މިހާރު ހުރި ވެކްސިނުން ވެސް އޮމިކްރޯން ވޭރިއެންޓާ ދެކޮޅަށް ރައްކާތެރިކަން ލިބޭނެ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ދެކުނު އެފްރިކާ އިން އެންމެ ފުރަތަމަ ރިޕޯޓުކުރި ކޮވިޑް ފަތުރާ ވައިރަހުގެ އާ ވޭރިއެންޓުގެ ދިރާސާތަކުން ދައްކާ ގޮތުގައި ފައިޒާ ވެކްސިނުން ލިބޭ ރައްކާތެރިން ކުޑަވެ އެވެ.
އެގޮތުން ވެކްސިންގެ އެންޓިބޮޑީ އާ ވޭރިއެންޓަށް ނިޔުޓްރަލައިޒްވާ މިންވަރަށް "ވަރަށް ބޮޑަށް ކުޑަވާ" ކަމަށް ދިރާސާ ހެދި ފަރާތްތަކުން ބުނެ އެވެ.
ނަމަވެސް ޑަބްލިއުއެޗްއޯގެ ޑރ. މައިކް ރަޔަން ވިދާޅުވީ ވެކްސިނުން ލިބޭ ރައްކާތެރިކަން ކުޑަވުމުގައި އޮމިކްރޯން އާއި އޭގެ ކުރިން ފެނުނު ވޭރިއެންޓްތަކާ ތަފާތެއްވާ ކަމަށް މިހާތަނަށް ހޯދިފައި ނުވާ ކަމަށެވެ.
"އަޅުގަނޑުމެންނަށް ލިބިފައި މި ހުރީ ވަރަށް އިފެކްޓިވް ވެކްސިންތަކެއް. އެއީ މިހާތަނަށް ފެނުނު ހުރިހާ ވޭރިއެންޓަކާ ދެކޮޅަށް ވެސް އިފެކްޓިވްކަން ކަށަވަރުވެފައިވާ ވެކްސިންތަކެއް. އެ ވެކްސިންތަކުގެ އެހީގައި ބަލީގައި ހާލު ބޮޑުވުމާއި އެޑްމިޓު ކުރުން މަދުކޮށްދޭ. އޮމިކްރޯންގައި ވަކި ތަފާތެއް އަންނަން ޖެހޭނެ ކަމަށް ބަލަންވީ ސަބަބެއް ނެތް،" ޑަބްލިއުއެޗްއޯގެ އެމެޖެންސީޒް ޑިރެކްޓަރު އޭއެފްޕީ އަށް ވިދާޅުވި އެވެ.
އޭނާ ވިދާޅުވީ މިހާރު ހުރި ތަފާސްހިސާބުން އެނގޭ ގޮތުގައި ޑެލްޓާ އާއި އެހެން ވޭރިއެންޓްތަކާ އަޅާ ބަލާއިރު އޮމިކްރޯންގައި މީހުންވަކި އިތުރަށް ބޮޑަށް ބަލި ނުވާ ކަމަށެވެ.
"ފެންނަ ފެނުމަށް، މިސްރާބު ހުރީ މި ވޭރިއެންޓުން ބަލިވާ މިންވަރު ކުޑަވާނެ ކަމަށް ދިރާސާ އިން ދެއްކުމާ ދިމާލަށް."
އޮމިކްރޯން މިހާތަނަށް ފެނުނު ވޭރިއެންޓުތަކުގެ ތެރެއިން އެންމެ ގިނަ މިޔުޓޭޝަންތައް ހިމެނޭ ވޭރިއެންޓެވެ. އެންމެ ފުރަތަމަ ދެކުނު އެފްރިކާ އިން އެ ވޭރިއެންޓް ރިޕޯޓު ކުރިއިރު، އެ ގައުމުގައި އެއް ފަހަރަށް ވުރެ ގިނައިން ކޮވިޑް ޖެހޭ މީހުންގެ އަދަދު ވަނީ އުފުލިފަ އެވެ.
