގައި ކްރިސްޓަލް ޕެލަސް ބަލިކުރީ ވެސް 1-0 އިންނެވެ. އެކަމަކު، ޗެމްޕިއަންސް ލީގުގައި ޒުވާން ޓީމެއް ގޮވައިގެން ޔުނައިޓެޑުން ސްވިޒަލެންޑްގެ ޔަންގް ބޯއީސްއާ ކުޅުނު މެޗު ނިމުނީ 1-1 އިން އެއްވަރުވެގެންނެވެ.
