ޖެނީވާ، ސްވިޓްޒަލޭންޑް (ޑިސެމްބަރު 4) - ދުނިޔޭގެ 38 ގައުމަކުން އޮމިކްރޯން ވޭރިއެންޓް ފެނިފައި ވީ ނަމަވެސް އެ ވޭރިއެންޓާ ގުޅޭ އެއްވެސް މަރެއް މިހާތަނަށް ރިޕޯޓު ކޮށްފައި ނުވާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
އެފްރިކާ ބައްރުގެ ދެކުނުން އެންމެ ފުރަތަމަ ފެނުނު ކޮވިޑް ފަތުރާ ވައިރަހުގެ އާ ވޭރިއެންޓަކީ ގިނަ މިޔުޓޭޝަންތަކެއް ހިމެނޭ ވޭރިއެންޓެކެވެ. އެހެންކަމުން ވޭރިއެންޓުން ކުރާނެ އަސަރު ތަފާތުވާނެ ކަމަށް ބެލެވެ އެވެ. ނަމަވެސް މިހާތަނަށް ޔަގީންކޮށް އެއްވެސް މައުލޫމާތެއް ހޯދިފައެއް ނުވެ އެވެ.
ޑަބްލިއުއެޗްއޯ އިން ބުނީ އެ ވޭރިއެންޓު ފެތުރޭ ހަލުވި މިނާއި އޭގެން ބަލިވާ މިންވަރު ސާފުކޮށް ދެނެގަންނަން ހަފުތާ ތަކެއް ނަގާފާނެ ކަމަށެވެ. އޭގެ އިތުރުން އެ ވޭރިއެންޓާ ހެދި ވެކްސިނުން ލިބޭ ރައްކާތެރިކަން ކުޑަވޭތޯ ވެސް ދަނީ ބަލަމުންނެވެ.
"ހުރިހާ އެންމެން ވެސް ބޭނުންވާ ޖަވާބުތައް އަޅުގަނޑުމެން ހޯދައިދޭނަން،" ޑަބްލިއުއެޗްއޯގެ އެމެޖެންސީޒް ޑިރެކްޓަރު މައިކަލް ރަޔަން ހުކުރު ދުވަހު ވިދާޅުވި އެވެ.
ޑަބްލިއުއެޗްއޯ އިން ބުނީ އޮމިކްރޯންއާ ގުޅިފައިވާ މަރެއް މިހާތަނަށް ނުފެނުނު ނަމަވެސް އެ ވޭރިއެންޓް ފެތުރެމުން ދަނީ ވަރަށް ހަލުވިކޮށް ކަމަށެވެ.
ދެކުނު އެފްރިކާގެ ސައިންޓިސްޓުން ހެދި ދިރާސާއެއްގެ ފުރަތަމަ ނަތީޖާ ދައްކާ ގޮތުން ޑެލްޓާ އާއި ބޭޓާ ވޭރިއެންޓާ އަޅާ ބަލާއިރު، އޮމިކްރޯންގެ ސަބަބުން އެއް ފަހަރަށް ވުރެ ގިނައިން ބަލި ޖެހުމުގެ ފުރުސަތު ނުވަތަ "ރީއިންފެކްޝަންގެ ފުރުސަތު" ތިން ގުނަ ބޮޑުވެ އެވެ.
ދެކުނު އެފްރިކާގެ ޑޮކްޓަރުން ބުނީ އޮމިކްރޯން ފެތުރެން ފެށި ފަހުން އުމުރުން ފަސް އަހަރުން ދަށުގެ ކުދިން ހޮސްޕިޓަލުގައި އެޑްމިޓު ކުރުން އިތުރުވެފައިވާ ކަމަށެވެ. ނަމަވެސް އެ ވޭރިއެންޓުގެ އަސަރު ކުޑަކުދިންނަށް ބޮޑަށް ކުރާ ކަމަށް ބެލެވޭ ހެއްކެއް އަދި ނެތެވެ.
